OSCARS 2024: ఉత్తమ నటుడు మర్ఫీ.. ఉత్తమ దర్శకుడు నోల‌న్
రాబర్ట్ డౌనీ జూనియర్ ఓపెన్‌హైమర్‌లో తన పాత్రకు ఉత్తమ సహాయ నటుడు అకాడమీ అవార్డును గెలుచుకోవ‌డంతో .. ఇది తన కెరీర్ లో మొదటి ఆస్కార్ గా రికార్డుల‌కెక్కింది.
By: Tupaki Desk | 11 March 2024 4:26 AM GMT
96వ అకాడమీ అవార్డులను జూరీ ప్ర‌క‌టించింది. ఆస్కార్స్ 2024లో ఊహించిన విధంగానే క్రిస్టోఫ‌ర్ నోలాన్ ఓపెన్‌హైమర్ పెద్ద విజయాన్ని అందుకుంది. ఉత్తమ నటుడు, ఉత్తమ చిత్రం, ఉత్తమ దర్శకుడు, ఉత్తమ ఒరిజినల్ స్కోర్, ఉత్తమ సినిమాటోగ్రఫీ, ఉత్తమ చలనచిత్ర ఎడిటింగ్ సహా ఏడు అవార్డులను కైవసం చేసుకుంది. సిలియన్ మర్ఫీ -రాబర్ట్ డౌనీ జూనియర్ ఈ చిత్రంలో వారి పాత్రలకు ఉత్తమ నటుడు , ఉత్తమ సహాయ నటుడి విభాగాలకు అకాడమీ అవార్డును గెలుచుకున్నారు. అదే సమయంలో ఎమిలీ బ్లంట్ ఉత్తమ సహాయ నటి విభాగంలో నామినేట్ అయింది. ది హోల్డోవర్స్‌లో పాత్రకు గాను డావిన్ జాయ్ రాండోల్ఫ్ ఈ విభాగంలో గెలుపొందారు.
సిలియన్ మర్ఫీ తన భార్య వైవోన్నే మెక్‌గిన్నిస్‌తో కలిసి 96వ అకాడమీ అవార్డులకు వచ్చారు. 2024 ఆస్కార్ రెడ్ కార్పెట్ వేదిక‌పై ఆధునిక ప్లీటెడ్ వైట్ షర్ట్ , హై-వెయిస్ట్ బ్లాక్ స్ట్రెయిట్-ఫిట్టెడ్ ప్యాంట్‌.. శాటిన్ నాచ్ లాపెల్‌తో టైలర్డ్ బ్లేజర్ లో తో స్టైల్ ఐక‌న్ ని త‌ల‌పించాడు.
రాబర్ట్ డౌనీ జూనియర్ ఓపెన్‌హైమర్‌లో తన పాత్రకు ఉత్తమ సహాయ నటుడు అకాడమీ అవార్డును గెలుచుకోవ‌డంతో .. ఇది తన కెరీర్ లో మొదటి ఆస్కార్ గా రికార్డుల‌కెక్కింది. రాబర్ట్ తన భార్య సుసాన్ డౌనీతో కలిసి రెడ్ కార్పెట్ మీదికి వచ్చాడు. ఒపెన్‌హైమర్ లో అత్యుత్త‌మ న‌ట‌న‌కు గాను ఉత్తమ సహాయ నటి విభాగంలో నామినేట్ అయిన ఎమిలీ బ్లంట్, ఆస్కార్ 2024 రెడ్ కార్పెట్‌లో షియాపరెల్లి నుండి అద్భుతమైన కస్టమ్ డ్రెస్‌లో క‌నిపించింది. తన భర్త జాన్ క్రాసిన్స్కితో కలిసి అకాడమీ అవార్డ్స్‌కు హాజ‌రైంది.
ఉత్తమ ఒరిజినల్ సాంగ్:
ఉత్తమ ఒరిజినల్ సాంగ్ కేట‌గిరీలో గత ఏడాది ఆర్.ఆర్.ఆర్ నాటు నాటు అవార్డును కొల్ల‌గొట్టిన సంగ‌తి తెలిసిందే. 2024 ఆస్కార్స్ లో ఉత్తమ ఒరిజినల్ సాంగ్ కేట‌గిరీలో 'బార్బీ' సాంగ్ 'వాటీజ్ ఐ మేడ్ ఫ‌ర్' గెలుపొందింది. బిల్లీ ఐలిష్ ఈ పాట‌ను పాడ‌గా, ఫిన్నియాస్ ఒకానెల్ ర‌చించారు.
