‘వార్‌ 2’ అప్డేట్: హృతిక్‌తో ఎన్టీఆర్ నాటు నాటు స్టెప్పులు!

మ్యాన్ ఆఫ్ మాసెస్, యంగ్ టైగర్ ఎన్టీఆర్ ‘వార్‌ 2’ సినిమాతో బాలీవుడ్ లో అడుగుపెడుతున్న సంగతి తెలిసిందే. యష్ రాజ్ ఫిలిమ్స్ స్పై యూనివర్స్ లో భాగంగా తెరకెక్కుతున్న ఈ చిత్రంలో, హిందీ స్టార్ హీరో హృతిక్ రోషన్ తో స్క్రీన్ షేర్ చేసుకోబోతున్నారు. అయాన్ ముఖర్జీ దర్శకత్వంలో ఈ చిత్రం తెరకెక్కుతోంది. రెండు ఇండస్ట్రీలకు చెందిన ఇద్దరు పాపులర్ స్టార్స్ కలిసి నటిస్తున్న ఈ సినిమాపై భారీ అంచనాలు నెలకొన్నాయి. తాజాగా ఈ చిత్రానికి సంబంధించిన ఓ క్రేజీ న్యూస్ బయటకు వచ్చింది.

ఇటీవల ముంబైలో జరిగిన ‘వార్‌ 2’ షెడ్యూల్‌లో హృతిక్‌ రోషన్ - తారక్‌ లపై ఓ భారీ ఛేజింగ్‌ సీక్వెన్స్‌ ను షూట్ చేసినట్టు వార్తలు వచ్చాయి. ఇది సినిమాలో హైలైట్ గా నిలిచే యాక్షన్ సీన్ అని, దీని కోసం పెద్ద మొత్తంలో ఖర్చు చేసినట్లుగా తెలిసింది. అయితే ఇప్పుడు జూనియర్ ఎన్టీఆర్ - హృతిక్‌ రోషన్ ల కాంబినేషన్ లో ఓ సాంగ్ ను చిత్రీకరించడానికి చిత్ర యూనిట్ సన్నాహాలు చేస్తోందని బీటౌన్ వర్గాల్లో టాక్ వినిపిస్తోంది.

ఎన్టీఆర్, హృతిక్ లు ఎంత మంచి డ్యాన్సర్స్ అనేది ప్రత్యేకంగా చెప్పాల్సిన పనిలేదు. ఇండియన్ సినిమాలోని బెస్ట్ డ్యాన్సర్స్ లిస్టు తీస్తే, వీరిద్దరి పేర్లు ఖచ్చితంగా టాప్ లో ఉంటాయి. ఒకరు తన మాస్ స్టెప్పులతో అదరగొడితే, మరొకరు స్టైలిష్ డ్యాన్స్ మూవ్స్ తో ఇరగదీస్తారు. అలాంటి ఇద్దరు స్టార్ హీరోలు ఒకే పాటకు డ్యాన్స్ చేయడం అంటే ఆడియన్స్ కు విజువల్ ట్రీట్ అనే చెప్పాలి. ఇప్పుడు ‘వార్‌ 2’ సినిమా కోసం ఆ ప్రయత్నమే జరుగుతున్నట్లు తెలుస్తోంది. హృతిక్‌ - తారక్‌ లపై ఓ మాస్ మసాలా సాంగ్ ను షూట్ చేస్తారని సమాచారం అందుతోంది.

RRR చిత్రంలో 'నాటు నాటు' పాటకు ఎన్టీఆర్, రామ్ చరణ్ లు వేసిన డ్యాన్సులకు గ్లోబల్ వైడ్ గా ప్రశంసలు దక్కాయి. ఈ స్టెప్పులు ఆస్కార్ పురస్కారాన్ని ఇండియాకి తీసుకొచ్చాయి. 'వార్ 2' మూవీలో తారక్ - హృతిక్‌లతో అదే రేంజ్ లో చాలా గ్రాండియర్ గా స్పెషల్ సాంగ్ ప్లాన్ చేస్తున్నట్లు టాక్. ఇప్పటికే ఈ పాట కోసం ముంబైలో ప్రత్యేకంగా ఓ భారీ కలర్ ఫుల్ సెట్ ను ఏర్పాటు చేశారట. దీనికి ఓ టాప్ డ్యాన్స్ మాస్టర్ కొరియోగ్రఫీ చేస్తున్నారట. ఇద్దరు బెస్ట్ డ్యాన్సర్స్ తో చేస్తున్న ఈ సాంగ్.. నాటు నాటు కంటే బెటర్ గా ఉండాలని అభిమానులు కోరుకుంటున్నారు. అదే జరిగితే థియేటర్స్ దద్దరిల్లిపోవడం ఖాయమని, టాలీవుడ్ - బాలీవుడ్ కలిసి డ్యాన్స్ చేస్తే వరల్డ్ మొత్తం షేక్ అవ్వాల్సిందేనని కామెంట్స్ చేస్తున్నారు.

కాగా, 2019లో వచ్చిన 'వార్' సీక్వెల్ గా, YRF స్పై యూనివర్స్ లో 6వ చిత్రంగా ‘వార్‌ 2’ తెరకెక్కుతోంది. ఇందులో ఎన్టీఆర్, హృతిక్ రోషన్ లు స్పై ఏజెంట్స్ గా కనిపించనున్నారు. కియారా అద్వానీ ఓ హీరోయిన్ గా నటిస్తోంది. బాలీవుడ్ స్టార్ ప్రొడ్యూసర్ ఆదిత్య చోప్రా ఈ స్టైలిష్ స్పై యాక్షన్ థ్రిల్లర్‌ ను నిర్మిస్తున్నారు. 2025 ఇండిపెండెన్స్ డే స్పెషల్ గా ఆగస్టు 15న వరల్డ్ వైడ్ గా ఈ సినిమా రిలీజ్ కానుంది. త్వరలోనే ఈ చిత్రానికి సంబంధించిన క్రేజీ అప్డేట్స్ రానున్నాయి.

ఇకపోతే RRR చిత్రంతో గ్లోబల్ వైడ్ గా పాపులారిటీ సంపాదించుకున్న జూ.ఎన్టీఆర్.. 'దేవర' సినిమాతో హిట్టు కొట్టి రాజమౌళి మిత్ బ్రేకర్ అనిపించుకున్నారు. కొరటాల శివ దర్శకత్వం వహించిన ఈ చిత్రం.. రివ్యూస్ తో సంబంధం లేకుండా మంచి విజయం సాధించింది. హిందీ బెల్ట్‌లలో స్వంత మార్కెట్ ను క్రియేట్ చేసుకోడానికి తారక్ కు సహాయపడింది. ఇది ''వార్ 2'' సినిమాపై మరింత హైప్ పెరగడానికి కారణమైంది. దీని తర్వాత ప్రశాంత్ నీల్, ఎన్టీఆర్ కాంబోలో ఓ భారీ పాన్ ఇండియా మూవీ రానుంది.