సలార్‌ : వరద మొదటి తెలుగు సినిమా ముచ్చట

ప్రభాస్ హీరోగా ప్రశాంత్ నీల్ దర్శకత్వంలో రూపొందిన సలార్‌ సినిమా మరో రెండు రోజుల్లో ప్రేక్షకుల ముందుకు రాబోతున్న విషయం తెల్సిందే. సినిమాలో మలయాళ సూపర్‌ స్టార్‌ పృథ్వీరాజ్ సుకుమారన్‌ నటించడంతో సినిమా స్థాయి మరింత పెరిగింది. హీరోగా దర్శకుడిగా గత మూడు నాలుగు సంవత్సరాలుగా పృథ్వీరాజ్ సుకుమారన్‌ చేసిన సినిమాలు ఎంతటి విజయాన్ని సొంతం చేసుకున్నాయో తెల్సిందే.

ఒకే సారి ఏడు ఎనిమిది సినిమాలు చేసిన ఘనత కూడా పృథ్వీరాజ్ సుకుమారన్‌ సొంతం చేసుకున్నాడు. మలయాళం భాషతో పాటు హిందీ, తమిళంలో వరుసగా సినిమాలు చేసిన పృథ్వీరాజ్ తెలుగు లో సలార్‌ సినిమా తో ఎంట్రీ ఇవ్వబోతున్నాడు అని అంతా అనుకుంటున్నారు. కానీ టాలీవుడ్‌ లో పృథ్వీరాజ్ చాలా ఏళ్ల క్రితమే ఒక సినిమాను అది కూడా నెగటివ్ షేడ్స్ ఉన్న పాత్రలో నటించాడు.

శ్రీరామ్‌ శ్రీకాంత్‌ హీరోగా రూపొందిన పోలీస్‌ పోలీస్ సినిమాలో పృథ్వీరాజ్ సుకుమారన్‌ నటించాడు. ఆ సినిమా కోసం అప్పట్లోనే పృథ్వీరాజ్ తన పాత్రకు తానే స్వయంగా డబ్బింగ్‌ చెప్పుకున్నాడు. తాజాగా సలార్‌ సినిమాలోని తన వరద పాత్ర కోసం తానే డబ్బింగ్‌ చెప్పిన విషయం తెల్సిందే. కేవలం తెలుగులో మాత్రమే కాకుండా అన్ని భాషల్లో కూడా తన పాత్రకు తానే డబ్బింగ్‌ చేశాడు.

'పోలీస్‌ పోలీస్' సినిమా హిట్‌ అవ్వక పోవడంతో పృథ్వీరాజ్ సుకుమారన్ ను అప్పట్లో తెలుగు ప్రేక్షకులు, ఫిల్మ్‌ మేకర్స్ పట్టించుకోలేదు. అయితే మలయాళంలో ఆయన చేసిన విభిన్నమైన సినిమాలు, పాత్రల కారణంగా పాన్‌ ఇండియా స్టార్‌ స్టేటస్ ను దక్కించుకున్నాడు.

ఆయన ప్రతిభ మరియు ఆయన ఇమేజ్‌ ని దృష్టిలో పెట్టుకుని కేజీఎఫ్‌ ఫిల్మ్‌ మేకర్‌ ప్రశాంత్‌ నీల్ తన సలార్ సినిమాలో ఆయన నటించాలని.. కొన్ని నెలల పాటు వెయిట్‌ చేసి మరీ ఎంపిక చేసుకోవడం జరిగిందట. సలార్‌ తర్వాత పృథ్వీరాజ్ సుకుమారన్‌ టాలీవుడ్‌ లో మరింత బిజీ అయ్యే అవకాశాలు ఉన్నాయి అనడంలో సందేహం లేదు.