క‌ల్కి 2898AD చెప్పిన టైముకే వ‌స్తుంది

కల్కి 2898 AD .. ఈ ఏడాది విడుద‌ల‌కు వ‌స్తున్న మోస్ట్ అవైటెడ్ మూవీ. ప్ర‌భాస్ క‌థానాయ‌కుడిగా నాగ్ అశ్విన్ దర్శకత్వంలో వైజ‌యంతి సంస్థ నిర్మిస్తున్న‌ ఈ సినిమా మే 9న విడుదల కానుంది. రిలీజ్ తేదీకి కౌంట్‌డౌన్ ప్రారంభమైనందున చిత్ర‌ నిర్మాతలు ప్రేక్షకులలో ఉత్కంఠను పెంచడానికి సిద్ధ‌మ‌య్యారు. తాజా అప్‌డేట్ ప్రకారం.. ఈ చిత్రానికి సంబంధించిన టీజర్‌ను త్వరలో విడుదల చేయబోతున్నట్లు టీమ్ వెల్లడించింది. ఒక నిమిషం ఇరవై మూడు సెకన్ల నిడివిలో టీజర్ ప్రేక్షకులకు 'కల్కి 2898 AD' ప్రపంచం దాని ప్రత్యేక కథాంశం గురించి వెల్ల‌డిస్తుందని స‌మాచారం.

ఇంత‌లోనే ఇప్పుడు రిలీజ్ తేదీని మ‌రోసారి క‌న్ఫామ్ చేస్తూ ఒక‌ టిట్ బిట్ ని నాగ్ అశ్విన్ బృందం షేర్ చేసింది. ''టా ట‌క్క‌ర ట‌క్క‌ర ట‌క్క‌ర‌.... జ‌స్ట్ ది వామ్ అప్..'' అంటూ సంతోష్ నారాయ‌ణ్ రెగ్యుల‌ర్ క‌మ‌ర్షియ‌ల్ మ‌సాలా ట్యూన్ ని వినిపించారు. ఈ వీడియోలో ఒక పాదం ఎంతో జోష్ తో క‌దులుతోంది. బ్యాక్ గ్రౌండ్ లో దూరంగా క్రేన్ లు వాతావ‌ర‌ణం చూస్తుంటే షూటింగ్ లొకేష‌న్ నుంచి విజువ‌ల్ షేర్ చేసార‌ని అర్థ‌మ‌వుతోంది. అయితే క‌ల్కి లాంటి సైన్స్ ఫిక్ష‌న్ సినిమాలో కూడా రెగ్యుల‌ర్ మాస్ నంబ‌ర్లు ఉంటాయ‌ని దీనిని బ‌ట్టి అర్థం చేసుకోవాల్సి ఉంటుంది. ముఖ్యంగా ఈ సినిమా మే9న వ‌స్తోంది అని ఖరారు చేస్తూ చిత్ర‌బృందం రిలీజ్ తేదీని మ‌రోసారి స్ప‌ష్ఠంగా చెప్ప‌డం ఆస‌క్తిని పెంచింది.

ప్రభాస్‌ను నాగ్ అశ్విన్ గతంలో ఎన్నడూ చూడని పాత్రలో సూపర్‌హీరోగా చూపిస్తున్నారు. ఇంతకుముందు విడుదల చేసిన టీజర్ ప్రకారం.. ఈ చిత్రం సైన్స్ ఫిక్షన్ స్పేస్-వార్ అడ్వెంచర్ క‌థాంశంతో రూపొందింది. ఈ సినిమాపై భారీ అంచనాలు ఏర్ప‌డ‌గా ఇప్పుడు వ‌చ్చే టీజ‌ర్ అంత‌కంత‌కు ఉత్కంఠ పెంచనుంది. ఈ భారీ సినిమా నుండి అభిమానులు ఏమి ఆశించవచ్చనే దానిపై ఆకర్షణీయమైన స్నీక్ పీక్‌ను అందించాలని మేక‌ర్స్ భావిస్తున్నారు.

దీపికా పదుకొణె, అమితాబ్ బచ్చన్, కమల్ హాసన్, దిశా పటానీ సహా పరిశ్రమకు చెందిన ప్రముఖ తార‌లు 'కల్కి 2898 AD'లో న‌టిస్తున్నారు. భారీ తారాగ‌ణం న‌టిస్తున్నందున అభిమానులు ప్రాజెక్ట్ గురించి మరింత ఉత్సాహంగా ఉన్నారు. ఈ మెగా ప్రాజెక్ట్‌కి సంతోష్ నారాయణ్ సంగీతం సమకూరుస్తున్నాడు. సైన్స్ ఫిక్ష‌న్ మూవీ కోసం అద్భుతమైన సౌండ్‌ట్రాక్ ని రెడీ చేస్తున్నాడు. గతంలో ప్రభాస్, దిశా పటాని జంటపై ఓ రొమాంటిక్ సాంగ్‌ను చిత్రీకరించనున్నట్లు సమాచారం.