ఐదేళ్ల తర్వాత నారా రోహిత్.. కరెన్సీతో న్యూ కాన్సెప్ట్

ఒకప్పుడు విభిన్న కథలతో టాలీవుడ్ ఆడియెన్స్ ను ఆకట్టుకున్న హీరో నారా రోహిత్. తన యాక్టింగ్ తో ఆకట్టుకున్న ఈయన.. కొన్నేళ్ల నుంచి సినిమాలకు దూరంగా ఉంటున్నారు. అయితే తాజాగా ఆయన మళ్లీ రీఎంట్రీ ఇచ్చారు. తన 19వ కొత్త చిత్రం ఫస్ట్​లుక్​ విడుదల తేదీని ప్రకటించి సర్ ప్రైజ్ ఇచ్చారు.

'బాణం' సినిమాతో కెరీర్ మొదలుపెట్టిన నారా రోహిత్.. తొలి సినిమాతో మంచి నటుడిగా గుర్తింపు పొందారు. ఆ తర్వా 'సోలో' సినిమాతో కమర్షియల్ హిట్ అందుకుని.. తనకంటూ ఓ ఇమేజ్ ను క్రియేట్ చేసుకున్నారు. ఆ తర్వాత కథల ఎంపిక విషయంలో భిన్నంగా ముందుకెళ్తూ ఆకట్టుకునేందుకు ప్రయత్నించారు. 'ప్రతిధ్వని', 'రౌడీ ఫెలో', 'అసుర', 'జ్యో అచ్యుతానంద' తదితర చిత్రాల్లో నటించారు. అయితే ఈ సినిమాలు కమర్షియల్ గా వర్కౌట్ అవ్వలేదు కానీ.. నటుడిగా గుర్తింపు తెచ్చిపెట్టాయి. ఆడియెన్స్ ను బాగా దగ్గరయ్యేలా చేసింది. అలా ఆయన ఇప్పటివరకు దాదాపు 18 చిత్రాల్లో నటించారు.

ఇక రోహిత్ చివరిగా 2018లో వీరభోగ వసంత రాయలు చిత్రంలో నటించారు. ఆ తర్వాత ఆయన కొన్ని చిత్రాలు సైన్ చేసినా.. అవి పట్టాలెక్కలేదని తెలిసింది. అలా దాదాపు ఐదేళ్ల నుంచి సినిమాలకు దూరంగా ఉంటున్నారు. ఇప్పుడు మళ్లీ సిల్వర్ స్క్రీన్ పై కనిపించేందుకు రెడీ అయ్యారు. మరోసారి పొలిటికల్ నేపథ్యంలో చిత్రంతో ప్రేక్షకుల ముందుకు రానున్నారు.

వానరా ఎంటర్​టైన్​మెంట్స్ బ్యానర్ పై తన 19వ సినిమాను అనౌన్స్ చేశారు నారా రోహిత్. ఈ మూవీ ఫస్ట్​లుక్ జులై 24న రిలీజ్ చేయబోతునట్లు తెలిపారు. పోస్టర్ లో చేయి పైకెత్తి రెండు వేళ్లు ముడిచి, మూడు వేళ్లు పైకి చూపిస్తున్నట్టుగా డిజైన్ చేశారు. ఈ చేతికి కరెన్సీ నోట్లలా కనిపిస్తున్న పేపర్లను చుట్టి ఉంచారు. ఇంకా ఇందులో 'ఒక వ్యక్తి అన్ని అసమానతలకు వ్యతిరేకంగా నిలబడతాడు' అని రాసి ఉండటం ఆసక్తికరంగా ఉంది. అంటే ఈ చిత్రం రాజకీయ నేపథ్యంలో రానున్నట్లు తెలుస్తోంది.

దీంతో ఈ సినిమాపై ప్రేక్షకుల్లో ఇంట్రెస్ట్ క్రియేట్ అయింది. అలానే మరికొందరు.. ఈ చిత్రం గతంలో వచ్చిన ప్రతినిధికి సీక్వెల్​ అని కామెంట్లు చేస్తున్నారు. 2024 ఏపీ శాసససభ ఎన్నికలకు ముందు రిలీజ్ చేస్తారని అంటున్నారు. ఈ మూవీ ద్వారా ప్రముఖ జర్నలిస్టు టీవీ 5 మూర్తి దర్శకుడిగా పరిచయం కానున్నారని ప్రచారం సాగుతోంది.