'వన్ మోర్ టైం'.. ఎనర్జిటిక్ స్టెప్పులతో ఆకట్టుకున్న 'రాబిన్‌హుడ్' జోడీ!

యూత్ స్టార్ నితిన్ హీరోగా నటిస్తున్న లేటెస్ట్ మూవీ ''రాబిన్‌హుడ్''. వెంకీ కుడుముల దర్శకత్వంలో తెరకెక్కుతున్న ఈ సినిమాలో యంగ్ సెన్సేషన్ శ్రీలీల హీరోయిన్ గా నటిస్తోంది. ఇదొక యూనిక్ యాక్షన్, హీస్ట్ కామెడీ ఎంటర్టైనర్ అని చిత్ర బృందం చెబుతోంది. ఇప్పటికే విడుదలైన ఈ మూవీ ప్రమోషనల్ కంటెంట్ ఆడియన్స్ ను ఆకట్టుకుంది. ఇటీవల రిలీజ్ చేసిన టీజర్‌ కు మంచి రెస్పాన్స్ వచ్చింది. ఈ నేపథ్యంలో మ్యూజికల్ ప్రమోషన్స్ లో భాగంగా మేకర్స్ తాజాగా 'వన్ మోర్ టైం' అనే ఫస్ట్ సింగిల్ లిరికల్ వీడియోని లాంచ్ చేసారు.

''లుక్కిస్తే చాలే జాన్, లక్కీగా ఫీల్ అవుతాను.. కిక్కొచ్చే టచ్ ఇస్తావా.. వన్ మోర్ టైం.. వన్ మోర్ టైం'' అంటూ సాగిన ఈ పాట మ్యూజిక్ లవర్స్ ను అలరిస్తోంది. ఇది లవ్ ఫ్యూజన్ సాంగ్ ఆఫ్ ది ఇయర్ అని మేకర్స్ పేర్కొన్నారు. మ్యూజిక్ డైరెక్టర్ జివి ప్రకాష్ కుమార్ ఈ పాటకు పెప్పీ ట్యూన్ ను కంపోజ్ చేసారు. పాప్ క్వీన్ విద్యా వోక్స్ తో కలిసి వినసొంపుగా ఆలపించారు. దీనికి గీత రచయిత కృష్ణకాంత్ లిరిక్స్ రాశారు. ''డే లోనూ భూమి మీద స్టారే నువ్వంటా.. నైట్ అయినా నీడలాగా నీతో నేనుంటా.. నా డ్రీమ్ కోటికి క్వీనే నువ్వంటా.. నేనేమో క్రౌన్ లేని కింగే అయిపోతా'' అంటూ ఇంగ్లీష్, తెలుగు పదాల కలయికగా సాహిత్యం అందించారు.

నితిన్, శ్రీలీల మీద చిత్రీకరించిన 'వన్ మోర్ టైం' పాట చాలా రిఫ్రెషింగ్ గా అనిపిస్తుంది. జివి ప్రకాష్ మరోసారి తన మ్యూజిక్ తో మ్యాజిక్ చెయ్యగా.. తెలుగులో తొలిసారిగా పాడిన విద్యా వోక్స్ తన శ్రావ్యమైన గాంత్రంతో ఆకట్టుకుంది. అందమైన ఫారిన్ లొకేషన్స్ లో షూట్ చేసిన ఈ మెలోడీ.. వినడానికే కాదు, చూడటానికి విజువల్ గానూ చాలా బాగుంది. హీరో హీరోయిన్ల మధ్య కెమిస్ట్రీ కూడా బాగా కుదిరింది. ఇద్దరూ వైబ్రెంట్ అండ్ స్టైలిష్ లుక్ లో అందంగా కనిపించారు. డ్యాన్సింగ్ క్వీన్ శ్రీలీల, నితిన్ కలిసి తమ ఎనర్జిటిక్ స్టెప్పులతో ఈ పాటకు అదనపు ఆకర్షణ జోడించారని చెప్పాలి. దీనికి శేఖర్ మాస్టర్ కొరియోగ్రఫీ చేసినట్లు తెలుస్తోంది.

ఓవరాల్ గా ''రాబిన్‌హుడ్'' చిత్రంలోని 'వన్ మోర్ టైం' సాంగ్ ఇన్స్టెంట్ చార్ట్ బస్టర్ గా నిలిచే అవకాశం ఉంది. సాయి శ్రీరామ్ ఈ సినిమాకి సినిమాటోగ్రఫీ నిర్వహించారు. రామ్ కుమార్ ఆర్ట్ డైరెక్టర్ గా, కోటి ఎడిటర్ గా వ్యవహరిస్తున్నారు. మైత్రీ మూవీ మేకర్స్ బ్యానర్ పై నవీన్ యెర్నేని, వై రవిశంకర్ ఈ చిత్రాన్ని భారీ బడ్జెట్ తో నిర్మిస్తున్నారు. అన్నీ కలుపుకొని దాదాపు 70 కోట్ల బడ్జెట్ అవుతున్నట్లుగా టాక్ వినిపిస్తోంది. అయితే సినిమాపై హ్యూజ్ బజ్ ఉండటం, మంచి సీజన్ లో రిలీజ్ డేట్ దొరకడం కలిసొస్తుందని ట్రేడ్ వర్గాలు భావిస్తున్నాయి.

'రాబిన్‌ హుడ్‌' మూవీని 2025 డిసెంబర్ 25న ప్రపంచ వ్యాప్తంగా గ్రాండ్ గా థియేటర్లలో విడుదల చేయడానికి మేకర్స్ సన్నాహాలు చేస్తున్నారు. 'భీష్మ' వంటి బ్లాక్ బస్టర్ తర్వాత నితిన్, వెంకీ కుడుముల కాంబినేషన్ లో రాబోతున్న ఈ సినిమాపై అందరిలో మంచి అంచనాలు నెలకొన్నాయి. మరి క్రిస్మస్ కానుకగా ప్రేక్షకుల ముందుకు వస్తోన్న ఈ చిత్రం.. ఐదు రోజుల లాంగ్ వీకెండ్ ను క్యాష్ చేసుకొని బాక్సాఫీస్ దగ్గర ఎలాంటి విజయాన్ని సాధిస్తుందో వేచి చూడాలి.