రెబల్ స్టార్ పుట్టినరోజు జపాన్‌లో ముంద‌స్తు!

దేశం కాని దేశంలో డార్లింగ్ ప్ర‌భాస్ పై అంతులేని ప్రేమాభిమానాలు ఆశ్చ‌ర్య‌ప‌రుస్తున్నాయి. అయితే దీనివెన‌క స్టోరి చాలా పెద్ద‌దే ఉంది. వివ‌రాల్లోకి వెళితే..

భార‌త‌దేశంలో బిగ్గెస్ట్ స్టార్ గా వెలిగిపోతున్నాడు డార్లింగ్ ప్ర‌భాస్. బాహుబ‌లి ముందు బాహుబ‌లి త‌ర్వాత అత‌డి స్థాయి శిఖ‌రం ఎత్తుకు పెరిగింది. ఇప్పుడు జ‌యాప‌జ‌యాల‌తో సంబంధం లేకుండా అత‌డు స్టార్ డ‌మ్ ని ఆస్వాధిస్తున్నాడు. కేవ‌లం స్వ‌దేశంలోనే కాదు.. ప్ర‌పంచ దేశాల్లో అత‌డికి ఫాలోవ‌ర్స్ ఉన్నారు. సూపర్ స్టార్ ప్రభాస్ తన ప్రత్యేకమైన శైలి.. గొప్ప పాత్రలతో అంద‌రిలోకి దూసుకెళ్లాడు. బాహుబలి స్టార్ గా హృద‌యాల్లో నిలిచాడు. రెబల్ స్టార్ ప్ర‌భాస్ బంగారు హృదయం ఉన్న వ్యక్తిగాను స‌హ‌చ‌ర న‌టుల్లో ప్రేమాభిమానాలు ద‌క్కించుకున్నాడు. ప్ర‌స్తుతం ప్రభాస్ బ్యాక్ టు బ్యాక్ భారీ చిత్రాల్లో న‌టిస్తూ బిజీగా ఉన్నాడు. ఈ సినిమాల రిలీజ్ ల కోసం అభిమానులు ఆస‌క్తిగా వేచి చూస్తున్నారు.

ఇంత‌లోనే డార్లింగ్ ప్ర‌భాస్ పుట్టినరోజు వేడుక‌ల‌కు స‌మ‌య‌మాస‌న్న‌మైంది. అక్టోబర్ 23న ప్రభాస్ తన పుట్టినరోజును జరుపుకోనున్నారు. ఆ రోజున ప్ర‌పంచ‌వ్యాప్తంగా అభిమానుల ఉత్సాహాన్ని ఆప‌లేం. ఆకాశాన్నంటేలా సంబ‌రాల కోసం ఫ్యాన్స్ సిద్ధ‌మ‌వుతున్నారు. ఇప్ప‌టికే కొంద‌రు అభిమానులు ట్విటర్‌లో సంబరాలు ప్రారంభించారు. పుట్టినరోజు శుభాకాంక్షలు చెబుతూ.. ప్ర‌భాస్ పై అభిమానుల ప్రేమను వ్య‌క్తం చేసే ఈమోజీలు వైర‌ల్ అవుతున్నాయి. అభిమానులు చాలా ముందుగానే పుట్టినరోజును జరుపుకోవడం ప్రారంభించ‌గా విదేశాల నుంచి ఈసారి ఎక్కువ‌గా సోష‌ల్ మీడియాల్లో ప్రేమ వ్య‌క్త‌మ‌వుతోంది. అలాగే ఈ బ‌ర్త్ డేని పుర‌స్క‌రించుకుని మాస్ మూవీ చత్రపతిని 4K లో తిరిగి విడుదల చేస్తున్న సంగ‌తి తెలిసిందే. ఈ సినిమా వీక్ష‌ణ కోసం చాలా మంది ఉత్సాహంగా ఉన్నారు. బిగ్ డే కోసం ఇప్ప‌టికే ప్ర‌భాస్ గ్రాండ్ కటౌట్ లు కూడా వెబ్ లో ప్ర‌త్య‌క్ష‌మ‌వుతున్నాయి.

అయితే ప్ర‌భాస్‌పై భార‌తీయుల ప్రేమ స‌హ‌జ‌మే కానీ, అంత‌కుమించి విదేశాల నుంచి ప్రేమ వ్య‌క్త‌మవుతుండ‌డం మారిన అత‌డి ఇమేజ్ కి సింబాలిక్. ముఖ్యంగా జ‌ప‌నీ అభిమానులు అత‌డిని ప్రేమించి అభిమానించ‌డం ఆస‌క్తిని క‌లిగిస్తోంది. ఇప్ప‌టికే జ‌పాన్ ఫ్యాన్స్ ప్ర‌భాస్ బ‌ర్త్ డే వేడుక‌ల‌ను సెల‌బ్రేట్ చేసుకుంటూ అందుకు సంబంధించిన ఫోటోల‌ను అంత‌ర్జాలంలో షేర్ చేస్తున్నారు. అవి వైర‌ల్ గా మారుతున్నాయి. బాహుబ‌లి గెట‌ప్పులు స‌హా సాహో ఇత‌ర సినిమాల‌కు సంబంధించిన పోప్ట‌ర్ల‌ను పూజిస్తూ జ‌పనీ అభిమానులు త‌మ ఆరాధనాభావాన్ని చాటుకుంటున్నారు.