ఏషియాలోనే ఫస్ట్‌ టైమ్‌ ఇలా..!

విభిన్న చిత్రాల దర్శకుడిగా పేరున్న ప్రభు సాల్మన్‌ ప్రస్తుతం 'మాంబో' చిత్రాన్ని చేస్తున్నాడు. గతంలో గజరాజు, అరణ్య సినిమాల్లో అడవి అందం మరియు జంతువుల గురించి చూపించిన ప్రభు సాల్మన్ మాంబో సినిమాలో కూడా అదే తరహాలో జంతు ప్రేమను చూపించబోతున్నట్లు తెలుస్తోంది.

గజరాజు సినిమాలో ఏనుగు కథ ను చూపించిన దర్శకుడు మాంబో సినిమాలో సింహంను చూపించబోతున్నాడు. గతంలో కూడా చాలా సినిమాల్లో సింహాలు కనిపించాయి. కానీ మాంబో సినిమాలో మాత్రం రియల్‌ సింహంను చూపించబోతున్నాడు.

ఇప్పటి వరకు ఏషియన్ మూవీ లో రియల్‌ సింహం తో షూట్‌ చేసిందే లేదు. ఫుల్‌ లెంగ్త్‌ సింహం సన్నివేశాలు ఉంటాయని, అది కూడా రియల్‌ సింహం తో సీన్స్ ఉంటాయని తమిళ సినీ వర్గాల ద్వారా సమాచారం అందుతోంది.

ప్రముఖ నటి వనిత విజయ్ కుమార్‌ తనయుడు అయిన విజయ్ శ్రీహరి ఈ సినిమాతో పరిచయం అవ్వబోతున్నాడు. సింహం తో అతడు కలిసి ఈ సినిమా కోసం నటించాడు. ఇండియాలో నిజమైన జంతువులతో షూటింగ్స్ కు అనేక కండీషన్స్ ఉంటాయి.

అందుకే మాంబో సినిమాను విదేశాల్లో చిత్రీకరించారట. ముఖ్యంగా సౌత్‌ ఆఫ్రికాలో ఈ సినిమాను షూట్‌ చేశారని తెలుస్తోంది. ఒక మనిషి జీవితంలోకి క్రూర జంతువు వచ్చి, ఆ తర్వాత వారిద్దరి మధ్య స్నేహం ఏర్పడటం, ఆ తర్వాత జరిగే పరిణామాలతో మాంబో సినిమా రూపొందింది.

ఇప్పటికే షూటింగ్‌ పూర్తి చేసుకున్న ఈ సినిమాకు సంబంధించిన పోస్ట్‌ ప్రొడక్షన్ వర్క్ జరుపుతున్నారు. ఇప్పటికే ఫస్ట్‌ లుక్ విడుదల చేసిన మేకర్స్ త్వరలోనే సినిమా విడుదల తేదీని ప్రకటించే అవకాశాలు ఉన్నాయి. సౌత్ తో పాటు హిందీలో కూడా ఈ సినిమాను విడుదల చేయబోతున్నారు.