తెలుగు యంగ్‌ స్టార్‌ కి ఫాల్కే పురస్కారం

అందాల రాక్షసి సినిమాలో సూర్య పాత్రలో నటించడం ద్వారా ఒక్కసారిగా అందరి దృష్టిని ఆకర్షించిన యంగ్‌ స్టార్‌ నవీన్‌ చంద్ర. నటుడిగా ఆ సినిమాతో విమర్శకుల ప్రశంసలు దక్కించుకున్న నవీన్ చంద్ర కు ఆ తర్వాత ఎన్నో ఆఫర్లు వచ్చాయి. కేవలం హీరోగానే నటించాలనే ఉద్దేశ్యం పెట్టుకోకుండా విలన్ గా కూడా సినిమాలు చేశాడు.

సినిమాల్లో హీరోగా, విలన్‌ గా, క్యారెక్టర్ ఆర్టిస్టుగా చేస్తూ వస్తున్న నవీన్ చంద్రకు తమిళ సినీ ఇండస్ట్రీ నుంచి కూడా వరుసగా ఆఫర్లు వస్తున్నాయి. తాజాగా ఈయన మంత్‌ ఆఫ్ మధు అనే సినిమాలో నటించడం ద్వారా మరోసారి వార్తల్లో నిలిచాడు. ఆ సినిమాలోని నటనకు గాను నవీన్ చంద్ర విమర్శకుల ప్రశంసలు దక్కించుకున్నాడు.

మంత్‌ ఆఫ్ మధు సినిమాలో అద్భుతమైన నటనకు గాను ప్రతిష్టాత్మకమైన దాదా సాహెబ్‌ ఫాల్కే ఫిల్మ్‌ ఫెస్టివల్‌ లో ఉత్తమ నటుడిగా అవార్డును నవీన్‌ చంద్ర అందుకున్నాడు. ఈ అవార్డు నవీన్‌ చంద్రకు రావడం పట్ల యూనిట్‌ సభ్యులతో పాటు ఆయన సన్నిహితులు హర్షం వ్యక్తం చేశారు.

ఫాల్కే అవార్డు పురస్కారంపై నవీన్ చంద్ర స్పందిస్తూ.. ఒక గొప్ప గౌరవం నాకు దక్కినందుకు చాలా సంతోషంగా ఉంది. కంటెంట్‌ ఉన్న కథలను ఎంపిక చేసుకుంటూ సినిమాలు చేస్తూ ఉన్నాను. ఫలితాలపై ఎక్కువ పట్టింపు లేకుండా నా బెస్ట్‌ ఇవ్వడానికి ప్రయత్నిస్తాను అన్నాడు.

మంత్‌ ఆఫ్ మధు సినిమా అమెజాన్ ప్రైమ్ మరియు ఆహా ల్లో స్ట్రీమింగ్‌ అవుతోంది. ఈ మధ్య కాలంలో వరుసగా డిజిటల్‌ సినిమాలు మరియు సిరీస్ ల్లో నవీన్ చంద్ర కనిపిస్తూ సందడి చేస్తున్నాడు. ముందు ముందు మరిన్ని అవార్డులను అందుకోవాలని కోరుకుంటూ కంగ్రాట్స్ నవీన్ చంద్ర.