మహేష్ మేనల్లుడికి ఫ్లాప్.. టెన్షన్ లో నందమూరి ఫ్యాన్స్?

నందమూరి బాలకృష్ణ వారసుడు మోక్షజ్ఞ ఎంట్రీ కోసం అభిమానులు ఆసక్తిగా ఎదురుచూస్తున్నారు. 'హనుమాన్' డైరెక్టర్ ప్రశాంత్ వర్మ చేతుల మీదుగా బాలయ్య తనయుడు హీరోగా తెరంగేట్రం చేయడానికి రెడీ అవుతున్న సంగతి తెలిసిందే. ఇప్పటికే ఈ చిత్రాన్ని అధికారికంగా ప్రకటించిన మేకర్స్.. మోక్షు బర్త్ డే స్పెషల్ గా ఓ పోస్టర్ ను కూడా రిలీజ్ చేసారు. 'యాక్షన్ కోసం సిద్ధంగా ఉన్నారా? సింబా వస్తున్నాడు' అంటూ లేటెస్టుగా స్టైలిష్ లుక్ ని దర్శకుడు సోషల్ మీడియాలో పంచుకున్నారు. ఇక్కడ దాకా బాగానే ఉంది కానీ, ఓ విషయంలో మాత్రం నందమూరి ఫ్యాన్స్ టెన్షన్ పడుతున్నట్లు తెలుస్తోంది.

ప్రశాంత్ వర్మ సినిమాటిక్ యూనివర్స్ లో తెరకెక్కించిన 'హనుమాన్' సినిమా బ్లాక్ బస్టర్ హిట్ అవ్వడంతో, ప్రశాంత్ వర్మ ఒక్కసారిగా క్రేజీ డైరెక్టర్ గా మారిపోయాడు. దీంతో PVCUలో మరికొన్ని చిత్రాలను ప్లాన్ చేసుకున్నారు. మరోవైపు ఆల్రెడీ తాను రాసుకున్న కథలను ఇతర దర్శకులకు అందిస్తూ వస్తున్నారు. ఇందులో భాగంగా ఇటీవల సూపర్ స్టార్ మహేష్ బాబు మేనల్లుడు అశోక్ గల్లా హీరోగా నటించిన ''దేవకీ నందన వాసుదేవ'' సినిమాకి స్టోరీ అందించారు. అర్జున్ జంధ్యాల దర్శకత్వం వహించిన ఈ చిత్రం నిరాశ పరిచింది.

నిజానికి 'దేవకీ నందన వాసుదేవ' సినిమాని డైరెక్ట్ చేయనప్పటికీ, దగ్గరుండి ప్రమోట్ చేశాడు ప్రశాంత్ వర్మ. ఈవెంట్స్ లో పాల్గొనడమే కాదు.. ఇంటర్వ్యూలు, ప్రెస్ మీట్లకు హాజరయ్యారు. హనుమాన్ తర్వాత ఆయన బ్రాండింగ్ తో వస్తున్న సినిమా కావడం, దూకుడుగా ప్రమోషన్స్ చేయడంతో జనాల్లో ఆసక్తి ఏర్పడింది. కానీ సినిమా చూశాక ఆడియన్స్ షాక్ అయ్యారు. ఇలాంటి కథ గురించేనా ప్రశాంత్ అంతలా చెప్పింది అనే కామెంట్లు వచ్చాయి.

భాగవతం రెఫరెన్స్ తీసుకుని కృష్ణుడు, కంసుడు, సత్యభామ పాత్రల స్ఫూర్తితో 'దేవకీ నందన వాసుదేవ' కథ రాసినట్లుగా తెలుస్తోంది. ఇది ఈ జనరేషన్ ఆడియన్స్ కు ఏమాత్రం కనెక్ట్ అవ్వని అవుట్ డేటెడ్ స్టోరీ. పరమ రొటీన్ స్క్రీన్ ప్లేతో నడిపించారు. ఒక్క ట్విస్ట్ తప్పితే సినిమాలో చెప్పుకోడానికి ఏమీ లేదు. అందుకే ప్రేక్షకులు ఈ చిత్రాన్ని తిరస్కరించారు. దీంతో తొలిసారిగా ప్రశాంత్ వర్మకు ఎదురు దెబ్బ తగిలినట్లు అయింది.

ఇప్పుడు అసలు విషయానికొస్తే, ప్రశాంత్ వర్మ రాసిన 'దేవకీ నందన వాసుదేవ' మూవీ ఫ్లాప్ అవడంతో.. ఆ ఎఫెక్ట్ బాలకృష్ణ వారసుడి సినిమా మీద పడుతుందేమో అని నందమూరి అభిమానులు ఆందోళన చెందుతున్నారు. మోక్షజ్ఞ కోసం దర్శకుడు ఎలాంటి కథను సిద్ధం చేశారో అని ఆలోచిస్తున్నారు. మహేష్ బాబు మేనల్లుడికి ఇచ్చినటువంటి స్టోరీ కాకుండా, ఏదైనా మంచి కథతో సినిమా చేయాలని కోరుకుంటున్నారు.

ఏ హీరోకైనా డెబ్యూ మూవీ అనేది చాలా కీలకం. అందులోనూ నందమూరి ఫ్యామిలీ నుంచి రాబోతున్న హీరో కావడంతో మోక్షజ్ఞ సినిమాపై అందరిలో అంచనాలు ఉంటాయి. వాటన్నిటినీ అధిగమించే సినిమాతో ప్రశాంత్ వర్మ రావాలని ఫ్యాన్స్ కోరుకుంటున్నారు. అయితే PVCUలో భాగంగానే మోక్షు మూవీ ఉంటుందని అనౌన్స్ మెంట్ తోనే మేకర్స్ క్లారిటీ ఇచ్చారు. సినిమాటిక్ యూనివర్స్ లో ప్రశాంత్ వర్మ ఈసారి ఎలాంటి మైథలాజికల్ కథను తెర మీదకు తీసుకొస్తారు? మోక్షజ్ఞను ఎలాంటి పాత్రలో చూపించబోతున్నారు? అనేది ఆసక్తికరంగా మారింది.