సప్తగిరి 'పెళ్లి కాని ప్రసాద్'.. రెడ్ బుక్ 'శాసనాల గ్రంథం'

టాలీవుడ్‌లో తనకంటూ ప్రత్యేకమైన కామెడీ టాలెంట్‌తో గుర్తింపు తెచ్చుకున్న సప్తగిరి, కొంత గ్యాప్ తర్వాత మళ్లీ తన స్టైల్‌లో ప్రేక్షకులను అలరించడానికి సిద్దమవుతున్నాడు. ఆయన కొత్త సినిమా పెళ్లి కాని ప్రసాద్ పేరుతో త్వరలోనే థియేటర్లలో సందడి చేయబోతుంది. అభిలాష్ రెడ్డి గోపిడి దర్శకత్వంలో రూపొందిన ఈ సినిమాను కే.వై. బాబు, భాను ప్రకాష్ గౌడ్, సుక్క వెంకటేశ్వర్ గౌడ్, వైభవ్ రెడ్డి ముత్యాల సంయుక్తంగా నిర్మిస్తున్నారు.

ఈ సినిమా మార్చి 21న గ్రాండ్‌గా రిలీజ్ కాబోతోందని ఇప్పటికే మేకర్స్ అధికారికంగా ప్రకటించారు. ఈ సినిమాను ప్రముఖ నిర్మాణ సంస్థ శ్రీ వెంకటేశ్వర క్రియేషన్స్ (దిల్ రాజు) విడుదల చేస్తుండడం మరో విశేషం. దిల్ రాజు బ్యానర్ నుంచి సినిమా రిలీజ్ అవుతుందంటే, ఆ సినిమాపై ప్రేక్షకులలో కూడా ఓ నమ్మకం పెరుగుతుందని చెప్పవచ్చు.

ఇప్పుడు మేకర్స్ రిలీజ్ చేసిన ఫస్ట్ లుక్ పోస్టర్ చూస్తే ఆ నమ్మకానికి మరింత బలం చేకూరుతోందని చెప్పడంలో ఎలాంటి అతిశయోక్తి లేదు. పెళ్లి కాని ప్రసాద్ ఫస్ట్ లుక్‌లో సప్తగిరి 20 రూపాల్లో కనిపిస్తున్నాడు. ఒక్కో ఎక్స్‌ప్రెషన్ ఒక్కోలా.. కంగారు, ఆశ్చర్యం, కోపం, గందరగోళం, సంతోషం ఇలా అన్ని మూడ్స్‌లో అతను కనిపించడం ఆసక్తిని పెంచింది.

కమెడియన్ గా తనకు ఉన్న స్కిల్‌ను మరోసారి ప్రూవ్ చేసుకునేలా ఈ పోస్టర్ డిజైన్ చేశారు. ఇక, అతని చేతిలో ఉన్న శాసనాల గ్రంథం అనే రెడ్ బుక్ మరింత క్యూరియాసిటీని క్రియేట్ చేస్తోంది. రెడ్ బుక్ అంటే ప్రస్తుతం ఎపి పాలిటిక్స్ లో ఎంతగా వైరల్ అవుతుందో ప్రత్యేకంగా చెప్పనవసరం లేదు. ఆ పుస్తకం పేరు చూస్తే, సినిమాలో మంచి ఫన్ దాగి ఉందని స్పష్టంగా అర్థమవుతోంది.

పెళ్లి కోసం ఎన్ని ఇబ్బందులు పడుతాడో, వాటిని ఎలా పరిష్కరిస్తాడో అన్నది కథలో కీలకం కానుందని మోషన్ పోస్టర్ చూస్తే అర్థమవుతోంది. ఇప్పటి వరకు సప్తగిరి తన కామెడీ టైమింగ్ డైలాగ్‌లతో ఆడియెన్స్‌ను ఎంటర్‌టైన్ చేసాడు. కానీ ఈసారి కేవలం కామెడీ కాదు, క్యారెక్టర్‌లో మల్టిపుల్ షేడ్స్‌ను చూపిస్తూ, నటుడిగా తనలోని కొత్త కోణాన్ని చూపించబోతున్నాడని అర్ధమవుతుంది. మొత్తానికి, పెళ్లి కాని ప్రసాద్ ఫస్ట్ లుక్ కంటెంట్ బలంగా ఉందని ప్రూవ్ చేస్తోంది. సప్తగిరి అభిమానులు, కామెడీ లవర్స్ కోసం ఈ సినిమా పక్కా ఎంటర్‌టైనర్ కానుందనడం లో సందేహం లేదు. మరి ఈసారి సప్తగిరి ఎలాంటి సక్సెస్ ను అందుకుంటాడో చూడాలి.