హీరోకి సారీ చెప్పిన ప్రకాశ్ రాజ్..!

కావేరి జల వివాదం తమిళనాడు కర్ణాటక ప్రజల మధ్య దూరాన్ని పెంచుతుంది. రాజకీయ నాయకుల మధ్య ఈ తీవ్రత ఎలా ఉన్నా అసలు ఈ వివాదానికి ఏమాత్రం సంబంధం లేని సినిమా వాళ్లని ఇందులోకి లాగుతున్నారు. కావేరి జలాల వివాదంలో తమిళనాడు ప్రభుత్వంపై ఆగ్రహంగా ఉన్న కన్నడిగులు తమిళ నటుల మీద తమ అసంతృప్తిని వ్యక్తపరుస్తున్నారు. లేటెస్ట్ గా తమిళ హీరో సిద్ధార్థ్ తన సినిమా ప్రమోషన్స్ కోసం బెంగళూరు వెళ్లగా ఆయనకు నిరసన సెగ తగిలింది.

కొందరు నిరసనకారులు సిద్ధార్థ్ ని కావేరి జలాల విషయమై స్పందించాలని కోరారు. దానికి ఆయన తిరస్కరించగా అలా అయితే ఇక్కడ నుంచి వెళ్లిపోవాలని నిరసన కారులు గొడవ చేశారు. చేసేదేమి లేక సిద్ధార్థ్ అక్కడ నుంచి వెళ్లిపోయాడు. అయితే సినిమా ప్రమోషన్స్ లో సిద్ధార్థ్ పై కన్నడిగులు ప్రవర్తించిన తీరుపై నటుడు ప్రకాశ్ రాజ్ క్షమాపణ చెప్పారు.

దశాబ్దాల కాలంగా కర్ణాటక తమిళనాడు మధ్య ఉన్న కావేరి జల వివాదాన్ని పరిష్కరించలేని అసమర్థ రాజకీయ పార్టీలను, పార్లమెంట్ సభ్యులను, రాజకీయ నేతలను వదిలేసి నిస్సహాయులైన సామాన్యులను, కళాకారులను అడ్డుకోవడం సరికాదని ప్రకాశ్ రాజ్ కామెంట్ చేశారు. కేంద్ర ప్రభుత్వంపై ఒత్తిడి తీసుకు రావాలని ఎంపీలను ప్రశ్నించాలి అంతే తప్ప సినిమా వాళ్లని అడ్డుకోవడం కాదని ఆయన అన్నారు.

కన్నడ పౌరుడిగా కర్ణాటక ప్రజల తరపున క్షమాపణలు సిద్ధార్థ్ అంటూ ప్రకాశ్ రాజ్ ఎక్స్ లో తన మెసేజ్ పెట్టారు. సిద్ధార్థ్ నటించిన చిన్నా సినిమా ప్రమోషన్స్ కోసం కర్ణాటక వెళ్లిన సిద్ధార్థ్ పై కన్నడిగులు కావేరి జల నిరసన కారులు ఎటాక్ చేశారు. అతన్ని సభ నుంచి వెళ్లిపోవాలని డిమాండ్ చేశారు. సిద్ధార్థ్ వారిని గౌరవించి ఆడిటోరియం నుంచి వెళ్లిపోయాడు.