పోస్ట‌ర్ టాక్: ప‌వ‌ర్‌ఫుల్ కాప్ స్పెష‌ల్ ఆప‌రేషన్?

బాహుబలి - ఎవ్వరికీ చెప్పొద్దు సినిమాలతో ప్రేక్షకులకి సుపరిచితులైన న‌టుడు రాకేష్ వర్రే ఎప్పుడూ ప్రయోగాత్మక పాత్రలనే ఎంచుకుంటున్నారు. కొద్దిరోజుల క్రితం 'జితేందర్ రెడ్డి' అనే పేరుతో హీరో ఎవరో తెలియకుండా పోస్టర్లు రిలీజ్ చేశారు. పోస్టర్లు చూడడానికి చాలా ప‌వ‌ర్‌ఫుల్‌గా ఉన్నప్పటికి అందులో ఉన్న కథానాయకుడు ఎవరు? అసలు టైటిల్ లో ఉన్న ఈ జితేందర్ రెడ్డి ఎవరు? అనేది చర్చనీయాంశం అయ్యింది.

ఒక వ్యక్తి కొంద‌రు జనాల ముందు కూర్చుని నాయకుడు శైలిలో కనిపిస్తాడు. అత‌డితో పాటు ఒక పాప ఆ పోస్ట‌ర్ లో క‌నిపించింది. కానీ ఆ పోస్టర్ లో కూడా హీరో ఎవరు అనేది తెలియలేదు. ఆ పోస్టర్ తో అసలు ఆ పాత్ర చెయ్యబోతున్న హీరో ఎవరు?, ఎందుకు అతన్ని దాచారు? అని రకరకాల సందేహాలు వ్య‌క్త‌మ‌య్యాయి. మీడియాలో ఊహాజ‌నిత క‌థ‌నాలు వెలువ‌డ్డాయి.

అయితే కొన్నిటిని రివీల్ చేయ‌డానికి ఒక టైమ్ కావాలి. ఇప్పుడు ఆ సస్పెన్స్ ని రివీల్ చేస్తూ ఇంకో పోస్టర్ ని విడుదల చేశారు. జితేందర్ రెడ్డి పాత్రలో రాకేష్ వర్రే గన్ పట్టుకుని ఎంతో డైనమిక్ గా నడుచుకుంటూ వస్తున్న ఈ పోస్ట‌ర్ ఎంతో ఆక‌ట్టుకుంది. చూడడానికి ఒక యంగ్ పోలీస్ లా ఎన‌ర్జిటిక్ గా క‌నిపిస్తున్నాడు. కాకపోతే ముందు రిలీజ్ చేసిన పోస్టర్స్ లో లీడర్ లుక్స్ స్పెష‌ల్ గా ఉన్నాయి.

హీరోగా ఒక సినిమా చేసి హిట్ అందుకున్న తరువాత కూడా ఇంత గ్యాప్ తీసుకుని ఈ జితేందర్ రెడ్డి సినిమానే రాకేష్ ఎందుకు ఎంచుకున్నారు? అసలు ఈ కథలో ఆ పాత్రలో ఉన్న ప్రత్యేకత ఏమిటి? అనేది జితేందర్ రెడ్డి సినిమా గురించి మరిన్ని అప్ డేట్స్ వచ్చే వరుకు వేచి చూడాల్సిందే. మరో ఆసక్తికరమైన విషయం ఏమిటి అంటే ఈ జితేందర్ రెడ్డి క్యారెక్టర్ కి సరైన నటుడు కోసం దర్శకుడు విరించి వర్మ దాదాపు 6 నెలల పాటు ఆడిష‌న్స్ లో అనేక మందిని రిజెక్ట్ చేసి చివరికి రాకేష్ వర్రే మాత్రమే ఈ పాత్రకి సరిపోతారని నమ్మి తీసుకున్నారు. రాకేష్ ఈ క్యారక్టర్ కి ఎంత న్యాయం చేశారనేది మున్ముందు తెలుస్తుంది.

రాకేష్ వర్రే, సుబ్బరాజు , శ్రీయాశ‌రణ్ తదిత‌రులు న‌టించారు. ఈ చిత్రానికి కో - ప్రొడ్యూసర్ : ఉమ రవీందర్, ఎక్జిక్యూటివ్ ప్రొడ్యూసర్ : వాణిశ్రీ పొడుగు, డి. ఓ. పి : వి. ఎస్. జ్ఞాన శేఖర్, మ్యూజిక్ డైరెక్టర్ : గోపి సుందర్, నిర్మాత : ముదుగంటి రవీందర్ రెడ్డి.