OG రిలీజ్.. మరో న్యూ టార్గెట్!

పవర్ స్టార్ పవన్ కళ్యాణ్ హీరోగా సుజిత్ దర్శకత్వంలో తెరకెక్కుతోన్న సినిమా ఓజీ. పాన్ ఇండియా ప్రాజెక్ట్ గా ఈ చిత్రాన్ని డివివి దానయ్య నిర్మిస్తున్నారు. ఇప్పటికే సగం షూటింగ్ కంప్లీట్ అయ్యింది. వారాహి యాత్రకి ముందు పవన్ కళ్యాణ్ కీలకమైన ఎపిసోడ్స్ కంప్లీట్ చేశారు. తరువాత రాజకీయాలలో బిజీగా ఉండటంతో పూర్తిస్థాయిలో డేట్స్ ని ఓజీ కోసం పవన్ అడ్జస్ట్ చేయలేకపోతున్నారు.

అయితే సుజిత్ మిగిలిన క్యాస్టింగ్ కి సంబందించిన సన్నివేశాలు రెండు షెడ్యూల్స్ తెరకెక్కించారు. పవన్ కళ్యాణ్ కాల్ షీట్స్ ఇస్తే అతనికి సంబందించిన అన్ని సీక్వెన్స్ పూర్తి చేయాలని భావిస్తున్నారు. ప్రస్తుతం వారాహి యాత్ర మూడో విడత జరుగుతోంది. దీని తర్వాత సెప్టెంబర్ లో ఓజీ కోసం కాల్ షీట్స్ ఇచ్చే అవకాశం ఉందనే మాట వినిపిస్తోంది. అయితే అది ఎంత వరకు సాధ్యమవుతుందనేది చెప్పలేని పరిస్థితి.

నిజానికి ఓజీ సినిమాని వేగంగా కంప్లీట్ చేసి డిసెంబర్ లో రిలీజ్ చేయాలని సుజిత్ ప్లాన్ చేసుకున్నారు. దాని ప్రకారమే బ్యాక్ టూ బ్యాక్ షెడ్యూల్స్ లో షూటింగ్ చేశారు. అయితే సడెన్ గా పవన్ కళ్యాణ్ వారాహి యాత్ర మొదలు పెట్టారు. ఓ 30 రోజులు కాల్ షీట్స్ పవన్ కళ్యాణ్ ఇస్తే పూర్తి చేసేయాలని సుజిత్ భావిస్తున్నారు. ఇదిలా ఉంటే ఓజీ రిలీజ్ డేట్ ని వాయిదా వేసే ఆలోచనలో చిత్ర యూనిట్ ఉన్నట్లు ప్రచారం జరుగుతోంది.

డిసెంబర్ లో రిలీజ్ సాధ్యం కాకుంటే ఏప్రిల్ లో మూవీని ప్రేక్షకులని ఎట్టి పరిస్థితిలో అందించాలని అనుకుంటున్నారు. ఆ నెలలో సమ్మర్ సీజన్ మొదలవుతుంది కాబట్టి ప్రేక్షకులని ఎక్కువగా థియేటర్స్ కి రప్పించవచ్చని అనుకుంటున్నారంట. అదే నెలలో జూనియర్ ఎన్టీఆర్ దేవర మూవీ కూడా రిలీజ్ కానుంది. ఏప్రిల్ 4న దేవర సినిమా రిలీజ్ చేస్తున్నట్లు ఇప్పటికే ప్రకటించారు. దీంతో ఆ చిత్రానికి పోటీగా ఓజీ మూవీ వచ్చే అవకాశం ఉందా అనే డౌట్ కలుగుతుంది.

ఒక వేళ ఓజీ రిలీజ్ ఏప్రిల్ కి వాయిదా పడితే హరీష్ శంకర్ దర్శకత్వంలో పవన్ కళ్యాణ్ చేయబోయే ఉస్తాద్ భగత్ సింగ్ మరింత ఆలస్యం అయ్యే అవకాశం ఉందనే మాట వినిపిస్తోంది. హరీష్ శంకర్ అయితే సంక్రాంతికి ఉస్తాద్ భగత్ సింగ్ రిలీజ్ చేయాలని అనుకుంటున్నారు. కానీ ఈ మూవీ షూటింగ్ 30 శాతం మాత్రమే ఇంకా కంప్లీట్ అయ్యింది. పవన్ కళ్యాణ్ పొలిటికల్ జర్నీ కారణంగా ఈ చిత్రం షూటింగ్ కూడా లేట్ అయ్యేలానే ఉందని చెప్పొచ్చు.