దిల్ రాజు 'లవ్ మీ' పరిస్థితేంటి?

టాలీవుడ్ ప్రముఖ నిర్మాత దిల్ రాజు సోదరుడి కొడుకు, యంగ్ హీరో ఆశిష్ నటిస్తున్న లేటెస్ట్ మూవీ 'లవ్ మీ'. బేబీ చిత్రంతో బ్లాక్ బస్టర్ హిట్ కొట్టిన తెలుగమ్మాయి వైష్ణవి చైతన్య హీరోయిన్ గా నటిస్తున్న ఈ సినిమాను అరుణ్ తెరకెక్కిస్తున్నారు. దిల్ రాజు బ్యానర్ పై హన్షిత రెడ్డి, హర్షిత్ రెడ్డి నిర్మిస్తున్నారు. కూతురు నిర్మిస్తున్న సినిమా కావడంతో దిల్ రాజు దగ్గరుండి చూసుకుంటున్నారని సినీ వర్గాల్లో టాక్ వినిపిస్తోంది.

ఇప్పటికే విడుదలైన టీజర్ ద్వారా దెయ్యంతో హీరో ప్రేమాయణం అనే కాన్సెప్ట్ తో ఈ సినిమా రాబోతుందని హింట్ ఇచ్చేశారు మేకర్స్. రీసెంట్ గా ట్రైలర్ రిలీజ్ చేస్తూ అసలు విషయం కూడా చెప్పేశారు. ఎవరైనా వద్దన్న పనిని కావాలని చేసే హీరో (ఆశిష్).. రిస్క్ అని చెప్పినా వినకుండా దెయ్యం ఉండే భవనానికి వెళ్తాడు. ఆ తర్వాత ఎందరినో చంపేసిన దెయ్యంతో ప్రేమలో పడతాడు. ఎలాగైనా ఆ దెయ్యాన్ని చూడాలని ట్రై చేస్తాడు.

అయితే అనుకోకుండా ఓ రోజు రాత్రి ఎనిమిది గంటలకు అలారం మోగుతుంది. దీంతో దెయ్యం ఉన్న భవనం చుట్టు పక్కల ఉన్న ప్రజలు తమ ఇంటి తలుపులు మూసేస్తారు. కానీ ఓ అమ్మాయి మాత్రం తలుపు తెరిచి చూసి భయంతో ఒక్కసారిగా అరుస్తుంది. ఆ తర్వాత ఏం జరిగిందనేది సినిమా. ఈ మూవీ టైటిల్ లవ్ మీకి If You Dare అనే క్యాప్షన్ ఎందుకు ఇచ్చారో ట్రైలర్ చూస్తుంటే ఈజీగా అర్థమవుతుంది.

ఇదంతా పక్కన పెడితే.. మరో ఐదు రోజుల్లో.. అంటే మే 25న లవ్ మీ మూవీ ప్రేక్షకుల ముందుకు రానుంది. కానీ సినిమాపై ఆడియన్స్ లో అనుకున్నంత స్థాయిలో బజ్ క్రియేట్ అవ్వలేదు. సాంగ్స్, టీజర్, ట్రైలర్ అంటూ మేకర్స్ వరుస అప్డేట్స్ ఇచ్చినా క్రేజీ బజ్ మాత్రం లేదని చెప్పాలి. మేకర్స్ కూడా ట్రైలర్ రిలీజ్ చేశాక... పెద్ద ఎత్తున ప్రమోషన్స్ నిర్వహించలేదు. మిగతా సినిమాలతో పోలిస్తే.. మేకర్స్ చాలా తక్కువ ప్రమోషన్స్ చేశారు. బజ్ క్రియేట్ అవ్వకపోవడానికి ఇది కూడా ఓ కారణం.

ప్రీ రిలీజ్ ఈవెంట్ నిర్వహిస్తామని లవ్ మీ మేకర్స్ ఇప్పటికే అనౌన్స్ చేసిన విషయం తెలిసిందే. కానీ ఇప్పటి వరకు ఇంకా డేట్ అండ్ వెన్యూ వెల్లడించలేదు. ఇక ఈ సినిమాకు గాను టాప్ టెక్నీషియన్స్ వర్క్ చేశారు. ఆస్కార్ అవార్డు అందుకున్న కీరవాణి సంగీతం అందించారు. అయితే ఈ మూవీ రిజల్ట్ పై దిల్ రాజు సహా టీమ్ అంతా మంచి నమ్మకంతో ఉంది. మరి పెద్దగా బజ్ క్రియేట్ చేసుకోలేకపోయిన ఈ సినిమా ఎలా ఉంటుందో చూడాలి.