స్పీడ్ తగ్గించని ప్రభాస్.. రంగంలోకి సందీప్ వంగా!
పాన్ ఇండియా స్టార్ ప్రభాస్ వరుస సినిమాలతో ఫుల్ బిజీగా ఉన్న విషయం తెలిసిందే. సినిమా షూటింగ్‌లు, కొత్త ప్రాజెక్ట్‌లు అన్నీ కలిపి ఒక్క క్షణం కూడా తీరిక లేకుండా సాగుతున్నారు.
By: Tupaki Desk | 29 Jan 2025 6:30 PM GMT
పాన్ ఇండియా స్టార్ ప్రభాస్ వరుస సినిమాలతో ఫుల్ బిజీగా ఉన్న విషయం తెలిసిందే. సినిమా షూటింగ్‌లు, కొత్త ప్రాజెక్ట్‌లు అన్నీ కలిపి ఒక్క క్షణం కూడా తీరిక లేకుండా సాగుతున్నారు. ఇప్పటికే రాజా సాబ్ షూటింగ్ దాదాపు పూర్తికావచ్చింది. మే 30న విడుదల చేయాలని మేకర్స్ భావిస్తున్నప్పటికీ, షూటింగ్ లేదా పోస్ట్ ప్రొడక్షన్ పనుల కారణంగా అక్టోబర్‌కి వెళ్తుందా? అన్నదానిపై అధికారిక క్లారిటీ రావాల్సి ఉంది.
ఇదిలా ఉండగా, ప్రభాస్ మరో క్రేజీ ప్రాజెక్ట్ హాను రాఘవపూడి దర్శకత్వంలో తెరకెక్కుతున్న వార్ డ్రామాలో నటిస్తున్నారు. 1940 నేపథ్యంలో సాగే ఈ సినిమాకు ఫౌజీ అనే టైటిల్ పరిశీలనలో ఉంది. ఇందులో ప్రభాస్ ఓ బ్రిటిష్ సోల్జర్ గా కనిపించబోతున్నట్లు సమాచారం. అద్భుతమైన ఎమోషనల్ లవ్ స్టోరీగా ఈ సినిమా తెరకెక్కనుండగా, హీరోయిన్‌గా కొత్త నటి ఇమాన్వి నటిస్తోంది.
ప్రస్తుతం ప్రభాస్ హైదరాబాద్‌లోని రామోజీ ఫిల్మ్ సిటీ, అలాగే అల్యూమినియం ఫ్యాక్టరీలో బ్యాక్ టు బ్యాక్ షూటింగ్‌లు నిర్వహిస్తున్నారు. రాజా సాబ్, హాను మూవీ సెట్స్ మధ్య ఎలాంటి బ్రేక్ లేకుండా కష్టపడి పనిచేస్తున్నారు. వీటితో పాటు త్వరలోనే స్పిరిట్ కోసం ప్రీ ప్రొడక్షన్ పనులు కూడా వేగవంతం కానున్నాయి. ఇటీవల సందీప్ రెడ్డి వంగా ప్రభాస్‌ను అల్యూమినియం ఫ్యాక్టరీలో కలవడం ఇప్పుడు ఇండస్ట్రీలో చర్చనీయాంశంగా మారింది.
ఈ సినిమా కోసం త్వరలో లుక్ టెస్ట్ చేయబోతున్నారని తెలుస్తోంది. ఒకసారి స్పిరిట్ షూటింగ్ ప్రారంభమైతే, ఇతర ప్రాజెక్టులకు గ్యాప్ తీసుకొని పూర్తిగా దీనిపై ఫోకస్ పెడతారని సమాచారం. ప్రభాస్ కెరీర్‌లో స్పిరిట్ ఓ స్పెషల్ ప్రాజెక్ట్‌గా నిలవనుందని టాలీవుడ్ వర్గాలు భావిస్తున్నాయి. ఈ సినిమాలో ప్రభాస్ పవర్ఫుల్ పోలీస్ ఆఫీసర్ గా కనిపించనున్నట్లు దర్శకుడు ఇదివరకే ఒక క్లారిటీ ఇచ్చారు.
స్పిరిట్ పూర్తిగా ప్రభాస్ క్యారెక్టర్ తోనే నడిపించే కథ అని తెలుస్తోంది. మే లేదా జూన్ నుంచి షూటింగ్ ప్రారంభించి, ఎలాంటి విరామం లేకుండా వంద శాతం డెడికేషన్‌తో పని చేయనున్నారని సమాచారం. ప్రస్తుతం ప్రభాస్ మూడు హై బడ్జెట్ చిత్రాలతో బిజీగా ఉండగా, ఒక్కో సినిమా మరొకదానికంటే భారీ స్థాయిలో ఉండటం విశేషం. వీటిలో స్పిరిట్ మాత్రమే కాకుండా, హాను మూవీ, రాజా సాబ్ కూడా భారీ స్థాయిలో ప్రేక్షకుల ముందుకు రాబోతున్నాయి. రెబల్ స్టార్ ఎంతగా శ్రమిస్తున్నాడో చూస్తుంటే, రాబోయే రోజుల్లో ఆయన కెరీర్‌లో మరిన్ని భారీ హిట్స్ రాబోతున్నాయనిపిస్తోంది.
