కొత్త ట్విస్ట్.. ప్రభాస్ కు జోడీగా కంగన?

మంచు విష్ణు టైటిల్‌ రోల్‌ పోషిస్తూ తన తండ్రితో కలిసి కన్నప్ప మూవీ తెరకెక్కిస్తున్న విషయం తెలిసిందే. మహాకవి ధూర్జటి రాసిన శ్రీకాళహస్తీశ్వర శతకం లోని భక్త కన్నప్ప చరిత్రను స్ఫూర్తిగా తీసుకుని సినిమాను రూపొందిస్తున్నారు. ఈ చిత్రంలో మోహన్‌లాల్‌, మోహన్‌బాబు, ప్రభాస్‌ వంటి ప్రముఖ నటులు కనిపించనున్నారు. ఇటీవల న్యూజిలాండ్‌లో లాంగ్‌ షెడ్యూల్‌ పూర్తి చేసుకున్న మూవీ యూనిట్ ఇండియా వచ్చింది.

షూటింగ్ మొదలైన సమయంలో మంచు విష్ణు సోషల్ మీడియా పోస్ట్.. అందరినీ ఆకట్టుకుంది. కొన్ని నెలలుగా సినిమా కోసం ఎంతో కష్టపడుతున్నట్లు విష్ణు తెలిపారు. అందరికీ గాయాలైనట్లు కూడా చెప్పారు. అయితే ఈ మూవీలో ప్రభాస్ శివుడిగా నటిస్తున్నట్లు గత కొద్ది నెలలుగా వార్తలు వస్తున్నాయి. త్వరలోనే ఓ షెడ్యూల్ ప్రారంభం కానుందని, అందుకు గాను నిర్మించిన భారీ సెట్ లో ప్రభాస్ పై కీలక సన్నివేశాలు చిత్రీకరించనున్నట్లు సమాచారం.

అయితే కన్నప్ప చిత్రంలో ప్రభాస్ శివుడిగా, నయనతార పార్వతిగా నటిస్తున్నట్లు గతంలో వార్తలు వచ్చాయి. 16 ఏళ్ల తర్వాత మంచు విష్ణు డ్రీమ్ ప్రాజెక్ట్ కన్నప్ప మూవీలో వీరు జత కట్టనున్నారని టాక్ వచ్చింది. కానీ ఇప్పుడు ఈ ప్రాజెక్ట్ లో నయన్ భాగమవ్వడంలేదట. ఆమె డేట్స్ సెట్ అవ్వలేదట. అందుకే కన్నప్ప మూవీకి గ్రీన్ సిగ్నల్ ఇవ్వలేదట. ఇప్పుడు పార్వతిగా ఓ బాలీవుడ్ నటి యాక్ట్ చేయనుందని టాక్ వినిపిస్తోంది.

ఆమె ఎవరో కాదు.. బాలీవుడ్ ఫైర్ బ్రాండ్ కంగనా రనౌత్. నయనతార డేట్స్ దొరక్కపోవడంతో కంగనను మేకర్స్ సంప్రదించారట. అందుకు ఆమె కూడా ఓకే చెప్పినట్లు తెలుస్తోంది. దీనిపై త్వరలో చిత్ర యూనిట్ అఫీషియల్ గా ప్రకటించనుందట. గతంలో ఓ ఇంటర్వ్యూలో కంగన.. తనకు ఓ తెలుగు చిత్రంలో పార్వతీ దేవి రోల్ ఆఫర్ వచ్చిందని చెప్పింది. మూడు- నాలుగు రోజుల షూట్ ఉంటుందని చెప్పింది. భక్త కన్నప్ప కోసమే అప్పుడు కంగన చెప్పిందని నెటిజన్లు అంటున్నారు.

మరోవైపు, కన్నప్ప సినిమాలో ముందుగా అనుకున్న హీరోయిన్ నుపుర్ సనన్. కానీ కొన్ని కారణాల వల్ల ఆమె ప్రాజెక్ట్ నుంచి తప్పుకున్న విషయం తెలిసిందే. ఇప్పుడు మొత్తం కాస్టింగ్ పై త్వరలోనే మూవీ యూనిట్ అధికారికంగా ప్రకటించనుందట. ఈ చిత్రాన్ని ఏవీఏ ఎంటర్టైన్మెంట్స్, 24 ఫ్రేమ్స్ ఫ్యాక్టరీ సంస్థలు భారీ స్థాయిలో నిర్మిస్తున్నాయి. ఈ ఏడాది చివరలో కన్నప్ప సినిమా రిలీజ్ అయ్యే అవకాశం ఉంది.