రెమ్యునరేషన్ తగ్గించినా సినిమాలు రావడంలేదా?

టాలీవుడ్‌లో స్టార్ హీరోలందరితోనూ నటించిన పూజా హెగ్డే, ఒకప్పుడు టాప్ హీరోయిన్లలో ఒకరుగా రాణించింది. అయితే, ఆ తరువాత వరుసగా వచ్చిన ఫ్లాపులు ఆమె కెరీర్‌కు గట్టి దెబ్బ కొట్టాయి. ఇటీవల పలు చిత్రాల్లో నటించినా, బాక్సాఫీస్ వద్ద మంచి ఫలితాలు రాకపోవడంతో పూజా కెరీర్‌కి బ్రేక్ పడింది. అలాగే పలు చిత్రాల నుంచి ఆఫర్లు వచ్చినప్పటికీ, ఆమె భారీ రెమ్యునరేషన్ అడగడం వల్ల నిర్మాతలు ఆమెతో సినిమాలు చేయడానికి వెనుకంజ వేశారు.

గతంలో పూజా హెగ్డే తన సినిమా షూటింగ్ సమయంలో చేసిన డిమాండ్లు కూడా కొన్ని సమస్యలకు కారణమయ్యాయని టాక్ వచ్చింది. ఆమె స్టాఫ్ కూడా పెద్ద మొత్తంలో పే కోరడం, స్టార్ హోటల్ లో ఉండటం వంటి వివిధ విషయాల్లో నిర్మాతలను ఇబ్బందులకు గురి చేసినట్లు కథనాలు వెలువడ్డాయి. పూజా అప్పుడు పెద్ద స్టార్ హీరోయిన్ గా ఉండటంతో, నిర్మాతలు ఈ ఖర్చులను భరించాల్సిన పరిస్థితి ఏర్పడింది.

కానీ, ఆ తరువాత వరుసగా వచ్చిన ఫ్లాపులతో పూజా ఇమేజ్ కాస్త తగ్గింది. దీని వల్ల ఆమెకు పెద్దగా ఆఫర్లు రావడం ఆగిపోయింది. టాలీవుడ్ లో పూజా హెగ్డే స్థానంలో పలు యంగ్ హీరోయిన్లు వచ్చి అవకాశాలు దక్కించుకుంటున్నారు. కొన్ని సినిమాల్లో ఆమెను యంగ్ హీరోయిన్‌లతో రీప్లేస్ చేశారు. ఇక పూజా హెగ్డేకు ఆశించినంత పెద్ద ప్రాజెక్టులు కుదరడం లేదనుకున్న కారణంగా, ఆమె తన రెమ్యునరేషన్ తగ్గించుకోవాలని నిర్ణయం తీసుకుందట.

ప్రస్తుతం కోలీవుడ్ స్టార్ విజయ్ తో సినిమా చేసేందుకు పూజా తక్కువ రెమ్యునరేషన్ తీసుకుంటున్నట్లు తెలుస్తోంది. ఇది ఆమె సాధారణంగా తీసుకునే పారితోషకం కంటే దాదాపు అర్థం వరకు తక్కువే అని తెలుస్తోంది. అయితే, రెమ్యునరేషన్ తగ్గించినా కూడా, పూజా హెగ్డేకు టాలీవుడ్‌లో పెద్దగా ఆఫర్లు రావడం లేదు. తెలుగు సినీ పరిశ్రమలో నిర్మాతలు ఆమెను కథానాయికగా సెలెక్ట్ చేయడానికి ఆసక్తి చూపడం లేదు.

ఈ నేపథ్యంలో పూజా మళ్ళీ టాలీవుడ్ లో తిరిగి అవకాశాలు పొందాలని చూస్తున్నప్పటికీ, ఆమెకు పెద్దగా ప్రాజెక్టులు రావడం లేదు. ఇప్పటికైనా పూజా తన కెరీర్‌పై కాస్త దృష్టి పెట్టి, కొత్త కథలకు అవకాశం ఇవ్వాలని భావిస్తోంది. పూజా హెగ్డేకు ప్రస్తుతం కోలీవుడ్‌లో, బాలీవుడ్‌లో పలు ప్రాజెక్టులు ఉన్నా, టాలీవుడ్ లో మాత్రం ఆమెకు ఆశించిన స్థాయిలో అవకాశాలు దక్కడం లేదు. టాలీవుడ్ లో మళ్ళీ సక్సెస్ అందుకోవాలంటే, పూజా మరో మంచి హిట్ కొట్టాల్సిందే.