తెలుగు స్టైల్ లో బ్యాట్ మ్యాన్.. హనుమాన్ తో కె.జి.ఎఫ్..!

ప్రశాంత్ వర్మ సినిమాటిక్ యూనివర్స్ నుంచి వస్తున్న సినిమా హనుమాన్. ఫస్ట్ ఇండియన్ సూపర్ హీరో మూవీగా వస్తున్న ఈ సినిమాను ప్రశాంత్ వర్మ నెక్స్ట్ లెవెల్ లో తెరకెక్కించారు. సినిమా నుంచి వచ్చిన టీజర్, ట్రైలర్ అద్భుతమైన రెస్పాన్స్ తెచ్చుకున్నాయి. ప్రైం షో ఎంటర్టైన్మెంట్స్ పై నిరంజన్ రెడ్డి నిర్మించిన ఈ సినిమా జనవరి 12న రిలీజ్ అవుతుంది. ఈ సినిమా రిలీజ్ సందర్భంగా ప్రశాంత్ వర్మ మీడియాతో ముచ్చటించారు.. ఆ విశేషాలేంటో చూద్దాం.

హను-మాన్ పాత్ర కోసం తేజని ఎలా మౌల్డ్ చేశారు ?

తేజ నాకంటే సీనియర్. తనకి యాక్టింగ్ నేర్పించాల్సిన అవసరం లేదు.(నవ్వుతూ) అయితే హనుమాన్ కోసం తేజని మేకోవర్ చేయించాను. జాంబీరెడ్డిలో సిటీ బాయ్ లా కనిపిస్తాడు. ఇందులో పల్లెటూరి కుర్రాడిలా కనిపిస్తాడు. మేకోవర్ సెట్ అయిన తర్వాత మళ్ళీ వెనక్కితిరిగి చూడలేదు. ఈ సినిమా కోసం తేజ చాలా కష్టపడ్డాడు. ఇది పూర్తయ్యే వరకూ మరో సినిమా ఒప్పుకోలేదు. హనుమాన్ పై నాకంటే ఎక్కువ హోప్స్ పెట్టుకున్నాడు తేజ.

ఈ సినిమా తొమ్మిది నెలల్లో పూర్తి చేయాలని అనుకున్నారు కదా.. కానీ అనుకున్న సమయానికి పూర్తి కాకపోవడానికి కారణం?

వీఎఫ్ఎక్స్ గురించి పూర్తిగా తెలుసనుకున్నాను. కానీ సినిమా మొదలుపెట్టిన తర్వాత అందులో సాధకబాధకాలు ఇంకా బాగా అర్థమయ్యాయి. జాంబీ రెడ్డి 50 షాట్స్ వుంటాయి. ఇందులో 1600 షాట్స్ వున్నాయి. పైగా వీఎఫ్ఎక్స్ కంపెనీ వాళ్ళు అనుకున్న సమయానికి వర్క్ ని ఇవ్వలేకపోయారు. ఇంకా సమయం కావాలని కోరారు. ఈ జర్నీలో చాలా నాలెడ్జ్ వచ్చింది. ఇకపై వీఎఫ్ఎక్స్ వున్న సినిమా ఫాస్ట్ గా తీయగలను.

ఎన్టీఆర్ గారు సూపర్ మ్యాన్ అనే సినిమా చేశారు.. ఆ సినిమా పోలికలు ఇందులో ఉన్నాయా ?

హనుమాన్ లో ఎన్టీఆర్ గారి సూపర్ మ్యాన్ కి సంబంధించిన హోమయిస్ ప్లే చేశాం. మొదట్లో ఇదే తెలుగులో మొదటి సూపర్ హీరో సినిమాని వేశాం. తర్వాత ఎన్టీఆర్ గారు చేసేశారని తెలిసింది. దానికి తగ్గట్టుగా ఇందులో సూపర్ మ్యాన్ హోమయిస్ చూపించాం.(నవ్వుతూ)

సూపర్ మ్యాన్ సినిమా కథలు దాదాపుగా ఒక టెంప్లెట్ లో వుంటాయి కదా.. హను మాన్ లో వుండే కొత్తదనం ఏమిటి ?

హనుమాన్ సూపర్ హీరో ఫిల్మ్ టెంప్లెట్ లోనే ఉంటుంది. కొత్తదనం ఏమిటంటే.. ఇది మన తెలుగు సినిమా స్టయిల్ అఫ్ మేకింగ్ లో ఉంటుంది. బ్యాట్ మ్యాన్ లాంటి సినిమాని రాజమౌళి గారు చేస్తే ఎలా వుంటుందో అలా వుంటుంది. మరోలా చెప్పాలంటే కేజీఎఫ్ లో యష్ ని ఎలా చూపించారో నేను హనుమంతుని అలా చూపించబోతున్నాను.

