నాని వన్ మ్యాన్ షో అదుర్స్..!

మామూలుగా అయితే ఏదైనా స్టార్ హీరో సినిమా రిలీజ్ అయ్యాక సినిమా చూసిన ఫ్యాన్స్ అంతా కూడా మా హీరో వన్ మ్యాన్ షో అని చెప్పడం కామన్. హీరోనే సినిమాను భుజాన మీద వేసుకుని నడిపించాడు అని కొందరు చెబుతుంటారు. ఐతే రిలీజైన సినిమాలకే కాదు రిలీజ్ అవ్వని సినిమాలకు కూడా అలా చెప్పుకునే ఛాన్స్ ప్రతిసారి ఇస్తున్నాడు న్యాచురల్ స్టార్ నాని. అష్టా చమ్మా తో మొదలు పెట్టి లాస్ట్ ఇయర్ డిసెంబర్ లో రిలీజైన హాయ్ నాన్న వరకు నాని సినిమా అంటే చాలు ఆడియన్స్ అంతా అలర్ట్ అయ్యేలా క్రేజ్ తెచ్చుకున్నాడు. లాస్ట్ ఇయర్ దసరా, హాయ్ నాన్న రెండు సినిమాలతో అదరగొట్టాడు నాని.

ఇక ఇదిలా ఉంటే ప్రస్తుతం సరిపోదా శనివారం సినిమాతో రాబోతున్న నాని ఈ సినిమా ప్రమోషన్స్ ను పీక్స్ లో చేస్తున్నాడు. ఒక సినిమాను ప్రేక్షకుల దగ్గరకు తీసుకెళ్లడంలో నానికి తెలిసినంతగా ఎవరికి తెలియదేమో అన్న రేంజ్ లో ప్రమోషన్స్ చేస్తున్నాడు. ఏదో సినిమా ఓకే చేశామా.. యాక్ట్ చేశామా.. రిలీజ్ టైం లో రెండు మూడు ఇంటర్వ్యూస్ ఇచ్చామా.. ప్రీ రిలీజ్ ఈవెంట్ లో ఫ్యాన్స్ కి సినిమాపై హోప్స్ పెంచామా అన్నట్టు కాకుండా తను చేసింది బెస్ట్ సినిమా.. కచ్చితంగా మీకు నచ్చి తీరుతుంది అని నమ్మకంగా చెప్పడం గొప్ప విషయం.

అంతేకాదు సినిమా రిలీజ్ దగ్గర పడుతుంటే సినిమా రిలీజ్ అవుతున్న ఏరియాలు మొత్తం తిరిగేస్తూ నాని ఫ్యాన్స్ కి సూపర్ జోష్ అందిస్తున్నాడు. సినిమాలో నటించడం అందరు చేస్తారు కానీ ఆ సినిమా ప్రేక్షకుల దగ్గరకు తీసుకెళ్లేలా చేసే వాడే నిజమైన హీరో. ఆ విషయంలో నాని కి 100కి 100 మార్కులు ఇచ్చేయొచ్చు. డైరెక్టర్స్ లో రాజమౌళి ఎలా తను తీసిన సినిమాను ఆడియన్స్ లోకి తీసుకెళ్లడానికి బీభత్సమైన ప్రమోషన్స్ చేస్తాడో హీరోల్లో నాని అలా చేస్తుంటాడు.

తన ప్రతి సినిమాకు నాని ఆన్ సెట్స్ పడే కష్టం కొంతమందికే తెలుస్తుంది. కానీ సినిమా రిలీజ్ టైం లో నాని చేసే ప్రమోషన్స్.. అతను ఇచ్చే ఇంటర్వ్యూస్.. సినిమాపై అతనికి ఉన్న కమిట్మెంట్ చూస్తుంటే కామన్ ఆడియన్స్ కూడా నానికి ఫ్యాన్స్ అయిపోయేలా ఉన్నారు. ప్రస్తుతం సరిపోదా శనివారం సినిమాకు అన్నీ తానై నడిపిస్తున్న నాని మరో బ్లాక్ బస్టర్ హిట్ కొడుతున్నామని ఫ్యాన్స్ కి చెప్పకనే చెబుతున్నాడు. మరి నాని చెప్పినట్టుగా సినిమా సక్సెస్ అందుకుంటుందా లేదా అన్నది ఆగష్టు 29 మొదటి ఆటకి తేలిపోతుంది.