టైర్ 2 రికార్డ్.. నాని మరోసారి కొట్టాల్సిందే..

నాచురల్ స్టార్ నాని వరుస సక్సెస్ లతో జోరు మీద ఉన్నాడు. ఇప్పుడు సరిపోదా శనివారం సినిమాతో మరో బ్లాక్ బస్టర్ హిట్ ని ఖాతాలో వేసుకోవాలని అనుకుంటున్నాడు. వివేక్ ఆత్రేయ దర్శకత్వంలో తెరకెక్కిన ఈ మూవీ ట్రైలర్ తో ఇప్పటికే ఎక్స్ పెక్టేషన్స్ పెరిగిపోయాయి. డిఫరెంట్ కాన్సెప్ట్ తో మాస్ యాక్షన్ జోనర్ లో సరిపోదా శనివారం మూవీ ప్రేక్షకుల ముందుకి రాబోతోందని అర్ధమవుతోంది.

ఎస్.జె.సూర్య లాంటి విలక్షణ నటుడితో నాని ఈ సినిమాలో పోటీ పడుతున్నాడు. ఈ మధ్య ఎస్.జె.సూర్య విలన్ పాత్రలలో నటించిన సినిమాలు ఎక్కువగా సక్సెస్ అయ్యాయి. ఇండియన్ 2 మాత్రమే ఆశించిన స్థాయిలో మెప్పించలేదు. తెలుగులో స్పైడర్ తర్వాత సూర్య విలన్ గా నటించిన రెండో సినిమాగా సరిపోదా శనివారం మూవీ రాబోతోంది. ఆగష్టు 29న ఈ సినిమా పాన్ ఇండియా రేంజ్ లో గ్రాండ్ గా రిలీజ్ కాబోతోంది.

ఇదిలా ఉంటే ఈ సినిమా ముందు ఇప్పుడొక టార్గెట్ ఉంది. నాచురల్ స్టార్ నాని తన దసరా మూవీతో తెలుగు రాష్ట్రాలలో మొదటి రోజు 24.85 కోట్ల గ్రాస్ కలెక్షన్స్ ని అందుకున్నాడు. టైర్ 2 హీరోలలో అత్యధిక ఓపెనింగ్స్ అందుకున్న హీరోగా నాని దసరాతో రికార్డ్ క్రియేట్ చేశాడు. ఇప్పటి వరకు ఈ రికార్డ్ ని వేరే టైర్ 2 హీరోలు ఎవరూ కూడా టచ్ చేయలేకపోయారు. విజయ్ దేవరకొండ ఖుషి, ది ఫ్యామిలీ స్టార్ తో ప్రేక్షకుల ముందుకొచ్చారు. ఈ రెండు దసరా రికార్డ్ దరిదాపుల్లోకి రాలేదు.

రామ్ పోతినేని స్కంద, డబుల్ ఇస్మార్ట్ లతో ప్రేక్షకుల ముందుకొచ్చాడు. కానీ ఈ రికార్డ్ ని టచ్ చేయలేకపోయాడు. మాస్ మహారాజ్ రవితేజ కూడా ఈగల్, మిస్టర్ బచ్చన్ సినిమాలతో దసరా ఓపెనింగ్ డే కలెక్షన్స్ ని తాకలేకపోయాడు. ఇప్పుడు మరల నానికి ఆ అవకాశం వచ్చింది. సరిపోదా శనివారం సినిమాపై ఉన్న హైప్ బట్టి అయితే ఈ రికార్డ్ ని బ్రేక్ చేయడానికి కావాల్సినంత స్కోప్ ఉంది.

మొదటి రోజు 25 కోట్ల గ్రాస్ కలెక్షన్స్ అందుకుంటే దసరా రికార్డ్ బ్రేక్ అవుతుంది. మరి ఈ ఫీట్ ని నాని ఎంత వరకు బ్రేక్ చేయగలడు అనేది ఇప్పుడు ఆసక్తికరంగా మారింది. ఒక వేళ దసరా కలెక్షన్స్ ని ఫస్ట్ డే పరంగా నాని బ్రేక్ చేస్తే తరువాత టైర్ 2 హీరోలలో హైయెస్ట్ కలెక్షన్స్ అందుకున్న హీరోగా ఉన్న రికార్డ్ ని కూడా నాని టచ్ చేయడానికి ఛాన్స్ ఉంటుందని ట్రేడ్ పండితులు అంచనా వేస్తున్నారు.