పవన్ కళ్యాణ్.. మళ్ళీ అది రిపీట్ కానుందా?

పవన్ కళ్యాణ్.. గత కొద్ది రోజులుగా ఈ పేరు సోషల్ మీడియాలో ట్రెండింగ్ అవుతూనే ఉంది. ఎక్కడ చూసినా ఆయనకు సంబంధించిన పోస్టులే కనిపిస్తున్నాయి. అందుకు కారణమేంటో అందరికీ తెలిసిందే. ఆంధ్రప్రదేశ్ అసెంబ్లీ ఎన్నికల్లో పిఠాపురం నుంచి పోటీ చేసి భారీ మెజార్టీతో గెలిచారు పవన్. అంతే కాదు రాష్ట్రంలో టీడీపీ- జనసేన- బీజేపీ కూటమి అధికారంలోకి రావడంలో కీలక పాత్ర పోషించారాయన.

ఆ తర్వాత రీసెంట్ గా పాత పార్లమెంట్ బిల్డింగ్ లో జరిగిన ఎన్డీఏ పక్షాల సమావేశంలో పవన్ ను ప్రధాని నరేంద్ర మోదీ తుఫానుతో పోల్చారు. దీని ద్వారా పవన్ క్రేజ్ నేషనల్ వైడ్ గా ఎంతలా పెరిగిందో అర్థమవుతోంది. ఇక పవన్ అప్ కమింగ్ మూవీస్ కోసం ఇప్పుడు చర్చ జరుగుతోంది. ఆయన చేతిలో ఉన్న ఉస్తాద్ భగత్ సింగ్, హరిహర వీరమల్లు, ఓజీ సినిమాల ప్రీ రిలీజ్ బిజినెస్ ఓ రేంజ్ లో జరుగుతుందని ఇప్పటికే సినీ పండితులు అంచనా వేశారు.

అయితే ఈ సినిమాల అప్డేట్లు రిలీజ్ అయిన సమయంలో ఓ విషయం గమనించారా? పవన్ కళ్యాణ్ పేరు ముందు ఎక్కడా పవర్ స్టార్ ట్యాగ్ కనిపించదు. అందుకు కారణం కూడా పవన్ కళ్యాణే. తన సినిమాల విషయంలో పేరు ముందు ట్యాగ్ వేసుకోవడం ఇష్టం లేదని ఆయన చెప్పడంతో.. మేకర్స్ వేయడం మానేశారు. అంతే కాదు పవన్ సూపర్ హిట్ మూవీ భీమ్లా నాయక్.. సినిమా పోస్టర్లపై కూడా పవర్ స్టార్ ట్యాగ్ లేదు.

బద్రి సినిమా నుంచి వకీల్ సాబ్ మూవీ వరకు కంటిన్యూ అయిన పవర్ స్టార్ ట్యాగ్.. పవన్ అప్ కమింగ్ మూవీస్ లో మళ్లీ కనిపించబోతున్నట్లు తెలుస్తోంది. ఎందుకంటే.. ఇప్పుడు సినిమాలతో పాటు రాజకీయాల్లో కూడా పవర్ స్టార్ గా మారారు పవన్. అందుకే ఆయన చేతిలో ఉన్న చిత్రాలతో పాటు నెక్స్ట్ సినిమాల్లో పవర్ స్టార్ ట్యాగ్ కచ్చితంగా కనిపించనున్నట్లు సమాచారం. ప్రస్తుతం ఈ విషయం సోషల్ మీడియాలో వైరల్ గా మారింది.

మరోవైపు, పవన్.. మరికొద్ది రోజుల్లో డిప్యూటీ ముఖ్యమంత్రిగా ప్రమాణ స్వీకారం చేయనున్నట్లు వార్తలు వస్తున్నాయి. ఆ తర్వాత కాస్త గ్యాప్ తీసుకుని.. తొలుత సుజిత్ తెరకెక్కిస్తున్న ఓజీ సెట్స్ లో అడుగు పెట్టనున్నట్లు సమాచారం. ఈ మూవీ కంప్లీట్ అయిన తర్వాత మిగతా ప్రాజెక్టులను పూర్తి చేయనున్నారని టాక్ వినిపిస్తోంది. మరి పవన్ పేరు ముందు మళ్లీ పవర్ స్టార్ ట్యాగ్ పడుతుందా లేదా అనేది తెలియాలంటే వెయిట్ అండ్ సీ.