వేటకు సిద్ధమైన రాబిన్ హుడ్

యంగ్ హీరో నితిన్ కెరియర్ ఆరంభంలో 'జయం', 'దిల్', 'సై' లాంటి సినిమాల తర్వాత కమర్షియల్ హీరోగా ఎదగాలని ఎక్కువగా యాక్షన్ ఎంటర్టైనర్ కథలు చేస్తూ వచ్చాడు. అయితే వాటితో అతనికి ఎక్కువగా సక్సెస్ లు రాలేదు. మరల 'ఇష్క్' తో రొమాంటిక్ లవ్ అండ్ కామెడీ సినిమాతో సక్సెస్ అందుకొని ఫామ్ లోకి వచ్చాడు. ఆ తరువాత వచ్చిన 'గుండెజారి గల్లంతయ్యిందే' మూవీ కూడా రొమాంటిక్ కామెడీ ఎంటర్టైనర్ గానే వచ్చి సూపర్ హిట్ అయ్యింది.

'లై' సినిమాతో యాక్షన్ ట్రై చేసిన నితిన్ కి ఫెయిల్యూర్ తప్పలేదు. ఇక భీష్మ తో మళ్ళీ ఫామ్ లోకి వచ్చినప్పటికీ ఆ తరువాత ఫ్లాప్స్ తప్పలేదు. చివరిగా వచ్చిన 'మాచర్ల నియోజకవర్గం' యాక్షన్ కమర్షియల్ ఎంటర్టైనర్ గా తెరకెక్కి డిజాస్టర్ అయ్యింది. ప్రస్తుతం నితిన్ వెంకి కుడుముల దర్శకత్వంలో 'రాబిన్ హుడ్' సినిమా చేస్తున్నాడు. ఈ సినిమా డిసెంబర్ 20న థియేటర్స్ లోకి రాబోతోంది. ఈ సినిమా అవుట్ అండ్ అవుట్ ఎంటర్టైనర్ గా ఉండబోతోందనే టాక్ వచ్చింది. వెంకి, నితిన్ కాంబినేషన్ లో వచ్చిన 'భీష్మ' తరహాలోనే రాబిన్ హుడ్ ఉంటుందని అందరూ భావించారు.

అయితే 'రాబిన్ హుడ్' చిత్రంలో పవర్ఫుల్ యాక్షన్ ఎలిమెంట్స్ కూడా వెంకి జోడించాడనే ప్రచారం జరుగుతోంది. ఒక సూపర్ హీరో తరహాలో థ్రిల్ ఇవ్వనున్నట్లు అనిపిస్తోంది. తాజాగా ఈ సినిమా నుంచి నితిన్ కొత్త పోస్టర్ రిలీజ్ అయ్యింది. ఇందులో నితిన్ మాస్క్ పెట్టుకొని చాలా ఇంటెన్స్ లుక్ లో చూస్తున్నాడు. ఈ చిత్రంలో నితిన్ దొంగగా కనిపించబోతున్నాడని అందరికి తెలిసిందే. డబ్బున్నవాడిని దోచుకొని పేదలకి పెట్టేవాడిని రాబిన్ హుడ్ తో పోలుస్తూ ఉంటారు.

ఇందులో నితిన్ పాత్ర కూడా అదే తరహాలో ఉంటుందని సమాచారం. ఎంటర్టైన్మెంట్ తో పాటు అంతకుమించి పవర్ ఫుల్ యాక్షన్ ఎలిమెంట్స్ కూడా ఈ చిత్రంలో ఉండే అవకాశాలు కనిపిస్తున్నాయని ఇండస్ట్రీ వర్గాలని అనుకుంటున్నారు. నవంబర్ 14న 'రాబిన్ హుడ్' టీజర్ ని రిలీజ్ చేయబోతున్నారు. ఈ టీజర్ తో మూవీ కంటెంట్ ఎలా ఉండబోతోందనేది ఒక క్లారిటీ వచ్చేస్తుంది.

వరుస ఫ్లాప్ లతో ఉన్న నితిన్ ఈ చిత్రంతో కమర్షియల్ సక్సెస్ అందుకోవాలనే కసితో ఉన్నారు. ప్రేక్షకులు నితిన్ నుంచి ఎక్కువగా ఎంటర్టైన్మెంట్ మిక్స్ అయ్యి ఉన్న యాక్షన్ ని కోరుకుంటారు. అలాగే స్ట్రాంగ్ స్టోరీని కూడా చూస్తారు. 'రాబిన్ హుడ్' లో ఆ అంశాలు అన్ని ఉంటాయని ఈ పోస్టర్ చూస్తుంటే అర్ధమవుతోంది. మరి ఈ చిత్రం నితిన్ కి ఎలాంటి ఫలితం ఇస్తుందో వేచి చూడాలి.