ఆపరేషన్ వాలెంటైన్.. ఫైనల్ స్ట్రైక్ సిద్ధం

మెగా ప్రిన్స్ వరుణ్ తేజ్.. గట్టి కమ్ బ్యాక్ ఇవ్వడానికి సుమారు మూడేళ్లుగా ఎదురుచూస్తున్నారు. గత ఏడాది ఆయన నటించిన గాండీవధారి అర్జున చిత్రం ఫ్లాప్ గా మిగిలింది. ప్రస్తుతం వరుణ్ ఆపరేషన్ వాలెంటైన్ మూవీ చేస్తున్న విషయం తెలిసిందే. ఇండియన్ ఎయిర్ ఫోర్స్ బ్యాక్ డ్రాప్ లో హిస్టారికల్ యాక్షన్ థ్రిల్లర్ గా తెరకెక్కుతోంది ఈ చిత్రం. మార్చి 1వ తేదీన ప్రేక్షకుల ముందుకు రానుంది.

టీజర్ రిలీజ్ తర్వాత ఈ సినిమాపై మంచి బజ్ క్రియేట్ అయింది. ఇక మేకర్స్ కూడా ఓ రేంజ్ లో ప్రమోషన్లు నిర్వహిస్తున్నారు. ఇటీవల పుల్వామా ప్రాంతానికి వెళ్లి అమరులైన 40 మంది సీఆర్పీఎఫ్ జవాన్లకు నివాళులు అర్పించారు. అంతకుముందు ఓ సాంగ్ ను ఆర్మీ అధికారుల సమక్షంలో రిలీజ్ చేశారు. తాజాగా మరో క్రేజీ అప్డేట్ తో ముందుకొచ్చారు మేకర్స్.

ఆపరేషన్ వాలెంటైన్ ట్రైలర్ ను మరో రెండు రోజుల్లో విడుదల చేయనున్నట్లు ప్రకటించారు. ఫిబ్రవరి 20వ తేదీన ఫైనల్ స్ట్రైక్ రిలీజ్ చేస్తున్నట్లు మేకర్స్ తెలిపారు. ఈ అప్డేట్ తోపాటు రివీల్ చేసిన స్పెషల్ పోస్టర్.. సినిమాపై క్యూరియాసిటీని మరింత పెంచుతోంది. అందులో వరుణ్ ఇంటెన్స్ లుక్ లో కనిపించారు. పోస్టర్ బాటమ్ లో సముద్రంతోపాటు ఫైటర్ జెట్ ను చూపించారు. ఇక ట్రైలర్ విడుదలైన తర్వాత సినిమాపై అంచనాలు మరింత పెరిగే అవకాశం ఉన్నట్లు కనిపిస్తోంది.

టెర్రరిస్ట్ ఎటాక్ కు రివెంజ్ గా భారత్ భారీ వైమానిక దాడులు చేయడం చుట్టూ ఈ సినిమా స్టోరీ ఉండనున్నట్లు సమాచారం. ఇండియన్ ఎయిర్ ఫోర్స్ ఆఫీసర్‌ గా నటిస్తున్న వరుణ్ తేజ్.. ఈ సినిమాతో బాలీవుడ్ లోకి అడుగుపెడుతున్నారు. మరోవైపు, బాలీవుడ్ నటి మానుషి చిల్లర్.. ఈ చిత్రంతో టాలీవుడ్ లోకి ఎంట్రీ ఇస్తోంది. తెలుగు, హిందీలో ఒకేసారి రూపొందుతున్న ఈ సినిమాకు శక్తి ప్రతాప్ సింగ్ దర్శకత్వం వహిస్తున్నారు.

ఈ సినిమాతోనే దర్శకుడిగా శక్తి ప్రతాప్ పరిచయం అవుతుండగా.. సాయి మాధవ్ బుర్రా డైలాగ్స్ అందించారు. ఈ మూవీలో మిర్ సర్వార్, నవదీప్ కీలక పాత్రల్లో నటిస్తున్నారు. మిక్కీ జె మేయర్ ఈ చిత్రానికి సంగీతం అందిస్తున్నారు. కంటెంట్ పై మూవీ యూనిట్ ఫుల్ కాన్ఫిడెంట్ గా ఉందట. మరి ఈ సినిమా వరుణ్ కు ఎలాంటి విజయం అందిస్తుందో చూడాలి.