2025 రిప‌బ్లిక్ డే ఎన్టీఆర్ కెరీర్‌కి మ‌రో మైలురాయి

RRR చిత్రంతో పాన్ ఇండియా స్టార్‌గా త‌న‌ని తాను ఆవిష్క‌రించుకున్నాడు యంగ్ టైగ‌ర్ ఎన్టీఆర్. మ‌న్యం వీరుడు కొమ‌రం భీమ్ పాత్ర‌లో అత్య‌ద్భుతంగా న‌టించిన ఎన్టీఆర్ ఇప్పుడు వ‌రుస పాన్ ఇండియా చిత్రాల‌తో బిజీ గా ఉన్నాడు. కొర‌టాల‌తో సినిమా త‌ర్వాత అత‌డు కేజీఎఫ్ డైరెక్ట‌ర్ ప్ర‌శాంత్ నీల్ తో సినిమా చేయాల్సి ఉంది. ఈలోగానే బాలీవుడ్ డెబ్యూ మూవీ వార్ 2 ని పూర్తి చేస్తాడు. తాజా స‌మాచారం మేర‌కు ఈ సినిమాని 2025 రిప‌బ్లిక్ డే కానుక‌గా విడుద‌ల చేయాల‌ని య‌ష్ రాజ్ సంస్థ భావిస్తోంది. మ‌రిన్ని వివ‌రాల్లోకి వెళితే..

హృతిక్ రోషన్ - ఎన్టీఆర్ ప్ర‌ధాన‌పాత్ర‌ల్లో న‌టిస్తున్న 'వార్ 2' ఇండియా మోస్ట్ అవైటెడ్ సినిమాల జాబితాలో ఉన్న సంగ‌తి తెలిసిందే. 2019 బ్లాక్‌బస్టర్ మూవీ సీక్వెల్ కి అయాన్ ముఖర్జీ దర్శకత్వం వహించనున్నారు. మీడియా క‌థ‌నాల ప్రకారం YRF, నిర్మాతలు 2025 రిపబ్లిక్ డే వారాంతంలో ఈ చిత్రాన్ని విడుద‌ల చేయాల‌ని భావిస్తున్న‌ట్టు తెలిసింది. వార్ 2 నవంబర్ 2023 నుండి సెట్స్‌పైకి వెళ్తుంది.

రిపబ్లిక్ డే వీకెండ్ హిందీ చలనచిత్ర పరిశ్రమకు గొప్ప మ‌నీ స్పిన్నర్ అని రుజువు చేస్తోంది. అగ్నిపథ్ లేదా పఠాన్ య‌ష్ రాజ్ బ్యాన‌ర్ నుంచి వ‌చ్చిన భారీ చిత్రాలు ఇదే సీజ‌న్ లో విడుద‌లై కాసుల‌వ‌ర్షం కురిపించాయి. హృతిక్ -YRF ఆదిత్య చోప్రా ఇద్దరూ ఈ తేదీన విజయాన్ని రుచి చూశారు. ఇప్పుడు వార్ 2 కోసం రిపబ్లిక్ డే 2025 విడుదలను పరిశీలిస్తున్నారు. నిజానికి హృతిక్ తదుపరి ఫైటర్ కూడా 2024లో అదే వారాంతంలో విడుదల కానుంది.

ప్ర‌స్తుతానికి వార్ 2 కి ఇది తాత్కాలిక తేదీ అని, దీన్ని దృష్టిలో ఉంచుకుని పనులు పూర్తి చేస్తున్నార‌ని తెలుస్తోంది. నవంబర్‌లో సినిమా సెట్స్‌పైకి వచ్చిన తర్వాత మాత్రమే ఖచ్చితమైన తేదీ లాక్ అవుతుంది. వార్ 2 చిత్రీక‌ర‌ణ స‌మ‌యంలో మధ్యలో ఆలస్యం అయితే తేదీ మారే ఛాన్సుంది. కానీ వంద‌శాతం 2025 రిపబ్లిక్ డే వారాంతంలో విడుద‌ల‌య్యేట్టు ప్లాన్ చేస్తున్నారని తెలుస్తోంది.

గత సంవత్సరం SS రాజమౌళి RRRతో మాస్‌ని ఆకట్టుకున్న పాన్-ఇండియా స్టార్ ఎన్టీఆర్ కి మొదటి బాలీవుడ్ చిత్రం 'వార్ 2'. ప్రీక్వెల్ 'వార్ 1'లో హృతిక్ తో టైగ‌ర్ ష్రాఫ్ న‌టించిన సంగ‌తి తెలిసిందే. ఏక్ థా టైగర్ (2012), టైగర్ జిందా హై (2017), వార్ (2019), పఠాన్ (2023), మరియు టైగర్ 3 (2023) తర్వాత YRF స్పై యూనివర్స్ ఆరవ విడత సినిమాగా 'వార్ 2' ఉంటుంది. వార్ 2 తర్వాత, షారుఖ్ ఖాన్ - సల్మాన్ ఖాన్ నటించ‌నున్న 'టైగర్ VS పఠాన్' థియేటర్లలోకి విడుదలవుతుంది. య‌ష్ రాజ్ బ్యాన‌ర్ అనుకున్న‌ది అనుకున్న‌ట్టు వార్ 2ని రిలీజ్ చేయ‌గ‌లిగితే.. 2025 రిప‌బ్లిక్ డే ఎన్టీఆర్ కెరీర్‌కి మ‌రో మైలురాయిగా మారుతుంద‌న‌డంలో సందేహం లేదు. స్పైయూనివ‌ర్శ్ క‌థ‌ల‌తో రూపొందుతున్న వార్ ఫ్రాంఛైజీలో సంచ‌ల‌న రికార్డుల‌ను సృష్టించే స‌త్తా వార్ 2 కి ఉంద‌నడంలో సందేహం లేదు.