నిర్మాత వేద‌రాజు టింబ‌ర్ మృతి

టాలీవుడ్ సినీ ప‌రిశ్ర‌మ‌లో విషాదం జ‌రిగింది. సినీ నిర్మాత వేద‌రాజు టింబ‌ర్ ఇవాళ ఉద‌యం త‌న తుది శ్వాస విడిచారు. సినిమాల‌పై ఉన్న ఇష్టం, ప్రేమ‌తో రియ‌ల్ ఎస్టేట్ రంగంలో బిజీగా ఉంటూనే సినీ నిర్మాణంలోకి వ‌చ్చారు. వేద‌రాజు టింబ‌ర్ మృతి ప‌ట్ల ప‌లువురు సినీ ప్ర‌ముఖులు సంతాపం వ్య‌క్తం చేస్తున్నారు.

వేద‌రాజు వ‌య‌సు 54 సంవ‌త్స‌రాలు. గ‌త కొంత కాలంగా ఊప‌రితిత్తుల‌కు సంబంధించిన అనారోగ్య స‌మ‌స్య‌తో వేద‌రాజు ఇబ్బంది ప‌డుతున్నారు. హైద‌రాబాద్ గ‌చ్చిబౌలిలోని ఏఐజీ హాస్పిట‌ల్ లో చికిత్స తీసుకుంటున్న ఆయ‌న ఇవాళ ఉద‌యం తుది శ్వాస విడిచారు. త్వ‌ర‌లోనే ఆరోగ్య స‌మ‌స్య నుంచి కోలుకుని బ‌య‌ట‌పడి ఆరోగ్యంగా ఇంటికి తిరిగొస్తార‌ని అనుకుంటున్న టైమ్ లో వేద‌రాజు మృతి చెంద‌డం అంద‌రినీ విషాదంలో నింపింది.

వేద‌రాజుకు భార్య‌, ఒక కుమార్తె ఉన్నారు. హైద‌రాబాద్ న‌గ‌రంలో శుక్ర‌వార‌మే ఆయ‌న అంత్య‌క్రియలు జ‌రుగుతాయ‌ని ఆయ‌న కుటుంబీకులు తెలిపారు. సినిమాలపై ఉన్న మ‌క్కువ‌తోనే ఆయ‌న చిత్ర ప‌రిశ్ర‌మ‌లోకి అడుగు పెట్టార‌ని, మ‌రో సినిమా నిర్మాణానికి ప్లాన్ చేస్తున్న టైమ్ లో ఇలాంటి దుర్ఘ‌ట‌న జ‌రిగింద‌ని ఆయ‌న స‌న్నిహితులు వివ‌రించారు.

వేద‌రాజు రెండు సినిమాల‌ను నిర్మించ‌గా, ఆ రెండు సినిమాలూ అల్ల‌రి న‌రేష్ తోనే తీశారు. అందులో ఒక సినిమా అల్ల‌రి న‌రేష్, స్నేహా ఉల్లాల్ జంట‌గా న‌టించిన మ‌డ‌తకాజా సినిమాను నిర్మించారు. ఊస‌ర‌వెల్లి, దూకుడు సినిమాల‌తో రిలీజైన ఆ సినిమా ఫ్లాప్ గా నిలిచింది. ఇది కాకుండా అల్ల‌రి న‌రేష్ న‌టించిన‌ సంఘ‌ర్ష‌ణ సినిమాకు కూడా ఆయ‌నే నిర్మాత‌. త‌మిళ సినిమాకు రీమేక్ గా వ‌చ్చిన ఈ సినిమా క‌మ‌ర్షియ‌ల్ గా స‌క్సెస్ సాధించింది.