'తరుణ్‌, పూరి శరీరంలో డ్రగ్స్‌ ఆనవాళ్లు లేవు'

అప్పట్లో తెలంగాణలో చర్చనీయాంశంగా మారిన టాలీవుడ్‌ డ్రగ్స్‌ కేసులో కీలక మలుపు చోటుచేసుకుంది. రాష్ట్రప్రభుత్వం నియమించిన సిట్ నమోదు చేసిన 8 డ్రగ్స్‌ కేసుల్లో ఆరు కేసులను నాంపల్లి కోర్టు కొట్టివేసింది. సరైన ఆధారాలు, సాక్ష్యాలు లేకపోవడంతో కేసులు కొట్టివేస్తున్నట్లు కోర్టు పేర్కొంది. డ్రగ్స్‌ కేసు నమోదులో సరైన ప్రొసీజర్‌ పాటించలేదని ఈ సందర్భంగా న్యాయస్థానం స్పష్టం చేసింది.

తెలుగు సినీ పరిశ్రమలో డ్రగ్స్‌ వ్యవహారంపై రాష్ట్ర ప్రభుత్వం.. ప్రత్యేక దర్యాప్తు బృందం (సిట్‌)ను ఏర్పాటు చేసింది. అయితే ఆ సిట్ ఎనిమిది కేసులు నమోదు చేసి నెలల తరబడి టాలీవుడ్ ప్రముఖులను విచారించింది. వారి మొబైల్‌ ఫోన్లు స్వాధీనం చేసుకుంది. పలువురి నుంచి గోర్లు, వెంట్రుకలను సేకరించి ఎఫ్ఎస్ఎల్‌కు పంపించింది. వాటిలో పూరి జగన్నాథ్‌, తరుణ్‌ శాంపిల్స్‌ను మాత్రమే పరిశీలించింది ఎఫ్ఎస్ఎల్‌.

అయితే వారిద్దరి శరీరంలో ఎలాంటి డ్రగ్స్‌ ఆనవాళ్లు లభించలేదని ఎఫ్ఎస్ఎల్‌ పేర్కొంది. ఇప్పుడు ఈ నివేదిక ఆధారంగా సాక్ష్యాలను పరిశీలించిన న్యాయస్థానం.. ఆరు కేసులను కొట్టివేస్తూ గురువారం తీర్పు వెలువరించింది. డ్రగ్స్‌ కేసులో పాటించాల్సిన ప్రొసీజర్‌ ఫాలో కాలేదని, ఆరు కేసుల్లో ఎలాంటి సాక్ష్యాలు, ఆధారాలు లేవని న్యాయస్థానం క్లారిటీ ఇచ్చింది.

2017 జులై 19న పూరీ జగన్నాథ్‌, 22న తరుణ్‌ నమూనాల్ని ఉస్మానియా ఆసుపత్రి వైద్యుల ద్వారా వాటిని సేకరించి ఎఫ్ఎస్ఎల్‌కు పంపించింది సిట్. ఎఫ్ఎస్ఎల్‌ ఇచ్చిన నివేదిక కొన్ని నెలల తర్వాత బయటకొచ్చింది. పూరి, తరుణ్‌ మాదకద్రవ్యాలు తీసుకున్నట్లు ఎలాంటి ఆనవాళ్లు లేవని ఆ నివేదిక స్పష్టం చేసింది. ఇప్పుడు ఆ నివేదిక ఆధారంగా కోర్టు తీర్పు ఇచ్చింది.

సినీ నటులు, హోటల్స్‌, విద్యార్థులు, సాఫ్ట్‌వేర్ ఉద్యోగులకు డ్రగ్స్ అమ్మినట్లు ఈ కేసులో ప్రధాన నిందితుడు కెల్విన్ అప్పట్లో వాంగ్మూలం ఇచ్చాడు. దాని ఆధారంగా సిట్ బృందం పలువురికి నోటీసులు ఇచ్చి ప్రశ్నించింది. ఈ వ్యవహారంలో దర్శకుడు పూరిజగన్నాథ్‌, తరుణ్ సహా నటులు రానా, రవితేజ, నందు, చార్మి, రకుల్‌ప్రీత్‌సింగ్‌, ముమైత్ఖాన్, తనీష్‌ తదితరులను అధికారులు ప్రశ్నించారు. మత్తు మందు సరఫరాదారులు కెల్విన్‌, జీషాన్‌లను కూడా విచారించారు. మరి ఈ కేసు ఇంకా ఎలాంటి మలుపులు తిరుగుతుందో చూడాలి.