ప్రభాస్​ - లోకేశ్ కాంబో.. ఇప్పట్లో కష్టమే..

పాన్ ఇండియా స్టార్ ప్రభాస్‌తో లోకేశ్ కనగరాజ్ సినిమా ఉంటుందని గత కొంతకాలంగా సినీ వర్గాల్లో మాటలు వినిపిస్తున్న సంగతి తెలిసిందే. ఖైదీ, మాస్టర్‌, విక్రమ్‌ చిత్రాలతో వరుస విజయాలను అందుకున్న లోకేశ్ కనగరాజ్​ .. ప్రస్తుతం లియో చిత్రంతో బిజీగా ఉన్నాడు. తాజాగా ఈ మూవీ ప్రమోషన్స్​లో ప్రభాస్​తో సినిమాపై హింట్ ఇచ్చాడు.

అయితే ఈ మాట వినడానికి చాలా బాగుంది కానీ.. కార్యరూపం దాల్చుతుందా అంటే చాలా పెద్ద సమయమే పట్టేట్టు కనిపిస్తోంది. ఎందుకంటే కోలీవుడ్​లోనే కాదు ఇతర భాషల్లోనూ విపరీతమైన క్రేజ్ సంపాదించుకున్న లోకేశ్​ కనగరాజ్.. లియో తర్వాత సూపర్ స్టార్ రజనీకాంత్​తో ఓ భారీ సినిమా చేస్తున్నాడు. త్వరలోనే ఇది సెట్స్​పైకి వెళ్లనుంది.

కనీసం ఐదు ఆరు నెలలు రజనీకాంత్ 171 స్క్రిప్ట్ కోసం పని చేసినా.. ఆ తర్వాత షూటింగ్, పోస్ట్ ప్రొడక్షన్ ఇతర పనులు పూర్తయ్యేసరికి 2024 చివరి దశ వచ్చేస్తుంది. ఆ తర్వాత ఖైదీ 2, కమల్​ హాసన్​తో విక్రమ్ 2 చేయాలి. ఈ సినిమాలకు సంబంధించిన కథ ఉన్నప్పటికీ.. ఫుల్ వెర్షన్ ఇంకా డెవలప్ చేయాలట. ఇంకా రోలెక్స్ సోలో క్యారెక్టర్​తో ఓ భారీ చిత్రాన్ని ప్లాన్ చేస్తున్నాడు లోకేశ్. ఇవన్నీ లోకేశ్​ యునివర్స్ పేరుతో రానున్నాయి.

ఈ ప్రాజెక్టులన్నీ కంప్లీట్ అవ్వడానికి మరో నాలుగేళ్లు కనీసం పడుతుంది. ఈలోగా ప్రభాస్ లైన్​పై కూడా భారీగానే ఉంది. కల్కి 2, సలార్ 2, మారుతీతో సినిమా, సందీప్ వంగాతో స్పిరిట్ ఇలా పెద్దగానే ఉంది. ఇవన్నీ పూర్తి అవ్వడానికి కూడా చాలా సమయమే పడుతుంది. ఇంకా వీటి తర్వాత హను రాఘవపూడి పేరు కూడా వినిపిస్తోంది. కాబట్టి ఇవన్నీ లెక్కలేసుకుని చూసుకుంటే 2030 వరకు వెళ్లినా ఆశ్చర్యం లేదని చెప్పాలి.

ఒకవేళా ఏదైనా అనూహ్య పరిణామం చోటు చేసుకుంటే తప్ప ప్రభాస్​ - లోకేశ్ సినిమా మొదలు కావడం అసాధ్యం అని చెప్పాలి. కాబట్టి ఒకటి రెండు సంవత్సరాలలో వీరిద్దరి కాంబో ఉండకపోవచ్చు. చూడాలి మరి ఏం జరుగుతుందో...