పవన్ కళ్యాణ్ నుంచి నెక్స్ట్ వచ్చే సినిమా అదేనా?

జనసేనాని పవన్ కళ్యాణ్ ఓవైపు రాజకీయాల్లో కొనసాగుతూనే, మరోవైపు సినిమాల్లో నటిస్తున్నారు. ఆంధ్రప్రదేశ్ ఉప ముఖ్యమంత్రిగా బాధ్యతలు చేపట్టిన తర్వాత, పవన్ సినిమాలు ఎప్పుడు కంప్లీట్ అవుతాయనేది చెప్పలేని పరిస్థితులు ఏర్పడ్డాయి. అయితే కాస్త లేట్ అయినా ఆల్రెడీ కమిటైన సినిమాలను పూర్తి చెయ్యాలని నిర్ణయించుకున్నారు. తనకు వీలుగా సెట్స్ ఏర్పాటు చేసుకొని, షూటింగ్స్ ప్లాన్ చేసుకుంటూ వస్తున్నారు. అయితే పవన్ నటిస్తున్న రెండు చిత్రాల్లో, ఏది ముందుగా ప్రేక్షకుల ముందుకు వస్తుందనేది క్లారిటీ రావడం లేదు.

క్రిష్ జాగర్లమూడి దర్శకత్వంలో పవన్ కళ్యాణ్ హీరోగా ప్రారంభమైన సినిమా 'హరి హర వీరమల్లు'. ఈ చిత్రాన్ని ఇప్పుడు డైరెక్టర్ జ్యోతి కృష్ణ టేకాఫ్ చేస్తున్నారు. మరోపక్క సుజీత్ దర్శకత్వంలో OG మూవీలో నటిస్తున్నారు పవన్. ఎన్నికల నేపథ్యంలో షూటింగ్ హోల్డ్ లో పెట్టిన ఈ రెండు ప్రాజెక్ట్స్.. ఇటీవలే తిరిగి సెట్స్ మీదకు వచ్చాయి. పవన్ డేట్స్ ఇవ్వడంతో వీరమల్లు మూవీలో యాక్షన్ సీక్వెన్స్ ను షూట్ చేసారు. అలానే రామోజీ ఫిలిం సిటీలో ఓజీ సినిమాలో కీలకమైన సన్నివేశాలను చిత్రీకరించారు. ఈ రెండు చిత్రాలను వచ్చే ఏడాది సమ్మర్ లో రిలీజ్ చేస్తామని ప్రకటించడంతో అభిమానులు అయోమయంలో పడ్డారు.

గతంలో OG మూవీని వచ్చే ఏడాది మార్చిలో ప్రేక్షకుల ముందుకు తీసుకురానున్నట్లు డీవీవీ ఎంటర్టైన్మెంట్స్ నుంచి ఓ పోస్టర్ వచ్చింది. ఆ తరువాత 'హరి హర వీరమల్లు' పార్ట్-1 చిత్రాన్ని ఉగాది కానుకగా 2025 మార్చి 28న వరల్డ్ వైడ్ గా విడుదల చేయనున్నట్లు మెగా సూర్య నిర్మాత ఏఎం రత్నం అఫీషియల్ గా అనౌన్స్ చేసారు. రెండు టీమ్స్ పోటాపోటీగా ఎక్స్ లో హెడర్లు మారుస్తుండటంతో.. రెండిటిలో ఏ సినిమాని సమ్మర్‌లో రిలీజ్ చేస్తారో, దేన్ని వాయిదా వేస్తారనేది తెలియడం లేదు. అయితే జనసేనాని ప్రజాసేవలో బిజీగా ఉంటూ సినిమాలు చేయడమే ఎక్కువ అని, అవి ఎప్పుడు రిలీజైనా మంచి విజయం సాధిస్తాయని ఓ వర్గం ఫ్యాన్స్ నమ్ముతున్నారు.

'హరి హర వీరమల్లు' అనేది హిస్టారికల్ యాక్షన్ అడ్వెంచర్ మూవీ. భారీ మొత్తంలో సీజీ వర్క్ చేయాల్సిన అవసరం ఉంది. ఇది పవన్ కళ్యాణ్ కెరీర్ లోనే భారీ బడ్జెట్ తో రూపొందిస్తున్న సినిమా. షూటింగ్ కంప్లీట్ చేసిన తర్వాత పోస్ట్ ప్రొడక్షన్ మీద ఎక్కువ ఫోకస్ పెట్టాల్సి ఉంటుంది. OG ఒక యాక్షన్ థ్రిల్లర్. పవన్ రెండు వారాల డేట్స్ ఇస్తే చాలు, షూటింగ్ అంతా పూర్తవుతుంది. ఇండస్ట్రీ వర్గాల్లో ఇప్పుడు వినిపిస్తున్న టాక్ ప్రకారం, ఓజీ సినిమానే ముందుగా థియేటర్లలోకి వస్తుందని తెలుస్తోంది.

ప్రస్తుతానికైతే 'హరి హర వీరమల్లు', ఓజీ సినిమాల చిత్రీకరణను ఈ ఏడాది చివరిలోపు పూర్తి చేయాలని భావిస్తున్నారు పవన్ కళ్యాణ్. ఆ తర్వాతే విడుదల తేదీలపై ఓ నిర్ణయం తీసుకుంటారు. ఇదే క్రమంలో అప్పుడెప్పుడో అనౌన్స్ చేయబడిన 'ఉస్తాద్ భగత్ సింగ్' సినిమాకి కూడా పవన్ డేట్స్ ఇచ్చే అవకాశం ఉందని టాక్ నడుస్తోంది. హరీష్ శంకర్ దర్శకత్వంలో ఇప్పటికే ఈ సినిమా రెండు షెడ్యూల్స్ షూటింగ్ కూడా జరుపుకుంది. మైత్రీ మూవీ మేకర్స్ నిర్మిస్తున్న ఈ మూవీ షూటింగ్ త్వరలోనే తిరిగి ప్రారంభం కానుందని అంటున్నారు. దీనిపై మేకర్స్ అధికారిక ప్రకటన చేస్తారేమో చూడాలి.