స్పిరిట్.. ప్రభాస్ స్పెషల్ ప్రిపరేషన్

యంగ్ రెబల్ స్టార్ ప్రభాస్ ప్రస్తుతం ‘ది రాజాసాబ్’ మూవీ చేస్తున్నారు. మారుతి దర్శకత్వంలో తెరకెక్కుతోన్న ఈ సినిమా షూటింగ్ చివరి దశలో ఉంది. 2025 ఏప్రిల్ 10న ఈ చిత్రం రిలీజ్ కానుంది. అలాగే హను రాఘవపూడి దర్శకత్వంలో చేస్తోన్న ‘ఫౌజీ’ మూవీ షూటింగ్ కూడా స్టార్ట్ అయ్యింది. అయితే ప్రభాస్ వచ్చే ఏడాది ఈ మూవీ షూటింగ్ లో జాయిన్ అవుతారు. అంతకంటే ముందుగా ప్రభాస్ లేని సన్నివేశాలు ఫినిష్ చేసే పనిలో హను ఉన్నారు.

అయితే ప్రభాస్ చేతిలో ఉన్న మోస్ట్ క్రేజియస్ట్ ప్రాజెక్ట్ అంటే ‘స్పిరిట్’ అని చెప్పాలి. సందీప్ రెడ్డి వంగా దర్శకత్వంలో తెరకెక్కనున్న ఈ సినిమా కోసం డార్లింగ్ ఫ్యాన్స్ ఆసక్తిగా ఎదురుచూస్తున్నారు. ‘అర్జున్ రెడ్డి’, ‘యానిమల్’ సినిమాలలో ఎక్స్ ట్రీమ్ ఎమోషన్స్ తో హీరో క్యారెక్టరైజేషన్స్ ని సందీప్ డిజైన్ చేసి తెరపై ఆవిష్కరించారు. అందుకే ‘స్పిరిట్’ లో ప్రభాస్ ని ఏ విధంగా చూపించనున్నాడో తెలుసుకోవాలనే ఆసక్తి అందరిలో ఉంది.

ప్రభాస్ ‘ది రాజాసాబ్’ కంప్లీట్ చేసిన తర్వాత ‘ఫౌజీ’ కూడా వీలైనంత ఎర్లీగా పూర్తి చేసి ‘స్పిరిట్’ మీద ఫోకస్ చేయనున్నారంట. ఈ సినిమాలో క్యారెక్టర్ కోసం మేకోవర్ అయ్యే పనిలో ప్రభాస్ ఉన్నట్లు టాక్ వినిపిస్తోంది. మూవీలో ప్రభాస్ కండలు తిరిగిన శరీరంతో పవర్ ఫుల్ గా కనిపిస్తాడంట. దానికోసం ఇప్పటి నుంచి ప్రభాస్ వర్క్ అవుట్స్ స్టార్ట్ చేసినట్లు సమాచారం. అలాగే సందీప్ రెడ్డి వంగాకి ప్రభాస్ బల్క్ డేట్స్ ఇచ్చాడంట.

స్టోరీ ప్రెజెంటేషన్ లో కూడా పూర్తిగా ఫ్రీ హ్యాండ్ ఇచ్చాడని టాక్ నడుస్తోంది. సందీప్ రెడ్డి కూడా ప్రభాస్ ని ఇప్పటి ఎవరు చూపించని విధంగా పవర్ ఫుల్ గా తెరపై ఆవిష్కరించాలని అనుకుంటున్నారు. ప్రస్తుతం ఈ మూవీ క్యాస్టింగ్ ని ఫైనల్ చేసే పనిలో సందీప్ రెడ్డి వంగా ఉన్నారని తెలుస్తోంది. 2025 జనవరి తర్వాత ఈ సినిమా ప్రారంభోత్సవం ఉండొచ్చని అనుకుంటున్నారు.

‘స్పిరిట్’ కంప్లీట్ చేసిన తర్వాతనే నాగ్ అశ్విన్ దర్శకత్వంలో ‘కల్కి 2898ఏడీ’, ‘సలార్ 2’ చిత్రాలపై ప్రభాస్ దృష్టి పెట్టనున్నాడు. స్పిరిట్ సినిమా 2027లో ప్రేక్షకుల ముందుకి తీసుకొచ్చే ప్లాన్ లో సందీప్ రెడ్డి వంగా ఉన్నారు. 500 కోట్ల భారీ బడ్జెట్ తో ఈ చిత్రాన్ని టి-సిరీస్ నిర్మిస్తోంది.