నేను సినిమాల కోసం.. ఆయన ప్రజల కోసం..!

పవర్ స్టార్ పవన్ కళ్యాణ్ మీద ఎప్పుడు తన అభిమానాన్ని చూపిస్తుంటాడు న్యాచురల్ స్టార్ నాని. ముఖ్యంగా సినీ పరిశ్రమ గురించి పవన్ ప్రస్తావించిన ప్రతి విషయంలో నాని తన సపోర్ట్ అందిస్తూ వచ్చాడు. రాజకీయాలు వేరు సినిమాలు వేరు అన్నది ఎప్పుడూ చెబుతూనే వస్తాడు నాని. ఐతే మరోసారి నాని పవన్ మీద ఉన్న తన అభిమానాన్ని బయట పెట్టారు. నాని నటించిన సరిపోదా శనివారం సినిమా ఈ నెల 29న రిలీజ్ అవుతుంది. ఈ సినిమా ప్రమోషన్స్ లో భాగంగా నాని బిజీ బిజీగా ఉన్నాడు.

కోలీవుడ్, టాలీవుడ్ రెండు చోట్ల వరుస ఇంటర్వ్యూస్ ఇస్తూ హంగామా చేస్తున్నాడు. ఇప్పటికే సరిపోదా శనివారం సినిమా ట్రైలర్ చూసి మూవీపై ఫ్యాన్స్ భారీ అంచనాలు ఏర్పరచుకున్నారు. ఇక ఇదిలాఉంటే నాని పవన్ గురించి చేసిన కామెంట్స్ పవర్ స్టార్ ఫ్యాన్స్ కి జోష్ అందిస్తుంది. యాంకర్ సుమ నాని పవన్ కళ్యాణ్ ల మధ్య ఉన్న కామన్ పాయింట్ గురించి చెప్పమని హీరోయిన్ ప్రియాంక అరుల్ మోహన్ ని అడిగితే.. ఆమె ఇద్దరు కష్టపడతారని చెప్పింది.

ఐతే ఇంతలో నాని అందుకుని నేను సినిమాల కోసం ఆయన ప్రజల కోసం అంటూ చెప్పుకొచ్చారు. అంటే నానికి సినిమాల మీద ఎంత ప్రేమ ఉందో ప్రజల మీద పవన్ కి అంత ప్రేమ అభిమానం ఉందని నాని ఉద్దేశం. అవసరం ఉన్నప్పుడు అవసరమైన టైం లో సపోర్ట్ చేసిన వారే నిజమైన హీరో. అంతేకాదు తెర మీద హీరోలా కనిపించడం కాదు తెర వెనక ఆఫ్ స్క్రీన్ లో కూడా హీరోలా ఉండాలి. అలా నాని చాలా సార్లు కొన్ని విషయాల గురించి మోహమాటం లేకుండా మాట్లాడాడు.

అందుకే ఆయన్ను ప్రేక్షకులు అంత బాగా ఇష్టపడుతున్నారు. పవన్ గురించి మాత్రం నాని ఎప్పుడు స్పెషల్ కామెంట్స్ తో అలరిస్తున్నాడు. అందుకే పవర్ స్టార్ ఫ్యాన్స్ అంతా కూడా ఇప్పుడు తమ ఫుల్ సపోర్ట్ ని నానికి అందిస్తున్నారు. సరిపోదా శనివారం సినిమా ట్రైలర్ ఇంట్రెస్టింగ్ బజ్ క్రియేట్ చేయగా సినిమా ఎలాంటి సంచలనాలు సృష్టిస్తుందో చూడాలి. వివేక్ ఆత్రేయ డైరెక్ట్ చేసిన ఈ సినిమాలో ప్రియాంక అరుల్ మోహన్ హీరోయిన్ గా నటించగా ఎస్.జె సూర్య విలన్ గా నటించారు. నాని సరిపోదా శనివారం ప్రీ రిలీజ్ బజ్ చూస్తుంటే నాని మరో బ్లాక్ బస్టర్ కొట్టడం పక్కా అనిపిస్తుంది.