కుర్ర హీరోల కళ్ళు ఈ పిల్ల మీద పడతాయా?

సినీ ఇండస్ట్రీలో హీరోయిన్ల కెరీర్ స్పాన్ చాలా తక్కువ అనే సంగతి ప్రత్యేకంగా చెప్పాల్సిన పనిలేదు. వారానికో కొత్త కథానాయిక పరిచయమయ్యే రోజుల్లో, పరిశ్రమలో నిలదొక్కోవడం అంటే మాటలు కాదు. ఎందుకంటే హిట్లు ఉంటేనే ఇక్కడ ఆఫర్లు వస్తాయి. అయితే ఇప్పుడు ఓ యంగ్ బ్యూటీ బ్యాక్ టూ బ్యాక్ రెండు హిట్లు కొట్టి, టాలీవుడ్ జనాల దృష్టిని ఆకర్షిస్తోంది. ఆమె మరెవరో కాదు.. అందాల భామ నయన్ సారిక.

దీపావళి బాక్సాఫీస్ వద్ద బ్లాక్ బస్టర్ గా నిలిచిన "క" సినిమాలో నయన్ సారిక హీరోయిన్ గా నటించింది. హీరో కిరణ్ అబ్బవరంకి జోడీగా, సత్యభామ అనే పల్లెటూరి యువతి పాత్రలో మెప్పించింది. లవ్ సీన్స్ లో హీరోతో మంచి కెమిస్ట్రీ పంచుకుంది. ఆమె లుక్స్, క్యూట్ ఎక్స్ ప్రెషన్స్, యాక్టింగ్, డ్యాన్స్.. ఆడియన్స్ ను బాగా ఆకట్టుకున్నాయి. ఈ సస్పెన్స్ క్రైమ్ థ్రిల్లర్.. కిరణ్ కు సరైన సక్సెస్ ఇవ్వడమే కాదు, సారికకు మంచి గుర్తింపు తెచ్చిపెట్టింది.

'క' కంటే ముందు "ఆయ్" సినిమాతో సక్సెస్ రుచి చూసింది నయన్ సారిక. గీతా ఆర్ట్స్2 ప్రొడక్షన్ లో నితిన్ నార్నె సరసన ఆమె హీరోయిన్ గా మురిపించింది. అగ్ర కులానికి చెందిన అమ్మాయి పాత్రలో నయన్ చాలా బాగా నటించింది. అచ్చ‌మైన గోదావ‌రి అమ్మాయిగా కనిపించి.. తన అందం, అభినయంతో ఆకట్టుకుంది. ఈ సినిమాలో ఆమె హెయిర్ స్టైల్, కెమెరా ఫ్లాష్‌ సౌండ్‌ను కంటి రెప్పలను జోడించి చేసిన మ్యానరిజం యూత్ ను బాగా అట్రాక్ట్ చేశాయి.

నిజానికి 'చిక్లెట్స్ 2K కిడ్స్' అనే చిన్న సినిమాతో నయన్ సారిక హీరోయిన్ గా పరిచయమైంది. ఆ తర్వాత ఆనంద్ దేవరకొండతో కలిసి 'గంగం గణేశా' అనే సినిమా చేసింది. రెండు సినిమాలూ ఫ్లాప్ అవ్వడంతో, జనాలు అమ్మడిని అంతగా పట్టించుకోలేదు. ఇదే క్రమంలో 'బెంచ్ లైఫ్' అనే వెబ్ సిరీస్ లో అలరించింది. ఇప్పుడు 'ఆయ్', 'క' సినిమాలతో మంచి విజయాలు అందుకుంది. వరుసగా రెండు హిట్లు పడటంతో, ఇప్పుడు మీడియం రేంజ్ ప్రొడక్షన్స్ నుంచి ఈ బ్యూటీకి పిలుపు వస్తోందని తెలుస్తోంది.

నయన్ సారిక హైదరాబాద్ కు చెందిన తెలుగమ్మాయి. గ్లామర్ తో పాటుగా యాక్టింగ్ టాలెంట్ కూడా ఉంది కాబట్టి, యంగ్ హీరోలకు నయన్ సారిక మంచి ఛాయిస్ గా మారే అవకాశాలు కనిపిస్తున్నాయి. అయినా పక్క ఇండస్ట్రీల నుంచి యాక్టింగ్ రాని హీరోయిన్లను తెచ్చుకోవడం కంటే, సారిక లాంటి తెలుగు అందాలకు ఆఫర్లు ఇవ్వడం బెటరే కదా. ఆమెకు ఇంకో రెండు హిట్లు పడితే టాలీవుడ్ లో కొన్నాళ్ళపాటు తిరుగుండదు. మరి రానున్న రోజుల్లో మన కుర్ర హీరోల దృష్టి ఈ అమ్మాయి మీద పడుతుందేమో చూడాలి.