'సలార్' డబుల్ ధమాకా

'సలార్' సినిమా మీద ఉన్న అంచనాల సంగతి తెలిసిందే. ఐతే ఈ చిత్రం నుంచి ఇప్పటి వరకు ప్రభాస్ ఫస్ట్ లుక్‌ను కూడా సరిగా చూపించలేదు. ఇప్పటిదాకా రిలీజ్ చేసిన లుక్స్ అన్నీ కూడా మసక మసకగానే ఉన్నాయి. టీజర్లో కూడా ప్రభాస్ ముఖాన్ని సరిగా చూపించలేదు. ఈ విషయంలో అభిమానుల్లో కొంత అసంతృప్తి ఉంది. కానీ సినిమాను సరిగా ప్రమోట్ చేయకపోయినా ప్రభాస్-ప్రశాంత్ నీల్ కాంబినేషన్‌కు ఉన్న క్రేజ్ దృష్ట్యా ఈ సినిమాకు అసాధారణ స్థాయిలో బిజినెస్ జరిగింది. ఇక ఇండియాలోనే కాక అనేక దేశాల్లో ఈ సినిమాకు హైప్ మామూలుగా లేదు. సెప్టెంబరు 28 నుంచి సినిమాను వాయిదా వేయడం కొంత ప్రతికూలంగా మారినా.. కొత్త డేట్ వచ్చాక హైప్ అంతా తిరిగి వచ్చింది. రిలీజ్‌కు రెండు నెలల ముందు నుంచి ప్రమోషన్లు హోరెత్తబోతున్నట్లు చిత్ర బృందం నుంచి సంకేతాలు అందుతున్నాయి.

ముందుగా అక్టోబరు 23న ప్రభాస్ పుట్టిన రోజును పురస్కరించుకుని 'సలార్' ట్రైలర్ లాంచ్ చేయబోతున్నట్లు తెలుస్తోంది. అభిమానుల అంచనాలకు తగ్గట్లుగా యాక్షన్ ప్యాక్డ్ ట్రైలర్‌ను ప్రశాంత్ రెడీ చేస్తున్నాడని.. ఇందులో ప్రభాస్ మాస్ అవతార్ చూడబోతున్నామని అంటున్నారు. ఐతే రిలీజ్‌కు రెండు నెలల ముందే ట్రైలర్ లాంచ్ చేస్తే.. తర్వాత అభిమానులతో పంచుకోవడానికి ఇంకేం ప్రమోషనల్ కంటెంట్ ఉంటుందనే సందేహాలు నెలకొన్నాయి. కానీ రిలీజ్ ముంగిట ఇంకో ట్రైలర్ కూడా వదులుతారట. ముందు రిలీజ్ చేసేది యాక్షన్ ప్యాక్డ్‌గా, ప్రధానంగా ప్రభాస్‌ను ఎలివేట్ చేసేలా ఉంటుందట. రిలీజ్ ముంగిట విడుదల చేసేది కథ మీద ఫోకస్ చేసేట్లు ఉంటుందట. మధ్యలో సినిమా నుంచి పాటలు, వేరే లుక్స్ కూడా రిలీజ్ చేస్తారని సమాచారం. క్రిస్మస్ కానుకగా డిసెంబరు 22న 'సలార్' రిలీజ్ కానుండగా.. ముందు రోజు విదేశాల్లో భారీ స్థాయిలో ప్రీమియర్స్ పడబోతున్నాయి.