కల్కి.. చాలా ఏళ్లకు ప్రభాస్ సినిమాకు ఇలా!

దర్శకధీరుడు రాజమౌళి తెరకెక్కించిన బాహుబలి సిరీస్ సినిమాలతో స్టార్ హీరో ప్రభాస్ ఎలాంటి క్రేజ్ సంపాదించుకున్నారో అందరికీ తెలిసిందే. పాన్ ఇండియా లెవెల్ లో ఫ్యాన్స్ సంపాదించుకుని.. పాన్ ఇండియా స్టార్ కూడా అయిపోయారు. ఆ తర్వాత వరుస చిత్రాలతో నిరాశపరిచిన ప్రభాస్.. గత ఏడాది సలార్ మూవీతో మళ్లీ హిట్ ట్రాక్ ఎక్కారు. ఇప్పుడు మరికొన్ని గంటల్లో కల్కి సినిమాతో ప్రేక్షకుల ముందుకు రాబోతున్నారు.

నాగ్ అశ్విన్ తెరకెక్కించిన కల్కి 2898 ఏడీ మూవీలో ప్రభాస్.. భైరవగా నటిస్తున్నట్లు ఇప్పటికే క్లారిటీ వచ్చేసింది. కల్కిగా కూడా ఆయనే కనిపిస్తారని టాక్ వినిపిస్తోంది. సినిమాలో ప్రభాస్ యాక్షన్ అదిరిపోయేలా ఉన్నట్లు తెలుస్తోంది. అయితే కల్కి రిలీజ్ కు ముందు ఆసక్తికర విషయం సోషల్ మీడియాలో వైరల్ గా మారింది. చాలా ఏళ్లకు ప్రభాస్ సినిమా ఎలాంటి నెగిటివిటీ లేకుండా రిలీజ్ అవుతుందని నెటిజన్లు చెబుతున్నారు.

అయితే బాహుబలి-2 తర్వాత ప్రభాస్ సాహు సినిమాతో ప్రేక్షకుల ముందుకు వచ్చిన విషయం తెలిసిందే. సుజిత్ దర్శకత్వం వహించిన ఈ మూవీ మిక్స్ డ్ టాక్ సంపాదించుకుంది. సినిమా రిలీజ్ కు ముందు విడుదల చేసిన ట్రైలర్ లో ఒక్కొక్క షాట్ లో ప్రభాస్ ఒక్కోలా కనిపించారు. కొన్ని షాట్స్ లో స్లిమ్ గా, మరికొన్ని షాట్స్ లో బొద్దుగా కనిపించారు. అప్పుడు అనేక విమర్శలు రాగా.. ఆ విషయంపై పెద్ద చర్చే నడిచింది.

ఆ తర్వాత రాధే శ్యామ్ టైమ్ లో ప్రభాస్, పూజా హెగ్డే మధ్య డిఫరెన్సెస్ వచ్చాయని, షూటింగ్ సరిగ్గా జరగలేదని రూమర్స్ వినిపించాయి. ఇక సినిమా రిలీజ్ అయ్యాక ఆ రూమర్లు ఎక్కువయ్యాయి. మూవీ కూడా ఆకట్టుకోలేకపోయింది. ఇక ఆది పురుష్ సినిమా విషయంలో ఏం జరిగిందో స్పెషల్ గా చెప్పనక్కర్లేదు. గ్రాఫిక్స్, మేకప్స్ విషయంలో దారుణంగా ట్రోల్స్ వచ్చాయి. తీవ్రంగా విమర్శించారు సినీ ప్రియులు.

గత ఏడాది సలార్ మూవీలో ప్రభాస్ కు డైలాగులు చాలా తక్కువ ఉండడంతో పెద్ద చర్చ నడిచింది. పలు మార్లు వాయిదా పడడం, ఆ తర్వాత సడెన్ గా మూవీ రిలీజ్ చేయడంతో కాస్త ఇబ్బందులు వచ్చాయి. ఇక ఇప్పుడు కల్కి విషయంలో మాత్రం ఎక్కడా కూడా నెగిటివ్ టాక్ రాలేదు. మేకర్స్ పెర్ఫెక్ట్ గా ప్లాన్ చేయడం వల్ల మూవీపై అన్ని వర్గాల్లో పాజిటివ్ బజ్ క్రియేట్ అయింది. మరి చాలా ఏళ్లకు ఎలాంటి నెగిటివిటీ లేకుండా వస్తున్న కల్కి సినిమా.. ప్రభాస్ కెరీర్ లో బిగ్గెస్ట్ హిట్ గా నిలుస్తుందో లేదో వేచి చూడాలి.