పవన్ కళ్యాణ్ మూవీ దీపావళి ప్రామిస్‌ బ్రేక్‌...!
పవన్ కళ్యాణ్ రాజకీయాల్లో ఉన్నా సినిమాలు చేయాలని కోరుకునే వారు చాలా మంది ఉంటారు. వారందరి కోసం ఈ సినిమా నుంచి దీపావళి కానుక వస్తుందని అంతా భావించారు.
By: Tupaki Desk | 30 Oct 2024 6:11 AM GMT
పవన్ కళ్యాణ్ పూర్తిగా రాజకీయాలు, పరిపాలనపై దృష్టి పెట్టారు. అయితే ఆయన మొదలు పెట్టిన సినిమాలను పూర్తి చేసే బాధ్యతను సైతం నెత్తికి ఎత్తుకున్నారు. హరిహర వీరమల్లు, ఓజీ సినిమాలు షూటింగ్‌ ముగింపు దశలో ఉన్నాయి. కనుక తప్పనిసరి పరిస్థితుల్లో ఆ సినిమాలను పూర్తి చేయాలనే ఉద్దేశ్యంతో ఏదో ఒక సమయంలో వాటికి డేట్లు కేటాయిస్తున్నారు. ఇటీవల హరి హర వీరమల్లు సినిమా కోసం డేట్లు ఇచ్చిన పవన్ కళ్యాణ్ దీపావళి పండుగ తర్వాత ఓజీ సినిమా కోసం డేట్లు ఇచ్చేందుకు ఓకే చెప్పారని సమాచారం అందుతోంది. మొత్తానికి ఉప ముఖ్యమంత్రిగా ఉండి కూడా సినిమాలు చేస్తూ ఉన్నారు.
ఈ దీపావళికి హరి హర వీరమల్లు సినిమా నుంచి ఫస్ట్‌ సింగిల్‌ను విడుదల చేస్తాం అంటూ కొన్ని రోజుల క్రితం చిత్ర యూనిట్‌ సభ్యులు ప్రకటించారు. కానీ ఇప్పటి వరకు ఎలాంటి అప్‌డేట్‌ లేదు. దీపావళికి మరికొన్ని గంటల సమయం మాత్రమే ఉంది. కనుక హరిహర వీరమల్లు సినిమా నుంచి ఎలాంటి అప్‌డేట్‌ ఉండదని కన్ఫర్మ్‌ అయింది. పెద్ద ఎత్తున అంచనాలు ఉన్న ఈ సినిమా నుంచి మొదటి పాట కోసం ఎంతో ఆసక్తిగా అభిమానులు ఎదురు చూశారు. కానీ చివరకు చిన్న అప్‌డేట్‌ కూడా లేకుండానే పాట విడుదల తేదీని మార్చేశారనే వార్తలు వస్తున్నాయి.
పవన్ కళ్యాణ్ రాజకీయాల్లో ఉన్నా సినిమాలు చేయాలని కోరుకునే వారు చాలా మంది ఉంటారు. వారందరి కోసం ఈ సినిమా నుంచి దీపావళి కానుక వస్తుందని అంతా భావించారు. కానీ నిర్మాణ సంస్థ మాట మార్చేసింది. ఇప్పట్లో సినిమా విడుదల ఉండే పరిస్థితి లేదు, అలాగే పాటను సైతం విడుదల చేసే అవకాశం లేదు అంటూ యూనిట్‌ సభ్యులు అనధికారికంగా చెబుతున్నారు. పాట విషయంలో పవన్ కళ్యాణ్ నుంచి గ్రీన్‌ సిగ్నల్‌ రాలేదని, అంతే కాకుండా రికార్డింగ్‌ సైతం పూర్తి అవ్వలేదు అంటూ సమాచారం అందుతోంది.
క్రిష్ మొదలు పెట్టిన హరి హర వీరమల్లు సినిమా షూటింగ్‌ ఆలస్యం అవ్వడంతో చేతులు మారింది. క్రిష్ చేతి నుంచి ఇప్పుడు జ్యోతి కృష్ణ చేతికి ఈ ప్రాజెక్ట్‌ వెళ్లింది. రెండు పార్ట్‌లుగా రాబోతున్న హరిహర వీరమల్లు సినిమాను భారీ విజువల్‌ వండర్‌గా రూపొందించాలనే ఉద్దేశ్యంతో ప్రముఖ వీఎఫ్‌ఎక్స్‌ కంపెనీతో వర్క్‌ చేయిస్తున్నారని వార్తలు వస్తున్నాయి. మరో వైపు సాహో సుజీత్‌ దర్శకత్వంలో ఓజీ సినిమాను పవన్ కళ్యాణ్ చేస్తున్నాడు. హరి హర వీమల్లు సినిమాలో పవన్ కి జోడీగా నిధి అగర్వాల్‌ హీరోయిన్‌గా నటిస్తూ ఉండగా, ఓజీ సినిమాలో పవన్ కి జోడీగా ప్రియాంక అరుల్‌ మోహన్ హీరోయిన్‌గా నటిస్తున్న విషయం తెల్సిందే.
