ప్రభాస్ - ప్రశాంత్ వర్మ.. ఆ హీరో రిజెక్ట్ చేసిందేనా?

యంగ్ డైరెక్టర్ ప్రశాంత్ వర్మ ‘హనుమాన్’ మూవీతో దేశ వ్యాప్తంగా అందరి దృష్టిని తన వైపుని తిప్పుకున్నాడు. ఇప్పుడు ప్రశాంత్ వర్మ సినిమాటిక్ యూనివర్స్ లో బ్యాక్ టూ బ్యాక్ సినిమాలు లైన్ లో పెట్టాడు. వాటిలో కొన్నింటికి తాను దర్శకత్వం చేస్తున్నాడు. మరికొన్ని ప్రాజెక్ట్స్ ని తన శిష్యులతో చేయిస్తున్నాడు. రీసెంట్ గా ‘హనుమాన్’ మూవీ సీక్వెల్ ‘జై హనుమాన్’ ఫస్ట్ లుక్ రిలీజ్ చేశారు.

ఈ చిత్రంలో హనుమంతుడి పాత్రలో రిషబ్ శెట్టి నటిస్తున్నాడు. దీంతో పాటు నందమూరి బాలకృష్ణ వారసుడు మోక్షజ్ఞ డెబ్యూ మూవీ కూడా ప్రశాంత్ వర్మ చేతిలో ఉంది. ఈ సినిమా ఎప్పుడు మొదలు పెడతాడనేది క్లారిటీ లేదు. ఈ రెండు కాకుండా ‘మహాకాళి’, ‘అధీరా’ సినిమాలు తన సినిమాటిక్ యూనివర్స్ లో భాగంగా కంప్లీట్ చేయాల్సి ఉంది. ఈ రెండింటిని వేరే దర్శకులతో ప్రశాంత్ వర్మ రెడీ చేస్తున్నారు. చేతిలో రెండు సినిమాలు ఉండగానే ప్రశాంత్ వర్మ నెక్స్ట్ ప్రాజెక్ట్ కోసం హీరోని కన్ఫర్మ్ చేసుకునే పనిలో ఉన్నారు.

రీసెంట్ గా ప్రభాస్ కి ప్రశాంత్ వర్మ కథ చెప్పారంట. ‘బ్రహ్మ రాక్షస’ కాన్సెప్ట్ ని డార్లింగ్ ప్రభాస్ కి నేరేట్ చేసినట్లు టాక్ వినిపిస్తోంది. అయితే దీనిపై ప్రభాస్ ఇంకా ఎలాంటి క్లారిటీ ఇవ్వలేదని సమాచారం. ‘జై హనుమాన్’ మూవీ రిజల్ట్ బట్టి ప్రభాస్ ‘బ్రహ్మ రాక్షస’ సినిమా చేసే అవకాశం ఉందని ఇండస్ట్రీలో అనుకుంటున్నారు. గతంలో ప్రశాంత్ వర్మ రణవీర్ సింగ్ తో సూపర్ హీరో మూవీ చేయాలని అనుకున్నారు.

ఇద్దరి మధ్య స్టోరీ డిస్కషన్స్ కూడా జరిగాయి. అయితే క్రియేటివ్ డిఫరెన్స్ వలన ఆ కథ హోల్డ్ లో పెట్టారు. ‘బ్రహ్మ రాక్షస’ కథతోనే ప్రశాంత్ వర్మ రణవీర్ సింగ్ తో మూవీ చేయాలని అనుకున్నారు. అదే కథని ఇప్పుడు ప్రభాస్ కి ప్రశాంత్ వర్మ నేరేట్ చేసినట్లు ప్రచారం జరుగుతోంది. అందులో వాస్తవం ఎంత అనేది తెలియాల్సి ఉంది. ప్రస్తుతం ప్రశాంత్ వర్మ చేతిలో ఉన్న రెండు ప్రాజెక్ట్స్ పూర్తయ్యేసరికి కనీసం రెండేళ్లు పడుతుంది.

తరువాత ప్రభాస్ డేట్స్ అడ్జస్ట్ అయ్యే అవకాశాలు ఉన్నాయి. అయితే ప్రభాస్ ఒప్పుకోవాలా లేదా అనేది మాత్రం ప్రస్తుతం ప్రశాంత్ వర్మ చేస్తోన్న రెండు సినిమాల రిజల్ట్ మీద పూర్తిగా ఆధారపడి ఉంటుందని చెప్పొచ్చు. ప్రశాంత్ వర్మ అయితే కథల విషయంలో టీమ్ ని పెట్టుకొని పెర్ఫెక్ట్ ప్లానింగ్ తో వెళ్తున్నాడు. ప్రేక్షకుల అభిరుచిని దృష్టిలో ఉంచుకొన సినిమాలు చేస్తున్నాడు. ఈ నేపథ్యంలో కచ్చితంగా ప్రశాంత్ వర్మ నుంచి నెక్స్ట్ రాబోయే సినిమాలు కచ్చితంగా హిట్ అవుతాయని ఇండస్ట్రీ వర్గాలలో వినిపిస్తోంది.