నాని.. ఇక యాక్షన్ మోతే

టాలీవుడ్లో సినిమా సినిమాకు వైవిధ్యం చూపించే హీరోల్లో నేచురల్ స్టార్ నాని ఒకడు. ఈ ఏడాది వేసవిలో దసరా లాంటి ఊర మాస్ సినిమాతో మెప్పించిన నాని.. ఈ గురువారం హాయ్ నాన్న లాంటి పక్కా క్లాస్ మూవీతో ప్రేక్షకుల ముందుకు రానున్నాడు. ఈ సినిమా తర్వాత నాని లైన్ చాలా ఆసక్తికరంగా ఉండబోతుంది. ఇంతకుముందులా ఒక మాస్ సినిమా.. ఒక క్లాస్ సినిమా.. అని కాకుండా వరుసగా యాక్షన్ మూవీస్ చేయబోతున్నాడు. తన ఫ్యూచర్ ప్రాజెక్టులన్ని పక్క యాక్షన్ మూవీస్ అని నాని ఒక ఇంటర్వ్యూలో క్లారిటీ ఇచ్చాడు. అయితే యాక్షన్ అన్న మాటే కానీ ఒకదానితో ఒకదానికి పోలిక మాత్రం ఉండదట.

నాని ఆల్రెడీ అంటే సుందరానికి దర్శకుడు వివేక్ ఆత్రేయతో సరిపోదా శనివారం అనే ఒక వెరైటీ యాక్షన్ థ్రిల్లర్ చేస్తున్న సంగతి తెలిసిందే. దీని తర్వాత ఒక ఇంట్రెస్టింగ్ ప్రాజెక్టుకు సంబంధించి చర్చలు తుది దశలో ఉన్నాయని.. దాని గురించి అతి త్వరలో అనౌన్స్మెంట్ ఉంటుందని నాని వెల్లడించాడు. ఈ ప్రాజెక్టును సస్పెన్స్ గా చెప్పాడు నాని. దీని తర్వాత దసరా దర్శకుడు శ్రీకాంత్ వోదెలతో ఒక సినిమా ఉంటుందని నాని తెలిపాడు. ఇక చాలా ముందే ఫిక్సయిన హిట్-3ని కూడా తన ఫ్యూచర్ ప్రాజెక్టుల్లో ఒకటిగా చెప్పాడు నాని. హిట్-2 చివర్లోనే దానికి సంబంధించి హింట్ ఇచ్చిన సంగతి తెలిసిందే. ఈ ప్రకారమే తన కొత్త సినిమాల లైనప్ ఉంటుందని.. ఈ నాలుగు చిత్రాలు కథల పరంగా వేరువేరుగా ఉన్నప్పటికీ అన్నిట్లోనూ యాక్షన్ కీలకంగా ఉంటుందని నాని తెలిపాడు. అంటే వచ్చే రెండు మూడేళ్ల పాటు నాని యాక్షన్ మోత మోగించబోతున్నాడు అన్నమాట.