నయనతార లైఫ్ డాక్యుమెంటరీ.. ఒకటి రెడీ!

సౌత్ ఇండియన్ లేడీ సూపర్ స్టార్ నయనతార నటిగా సుదీర్ఘ కెరియర్ ని కొనసాగిస్తోంది. తమిళంలో సోలోగా ఆమెకి 50 కోట్ల వరకు మార్కెట్ ఉంది. ప్రత్యేమైన ఫ్యాన్ బేస్ ని కూడా నయనతార తమిళనాట క్రియేట్ చేసుకుంది. మలయాళీ అయిన నయనతార బుల్లితెర యాంకర్ గా కెరియర్ స్టార్ట్ చేసి తరువాత నటిగా బిగ్ స్క్రీన్ పైకి వచ్చింది. తమిళంలో ఆమె మొదటి చిత్రాన్ని శరత్ కుమార్ తో చేసింది. రెండో చిత్రంగా ‘చంద్రముఖి’ వచ్చింది.

ఈ సినిమాలో సూపర్ స్టార్ రజినీకాంత్ తో జతకట్టింది. ‘చంద్రముఖి’ బ్లాక్ బస్టర్ కావడంతో నయనతార ఇక వెనక్కి తిరిగి చూసుకోలేదు. ‘లక్ష్మి’ సినిమాతో నయనతార టాలీవుడ్ లోకి అడుగుపెట్టింది. ఈ సినిమా కూడా సూపర్ హిట్ అయ్యింది. అక్కడి నుంచి తెలుగు, తమిళ్, మలయాళం భాషలలో వరుస సినిమాలు చేస్తూ స్టార్ హీరోయిన్ గా మారిపోయింది. ‘జవాన్’ సినిమాతో నయనతార బాలీవుడ్ లోకి అడుగుపెట్టింది.

ఈ సినిమా కూడా బిగ్గెస్ట్ బ్లాక్ బస్టర్ గా నిలిచింది. ప్రస్తుతం ఆమె ఎక్కువగా తమిళంలోనే మూవీస్ చేస్తోంది. నటిగా నయనతార జీవితం తెరచిన పుస్తకం అని చెప్పొచ్చు. వ్యక్తిగత జీవితంలో ఎన్నో ఒడిదుడుగులు ఆమె ఎదుర్కొంది. ఆమె లైఫ్ స్టోరీతో నెట్ ఫ్లిక్స్ లో ఒక డాక్యుమెంటరీ ఫిల్మ్ రాబోతోంది. నయనతార - బియాండ్ ది ఫెయిర్ టేల్ పేరుతో ఈ డాక్యుమెంటరీ ఫిల్మ్ తెరకెక్కింది. ఇందులో నయనతార వ్యక్తిగత, సినీ జీవితంలో వాస్తవాలని చూపించబోతున్నారంట.

ఈ డాక్యుమెంటరీ ట్రైలర్ ని శనివారం నెట్ ఫ్లిక్స్ రిలీజ్ చేయనుంది. దీనికి సంబందించిన అప్డేట్ ని తాజాగా ఇచ్చారు. నెట్ ఫ్లిక్స్ ఒక పోస్టర్ రిలీజ్ చేసి ట్రైలర్ రిలీజ్ పై క్లారిటీ ఇచ్చింది. ఈ పోస్టర్ లో నయనతార, విగ్నేష్ శివన్ తమ ట్విన్స్ తో కలిసి ఉన్నారు. ఈ డాక్యుమెంటరీ ఫిల్మ్ లో నయనతార తన జీవితానికి సంబందించిన ఎలాంటి అంశాలు పంచుకుందనేది ఇప్పుడు ఆసక్తికరంగా మారింది.

ఇదిలా ఉంటే నయనతార చేతిలో ప్రస్తుతం ఐదు సినిమాలు ఉన్నాయి. అందులో రెండు సీక్వెల్స్ కావడం విశేషం. సూపర్ హిట్ సినిమాలైన తని ఒరువన్, మక్కుట్టి అమ్మన్ సీక్వెల్స్ ఫైనల్ అయ్యి ఉన్నాయి. అలాగే మరికొన్ని ప్రాజెక్టులపై త్వరలోనే క్లారిటీ రానుంది.