నితిన్ క్రేజీ లైనప్.. మరోసారి హిట్ కాంబో..

టాలీవుడ్ యంగ్ హీరో నితిన్.. కొన్నేళ్లుగా సరైన హిట్ కోసం ఎదురుచూస్తున్న విషయం తెలిసిందే. భీష్మతో చివరి సక్సెస్ అందుకున్న నితిన్.. అప్పటి నుంచి వరుస సినిమాలు చేస్తున్నా.. అవి డిజాస్టర్లుగా మారుతున్నాయి. ఇప్పుడు కొంత గ్యాప్ తీసుకుని రెండు చిత్రాల్లో నటిస్తున్నారు. తనకు భీష్మతో బిగ్ హిట్ ఇచ్చిన.. వెంకీ కుడుముల డైరెక్షన్ లో రాబిన్ హుడ్ సినిమా చేస్తున్నారు. అదే సమయంలో శ్రీరామ్ వేణు దర్శకత్వంలో తెరకెక్కుతున్న తమ్ముడు మూవీలో కూడా నటిస్తున్నారు.

రాబిన్ హుడ్ ను 2024 డిసెంబర్ లో రిలీజ్ అయ్యేలా ప్లాన్ చేసుకున్నారు నితిన్ అండ్ కో. కానీ ఆ నెల స్టార్టింగ్ లో పుష్ప-2 రిలీజ్ అవుతుండగా.. క్రిస్మస్ కానుకగా రామ్ చరణ్ గేమ్ ఛేంజర్ మూవీ విడుదల కానున్నట్లు చిన్న క్లారిటీ వచ్చేసింది. దీంతో రాబిన్ హుడ్ వాయిదా పడుతుందని అంటున్నారు. అంతకుముందే తమ్ముడు మూవీ 2025 ఫిబ్రవరిలో రిలీజ్ చేయాలని మేకర్స్ ఫిక్స్ అయినట్లు తెలుస్తోంది. మరి ఈ రెండు చిత్రాల రిలీజ్ లను ఇప్పుడు నితిన్ ఎలా ప్లాన్ చేస్తారో.

అయితే ఈ రెండు సినిమాలు సెట్స్ పై ఉండగానే.. మరో రెండు చిత్రాలను నితిన్ లైన్ లో పెట్టినట్లు తెలుస్తోంది. ఇష్క్ తో తనకు హిట్ ఇచ్చిన విక్రమ్ కె కుమార్ డైరెక్షన్ లో నితిన్ మరో సినిమా చేసేందుకు రెడీ అవుతున్నారని ఎప్పటి నుంచో వార్తలు వస్తున్నాయి. ప్రైమ్ షో ఎంటర్టైన్మెంట్స్ బ్యానర్ పై నిరంజన్ రెడ్డి నిర్మించనున్నారని, 2024లో షూటింగ్ కూడా స్టార్ట్ చేస్తారని టాక్ వినిపిస్తోంది. దీనిపై త్వరలోనే అనౌన్స్మెంట్ రానుందని వినికిడి. ఇప్పుడు మరో డైరెక్టర్ చెప్పిన కథకు నితిన్ గ్రీన్ సిగ్నల్ ఇచ్చినట్లు టాక్.

ఇటీవల ఈటీవీ విన్ ఓటీటీలో స్ట్రీమింగ్ అయ్యి సూపర్ హిట్ గా మారిన #90s వెబ్ సిరీస్ డైరెక్టర్ ఆదిత్య హాసన్ తో నితిన్ వర్క్ చేయనున్నారని ఇప్పుడు ఇండస్ట్రీలో జోరుగా చర్చ సాగుతోంది. ఆదిత్య చెప్పిన స్టోరీ విని నితిన్ రీసెంట్ గా గ్రీన్ సిగ్నల్ ఇచ్చినట్లు తెలుస్తోంది. అయితే నితిన్, ఆదిత్య ఇద్దరూ ఖాళీ అయ్యాక ఈ సినిమా షూటింగ్ స్టార్ చేస్తారని సమాచారం. నైంటీస్ మిడిల్ క్లాస్ సూపర్ హిట్ అవ్వడంతో.. నితిన్ ఫ్యాన్స్ ఇప్పటి నుంచే మంచి అంచనాలు పెట్టుకుంటున్నారు.

నైంటీస్ వెబ్ సిరీస్ తర్వాత ఆదిత్యకు టాలీవుడ్ లో మంచి క్రేజ్ వచ్చింది. మలయాళం సూపర్ హిట్ మూవీ ప్రేమలు తెలుగు వెర్షన్ కు ఆయనే డైలాగ్స్ అందించి మరింత పేరు సంపాదించుకున్నారు. ప్రస్తుతం నైంటీస్ మిడిల్ క్లాస్ సెకండ్ సీజన్ తీస్తున్నారు. సినిమా అవకాశాలు కూడా వస్తున్నట్లు తెలుస్తోంది. ఇప్పుడు నితిన్ తో సినిమా చేస్తారని వార్తలు వినిపిస్తున్నాయి. మరి ఈ మూవీ ఎప్పుడు స్టార్ట్ అవుతుందో, నితిన్-ఆదిత్య ఎలాంటి హిట్ అందుకుంటారో చూడాలి.