కొత్త సక్సెస్ మంత్ర.. జై వీరాంజనేయ

సినీ రంగంలో సక్సెస్ రేట్ చాలా తక్కువ అని కొత్తగా చెప్పాల్సిన పనిలేదు. అందుకే ఒక జానర్లో ఓ సినిమా పెద్ద హిట్ అయింది అంటే.. వరుసగా అలాంటి సినిమాలే తీస్తుంటారు. అలాగే ఇక్కడ సెంటిమెంట్లు కూడా ఎక్కువే. ఒక ఆర్టిస్టు లేదా ఒక క్యారెక్టర్ సక్సెస్ సెంటిమెంట్ గా మారి తర్వాతి చిత్రాల్లో కొనసాగిస్తుంటారు. ఇప్పుడు హనుమంతుడి పాత్ర కూడా ఇలాగే సెంటిమెంట్ గా మారినట్లు కనిపిస్తోంది. హనుమాన్ సినిమాలో హనుమంతుడి పాత్ర ఎంత ఎలివేట్ అయిందో తెలిసిందే. ఆ పాత్రకు ప్రేక్షకులు బాగా కనెక్ట్ అయ్యారు. ఈ సినిమా సెన్సేషనల్ హిట్ అయ్యి.. హనుమంతుడి పాత్రలో ఉన్న పవర్ ఏంటో చాటి చెబుతోంది. దీన్ని టాలీవుడ్ జనాలు వెంటనే అందిపుచ్చుకుంటున్నారు. రాబోయే కొన్ని భారీ చిత్రాల్లో హనుమంతుడి పాత్ర కీలకంగా ఉండబోతుంది.

ఇటీవలే మెగాస్టార్ చిరంజీవి కొత్త సినిమా విశ్వంభర టైటిల్ గ్లింప్స్ రిలీజ్ అయింది. అందులో ఒకచోట హనుమంతుడి భారీ రూపం కనిపించింది. అది చూడగానే అందరికీ హనుమాన్ సినిమానే గుర్తొచ్చింది. అందులో హనుమంతుడి భారీ అవతారాన్ని చూసి ప్రేక్షకులు ఎంతగా ఉద్వేగానికి గురయ్యారో తెలిసిందే. చిరంజీవి బేసిగ్గా హనుమంతుడికి వీరభక్తుడు. జగదేకవీరుడు అతిలోకసుందరి లాంటి సినిమాల్లో హనుమంతుడి పాత్ర కీలకంగా ఉంటుంది. ఇప్పుడు హనుమాన్ కూడా సూపర్ సక్సెస్ కావడంతో విశ్వంభర టీమ్ ఆ పాత్రను ఉపయోగించుకుంటున్నట్టు కనిపిస్తోంది. మరోవైపు నిఖిల్ సినిమా స్వయంభులో కూడా హనుమంతుడి పాత్ర కీలకంగా ఉండబోతుందట. అందులో హీరో హనుమ భక్తుడిగా కనిపించనున్నాడట. ఇలా హనుమాన్ రిలీజ్ అయిన టైంలోనే.. రెండు కొత్త భారీ చిత్రాల్లో హనుమంతుడి పాత్ర కీలకంగా ఉండబోతుందని సంకేతాలు రావడంతో ముందు ముందు మరిన్ని సినిమాల్లో మేకర్స్ జై వీరాంజనేయ అనే అవకాశం ఉంది.