మరో రేంజ్ కు వెళ్ళేలా.. ఎన్టీఆర్ బాలీవుడ్ కనెక్షన్స్

ప్రస్తుతం టాలీవుడ్ స్టార్ హీరో ఎన్టీఆర్ ముంబై నుంచి హైదరాబాద్ మధ్య ప్రయాణాలు చేస్తూ బిజీగా ఉన్న విషయం తెలిసిందే. ఎంత బిజీగా ఉన్నా కూడా ఫ్యామిలీకి కూడా టైమ్ కేటాయిస్తున్నాడు. రీసెంట్ గా బాధ్యతతో ఓటు హక్కు కూడా వినియోగించుకున్నాడు. దేవర తో పాటు హృతిక్ రోషన్ ప్రధాన పాత్రలో నటిస్తున్న "వార్ 2" చిత్ర షూటింగ్ లో కూడా ఎన్టీఆర్ పాల్గొంటున్నారు.

ఈ ప్రాజెక్టులోని తన పాత్రకు సంబంధించి ఎన్టీఆర్ కాస్త ఎక్కువ సమయాన్ని ముంబైలో గడుపుతున్నారు. ఇటీవ‌ల హైదరాబాద్ లో తన ఓటు హక్కును వినియోగించుకున్న తర్వాత ఎన్టీఆర్ ముంబైకి వెళ్ళినట్లు వార్తలు వచ్చాయి. త్వరలో ఆయన పుట్టిన రోజు మే 20వ తేదీన జరుపుకోబోతున్నారు. ఈ సందర్భంగా ఎన్టీఆర్ ముంబైలో స్పెషల్ ప్లాన్ చేసినట్లు సమాచారం.

ముంబై సినీ పరిశ్రమలో ఎన్టీఆర్ సన్నిహితులైన రణబీర్ కపూర్, ఆలియా భట్, హృతిక్ రోషన్, మరియు వరుణ్ ధావన్ వంటి ప్రముఖులకు ఎన్టీఆర్ ప్రత్యేకంగా ఒక చిన్న పార్టీ నిర్వహించనున్నారట. ఈ కార్యక్రమం చాలా ప్రైవేట్ గా నిర్వహించబడుతుందని తెలుస్తోంది. తారక్ మెల్లగా బాలీవుడ్ స్టార్ సెలబ్రెటీలకు క్లోజ్ అవుతున్నాడు అని చెప్పవచ్చు. ఒక రకంగా అతని బాలీవుడ్ కెరీర్ కు ఈ తరహా స్నేహం మంచి బూస్ట్ ఇస్తుందని చెప్పవచ్చు.

మరొక విశేషం ఏమిటంటే, ఎన్టీఆర్ పుట్టిన రోజున "దేవర" చిత్రం నుండి మొదటి పాట విడుదల కానుంది. ఈ చిత్రంపై ఇప్పటికే భారీ అంచనాలు ఉన్నాయి. అలాగే, "వార్ 2" చిత్రంపై కూడా మంచి అంచనాలున్నాయి. రెండు చిత్రాలు కూడా ప్రేక్షకులను ఆకట్టుకుంటాయని అభిమానులు ఆశిస్తున్నారు. ఎన్టీఆర్ తన కెరీర్‌ లో మునుపెన్నడూ లేనంత హై బడ్జెట్ సినిమాలతో ముందుకు సాగుతున్నారు.

RRR వంటి ఘనవిజయం తరువాత ఎన్టీఆర్ ఇప్పుడు బాలీవుడ్ లో తన బలాన్ని మరీంత నిరూపించుకునే విధంగా సన్నద్ధమవుతున్నారు. "దేవర" మరియు "వార్ 2" చిత్రాలతో ఆయన తన స్థాయి మరింత ఎత్తుకు తీసుకెళ్లడం ఖాయం. ఇక స్పెషల్ ఈవెంట్స్ లో పాల్గొనడం, పుట్టినరోజు వేడుకలు, మరియు కొత్త ప్రాజెక్టులు ఎన్టీఆర్ అభిమానులకు మరింత ఉత్సాహం కలిగిస్తున్నాయి.

ఇక దేవర రెండు భాగాలుగా రూపొందుతున్న విషయం తెలిసిందే. కొరటాల శివ దర్శకత్వంలో వస్తున్న ఈ సినిమా మొదటి భాగం అక్టోబర్ 10న విడుదల కానుంది. ఈ సినిమాలో జాన్వీ కపూర్ హీరోయిన్ గా నటిస్తుండగా బాలీవుడ్ స్టార్ నటుడు సైఫ్ అలీ ఖాన్ విలన్ గా కనిపించబోతున్నాడు. మరి సినిమా బాక్సాఫీస్ వద్ద ఎలాంటి సెన్సేషన్ క్రియేట్ చేస్తుందో చూడాలి.