సుందరకాండ టీజర్.. నారా రోహిత్ ఈసారి కామెడీగా..

ఇండస్ట్రీలో విభిన్నమైన కథలతో ఆడియెన్స్ లో మంచి గుర్తింపు అందుకున్న అతికొద్ది మంది హీరోలలో నారా రోహిత్ ఒకరు. అతను ఎలాంటి సినిమా చేసినా కూడా అందులో ఏదో ఒక డిఫరెంట్ పాయింట్ ఉంటుంది అని చెప్పవచ్చు. ఇక ఇప్పుడు తన 20వ చిత్రంగా ప్రేక్షకుల ముందుకు రాబోతున్న సుందరకాండ టీజర్ ఇటీవల విడుదలైంది. ఈ సినిమాను వేంకటేష్ నిమ్మలపూడి దర్శకత్వంలో తెరకెక్కిస్తున్నారు.

సంతోష్ చినపొల్ల, గౌతమ్ రెడ్డి, రాకేష్ మహంకల్లి సంయుక్తంగా సందీప్ పిక్చర్ ప్యాలెస్ పతాకంపై నిర్మిస్తున్నారు. టీజర్‌తోనే సినిమా పై మంచి ఆసక్తి కలిగించారు. సుందరకాండలో నారా రోహిత్‌ సిద్దార్థ్ అనే పాత్రలో కనిపించనున్నారు. పెళ్లి చేసుకునేందుకు సరైన అమ్మాయిని వెతికే అతను కొన్ని ప్రత్యేకమైన లక్షణాలున్న జీవిత భాగస్వామి కావాలని ఆశపడుతుంటాడు.

అయితే వివాహయోగ్యంలో ఉండి పెళ్లి కాకపోవడం వల్ల సమాజం నుంచి వచ్చే ఒత్తిడిని, తన తల్లిదండ్రులకు భారంగా ఉన్నట్టు అనిపించే పరిస్థితులను ఎదుర్కొంటాడు. ఈ నేపథ్యంతో తెరకెక్కిన ఈ కథలో రోహిత్‌ పాత్ర వినోదాన్ని పంచుతుందని టీజర్ స్పష్టం చేస్తోంది. సిద్దార్థ్‌ పాత్రలో రోహిత్‌ సరైన టైమింగ్‌తో కామెడీ పండిస్తున్నాడు. ఈ పాత్ర నారా రోహిత్‌ కు కరెక్ట్ గా సెట్టయినట్లు టీజర్ ద్వారా తెలుస్తోంది.

ప్రధాన కథానాయికగా వృతీ వాఘని నటిస్తుండగా, శ్రీ దేవి విజయకుమార్ ఈ సినిమాతో తిరిగి వెండితెరపై కనిపించనున్నారు. మరోవైపు సీనియర్ నరేశ్‌ తండ్రి పాత్రలో కనిపించగా, వాసుకి ఆనంద్ కూడా కీలక పాత్ర పోషిస్తున్నారు. టీజర్ లో చూపించినట్టుగా, సినిమా మంచి ఎంటర్టైన్మెంట్ తో రాబోతున్నట్లు తెలుస్తోంది.

దర్శకుడు వేంకటేష్ నిమ్మలపూడి సినిమాను పూర్తిగా వినోదభరితంగా తీర్చిదిద్దినట్లు కనిపిస్తోంది. ప్రదీప్ ఎం వర్మ సినిమాటోగ్రఫీ రంగురంగుల విజువల్స్‌తో ఆకట్టుకుంటోంది. లియోన్ జేమ్స్ బ్యాక్‌గ్రౌండ్ స్కోర్ వినోదాన్ని మరింత ఎలివేట్ చేస్తోంది. రోహన్ ఈ సినిమాకు ఎడిటర్‌గా, రాజేష్ పెంటకోట ఆర్ట్ డైరెక్టర్‌గా పనిచేస్తున్నారు.

నారా రోహిత్ ఈ మధ్య గ్యాప్ ఇచ్చినప్పటికీ మంచి కంటెంట్ తోనే ఆడియెన్స్ ముందుకు వస్తున్నట్లు తెలుస్తోంది. ఇంతకుముందు అతను మంచి సందేశాత్మక సినిమాలు కూడా చేశారు. ఇప్పుడు మరో విభిన్నమైన కథతో ఎట్రాక్ట్ చేసేందుకు రెడీ అయ్యాడు. మరి సుందరకాండ సినిమా బాక్సాఫీస్ వద్ద ఎలాంటి మ్యాజిక్ ను క్రియేట్ చేస్తుందో చూడాలి.