ఇక రూటు మార్చాల్సిందే నితిన్!

హీరో నితిన్, హీరోయిన్ శ్రీలీల జంటగా నటించిన ఎక్స్ ట్రా ఆర్డినరీ మ్యాన్ సినిమా ఆశించిన ఫలితం అందుకోలేక నిరాశపరిచింది. ఎన్నో ఆశలు పెట్టుకుని అభిమానులను కాలర్ ఎగరేసుకుని థియేటర్ నుంచి వస్తారని చెబుతూ నితిన్ తెగ ఊరించిన ఆ సినిమా ఫ్లామ్ టాక్ అందుకుంది. కేవలం ఎంటర్ టైన్మెంట్ మీదనే నమ్మకం ఉంచుకుని వక్కంతం వంశీ స్క్రిప్ట్ ను లోతుగా విశ్లేషించుకోకపోవడం వల్ల వచ్చిన ఫలితమిదని నెటిజన్లు అంటున్నారు.

ఈ సినిమాను నితిన్ కుటుంబసభ్యులే నిర్మించినా.. ఎవరూ మూవీ ఫలితాన్ని ఊహించలేదన్నమాట. విశ్వక్ సేన్ గ్యాంగ్స్ ఆఫ్ గోదావరి సినిమా వాయిదా పడినా ఈ సినిమా మినిమమ్ వసూళ్లు సాధించడం లేదని తెలుస్తోంది. సినిమా అవుట్ పుట్ ను చూసి కూడా హిట్ అవుద్దని నితిన్ ఎలా నమ్మాడో తెలియడం లేదని అంటున్నారు.

అయితే నితిన్ విషయంలో ఒకసారి ఇలా జరిగితే ఏదో అనుకోవచ్చు. కానీ ఆయన గత పదేళ్లలో హిట్ లాజిక్ ను మిస్సవుతూనే ఉన్నారు. ఎక్స్ ట్రా ఆర్డినరీ మ్యాన్ కు ముందు వచ్చిన మాచర్ల నియోజకవర్గంలో ఓవర్ మాస్ లోకి వెళ్లిపోయి దెబ్బతిన్నారు. అనుభవం లేని దర్శకుడికి అవకాశం ఇవ్వడం వల్ల ఆ సినిమా డిజాస్టర్ అయింది.

మరో మూవీ మ్యాస్ట్రో ఓటీటీలో రిలీజైంది కాబట్టి సరిపోయింది కానీ థియేట్రికల్ రిలీజ్ అయ్యి ఉంటే అంతే సంగతి. రంగ్ దే కూడా ఆశించిన ఫలితం ఇవ్వలేదు. వెంకీ కుడుములతో చేసిన భీష్మ ఒకటే నితిన్ హ్యాపీగా చెప్పుకునే సూపర్ హిట్. శ్రీనివాస కళ్యాణం, లై, చల్ మోహనరంగా అన్నీ మిస్ ఫైర్ అయినవే. త్రివిక్రమ్ శ్రీనివాస్ అఆ మాత్రమే నితిన్ కు పెద్ద బ్లాక్ బస్టర్ గా నిలిచింది. 2013లో గుండె జారి గల్లంతయ్యిందే తర్వాత సాలిడ్ గా పడిన హిట్లు మూడు మాత్రమే.

అయితే ఇప్పుడు నితిన్ మొత్తం ఆశలన్నీ వెంకీ కుడుముల మీదే పెట్టుకున్నారు. ఆల్రెడీ హీరోయిన్ మారిపోయి ఆ ప్రాజెక్ట్ కూడా ఇది కూడా కాస్త కుదుపులకు లోనైనట్లు తెలుస్తోంది. నితిన్ కు ఇప్పుడు బ్రేక్ ఇవ్వాల్సింది వెంకీనే. ఇక వైఫల్యాలే నితిన్ కు పాఠాలు నేర్పాలని నెటిజన్లు కోరుకుంటున్నారు.