ఇంత ఊరించింది దీని కోసమా..?

సినిమాలకు ధీటుగా ఇప్పుడు వెబ్ సీరీస్ లు కూడా పుంజుకున్నాయని చెప్పడంలో ఎలాంటి సందేహం లేదు. ఎలాగు సినీ లవర్స్ అంతా కూడా రేటు ఎంత పెంచినా ఓటీటీల సబ్ స్క్రిప్షన్ తీసుకుంటున్నారు. కాబట్టి వారికి కావాల్సిన టైం లో అవసరానికి మించిన కంటెంట్ అందుబాటులో ఉంటుంది. ఈ క్రమంలో వెబ్ సీరీస్ లకు మంచి క్రేజ్ ఏర్పడింది. ఐతే ఈ పాపులారిటీ తీసుకు రావడంలో మీర్జాపూర్ సీరీస్ ఒకటని చెప్పొచ్చు. అమెజాన్ ప్రైం లో 3 సక్సెస్ ఫుల్ సీజన్లు వచ్చాయి. మీర్జాపూర్ మొదటి సీజన్ సూపర్ హిట్ కాగా రెండు, మూడవ సీజన్ జస్ట్ ఓకే అనిపించాయి.

ఐతే మీర్జాపూర్ 3 తర్వాత రీసెంట్ గా మీర్జాపూర్ నుంచి బోనస్ ఎపిసోడ్ ఒకటి వస్తుందని ప్రైమ్ వీడియో ఒకటే హడావిడి చేసింది. బోనస్ ఎపిసోడ్ అంటే కథను కొనసాగిస్తూ సర్ ప్రైజ్ ఏదైనా ఇస్తారేమో అని మీర్జాపూర్ సీరీస్ ఫాలోవర్స్ అనుకున్నారు. కానీ తీరా అది చూశాక ఇంత ఊరించింది దీని కోసమా అనేస్తున్నారు. ఇంతకీ బోనస్ ఎపిసోడ్ గా వారు రిలీజ్ చేసింది ఏంటి అంటే మీర్జాపూర్ డిలీటెడ్ సీన్స్ అన్నమాట.

మీర్జాపూర్ సీరీస్ లో డిలీటెడ్ సీన్స్ అన్ని కూడా ఒక స్పెషల్ ఎపిసోడ్ లా చేసి రిలీజ్ చేశారు. ఐతే బోనస్ అంటూ నానా హంగామా చేసింది దీని కోసమా అనేస్తున్నారు ఆడియన్స్. మీర్జాపూర్ సీజన్ 1 ని గుర్మీత్ సింగ్, కరణ్ అన్షుమన్, మిహిర్ దేశాయ్ డైరెక్ట్ చేయగా సెకండ్ సీజన్ ను గుర్మీత్ సింగ్, మిహిర్ దేశాయ్ దర్శకత్వం వహించారు. సీజన్ 3 ని గుర్మీత్ సింగ్, ఆనంద్ అయ్యర్ డైరెక్ట్ చేశారు.

పంకజ్ త్రిపాఠి, అలి ఫాజల్, రసిక దుగల్, కుల్ భూషన్ ఖర్బందా, శ్వేత త్రిపాఠి లీడ్ రోల్స్ లో నటించిన మీర్జాపూర్ ఓటీటీ ఆడియన్స్ కు థ్రిల్లింగ్ ఎక్స్ పీరియన్స్ అందిస్తుంది. ఐతే సీజన్ 1 ఎంతో ఎంగేజింగ్ గా ఆడియన్స్ నుంచి సూపర్ రెస్పాన్స్ తెచ్చుకున్న మీర్జాపూర్ సీజన్ 2, 3 లతో ఆశించిన రేంజ్ రెస్పాన్స్ దక్కించుకోలేదు. ఐతే బోనస్ ఎపిసోడ్ అంటూ ప్రైం వీడియో వారు మీర్జాపూర్ సీరీస్ గురించి ఆడియన్స్ మళ్లీ చర్చించుకునేలా చేశారు.