ఒక సూపర్ హీరో పాత్ర కోసం తేజ సజ్జా లాంటి యంగ్ హీరోని తీసుకోవాలని ఎలా అనిపించింది?

-పర్శనల్ గా తేజని అందరూ ఇష్టపడతారు. సినిమాల్లో తనకి ఇంకా మాస్ ఇమేజ్ రాలేదు. ఇందులో పాత్రకు ఇలాంటి నటుడే కావాలి. సినిమా చూస్తున్న ప్రేక్షకులు తనకి సూపర్ పవర్స్ రావాలని అనుకున్నప్పుడు ఆ పవర్స్ వస్తాయి. ఎమోషన్ ప్రేక్షకుల నుంచి రూట్ అవుతుంది కాబట్టి అది చాలా సహజంగా ఉంటుంది.

నార్త్ లో ప్రమోషన్స్ చేశారు కదా రెస్పాన్స్ ఎలా వుంది ?

అక్కడ చాలా మంచి రెస్పాన్స్ వుంది. సౌత్ సినిమాని చాలా గొప్ప స్థాయిలో చూస్తున్నారు. హనుమాన్ సినిమా తీస్తున్నామని చెప్పగానే.. సౌత్ వాళ్ళు గొప్ప తీస్తారని అభినందించారు. చాలా ఆనందంగా అనిపించింది. హనుమాన్ కు అన్నీ వైపుల నుంచి వస్తున్న అద్భుతమైన రెస్పాన్స్ చూస్తుంటే... ఇదంతా ఒక డ్రీంలా వుంది. ప్రేక్షకులు చాలా గొప్ప ఆదరణ చూపుతున్నారు.

హనుమాన్ మిగతా పాత్రలు గురించి ?

అమృత అయ్యర్, వరలక్ష్మి శరత్‌కుమార్, వినయ్ రాయ్ కీ రోల్స్ ప్లే చేస్తున్నారు. గెటప్ శ్రీను, సత్య పాత్రలు కూడా వినోదాత్మకంగా వుంటాయి. సముద్రఖని గారు చేస్తున్న పాత్ర చాలా ప్రత్యేకంగా ఉంటుంది.

నిర్మాత నిరంజన్ రెడ్డి గారు గురించి ?

నిరంజన్ రెడ్డి గారు చాలా పాజిటివ్ పర్శన్. సినిమాని చాలా గ్రాండ్ గా తీయాలనే అభిరుచి వున్న నిర్మాత. అవసరమైతే స్పానిష్ లో కూడా పాటలు చేయిద్దామని అన్నారు. ఆయనకి పెద్ద సినిమాలు చేయాలనే తపన ఉంది.

హను మాన్ లో చాలా మంచి కంటెంట్ కనిపిస్తోంది. ముఖ్యంగా ప్రమోషనల్ మెటిరియల్ ని చాలా క్రియేటివ్ గా డిజైన్ చేశారు. అయితే ఈ కంటెంట్ గురించి కాకుండా థియేటర్స్ గురించి చర్చ ఎక్కువగా జరగడం ఒక ఫిల్మ్ మేకర్ ఎలా అనిపిస్తోంది?

-ఒక ఫిల్మ్ మేకర్ గా నా ద్రుష్టి కంటెంట్ మీదే వుండాలి. క్యాలిటీ ప్రోడక్ట్ ఇస్తున్నామే లేదా అనేదే చూసుకోవాలి. కానీ అనుకోకుండా థియేటర్స్ చర్చ తెరపైకి వచ్చింది. నిజానికి ఇది నిర్మాతలు చూడాల్సిన అంశం. కానీ కొన్నిసార్లు బాధకలిగించే మాటలు విన్నప్పుడు మాట్లాడాల్సి వస్తోంది. అయితే సినిమా విడుదలైన తర్వాత కేవలం కంటెంట్ గురించే మాట్లాడుతారు. హను-మాన్ చాలా స్పెషల్ మూవీ. ఈ సినిమా విజయం సాధిస్తే.. పదేళ్ళు పాటు మనం గర్వంగా చెప్పుకునే సినిమాలు చేయొచ్చునే ప్రణాళిక వుంది.

నెక్స్ట్ సినిమా గురించి ?

నెక్స్ట్ మూవీ హనుమాన్ రిజల్ట్ ని బట్టి వుంటుంది.

బాలకృష్ణ గారికి కథ చెప్పారని విన్నాం ? అది మీ సినిమాటిక్ యునివర్స్ లో ఉంటుందా ?

బాలకృష్ణ గారికి కథ చెప్పాను. అది యునివర్స్ లో పెట్టోచ్చు, స్టాండ్ ఎలోన్ గా చేయొచ్చు. అది బాలకృష్ణ గారి నిర్ణయం బట్టి వుంటుంది.