ఒక్క మాటతో.. ఎన్నికల్లో పోటీపై బండ్లన్న క్లారిటీ..

తెలుగు చిత్ర పరిశ్రమలో ప్రముఖ నిర్మాత, కమెడియన్ బండ్ల గణేశ్ గురించి ప్రత్యేకంగా చెప్పాల్సిన పనిలేదు. సోషల్ మీడియాలో బాగా యాక్టివ్‌గా ఉంటూ.. సినిమా, పాలిటిక్స్‌కు సంబంధించి ఆసక్తికర ట్వీట్స్, కామెంట్స్ చేస్తూ హాట్​ టాపిక్​గా మారుతుంటారు. ప్రస్తుతం సినిమా రంగానికి కాస్త దూరంగా ఉన్నా.. అప్పుడప్పుడు ఈవెంట్లలో పాల్గొని సందడి చేస్తుంటారు.

ఇక రాజకీయాల విషయానికొస్తే.. గతంలో కాంగ్రెస్ పార్టీలో యాక్టివ్‌గా ఉన్న బండ్లన్న.. ఆ తర్వాత సైలెంట్ అయిపోయారు. అయితే తాజాగా.. తెలంగాణలో ఎన్నికలు సమీపిస్తున్న నేపథ్యంలో తన పాలిటిక్స్ రీఎంట్రీపై ఓ ఆసక్తికర ట్వీట్ చేశారు. తెలంగాణ ఎలక్షన్స్​లో పోటీ చేసే అంశంపై స్పష్టత ఇచ్చారు. ప్రస్తుతం ఈ విషయం క్షణాల్లో వైరల్​గా మారిపోయింది.

ఎన్నికల్లో ఎమ్మెల్యేగా పోటీ చేయడం లేదని బండ్ల గణేశ్ చెప్పారు. కూకట్‌పల్లి స్థానం నుంచి కాంగ్రెస్‌ తరఫున బరిలోకి దిగనున్నారనే ప్రచారం సాగుతున్న నేపథ్యంలో బండ్ల గణేశ్‌ స్పందించారు. ఈ మేరకు తన సోషల్ మీడియా అకౌంట్​ ఎక్స్​లో ట్వీట్‌ చేశారు.

నేను ఈసారి జరిగే ఎన్నికల్లో ఎమ్మెల్యేగా పోటీ చెయ్యను. రేవంత్ రెడ్డి గారు నాకు ఇప్పుడు అవకాశం ఇస్తాను అని చెప్పారు కానీ నాకు ఈసారి టికెట్ వద్దు. కాంగ్రెస్ పార్టీకి అధికారం రావడం ముఖ్యం దానికోసం పనిచేస్తాను. రేవంతన్న మీ ప్రేమకు కృతజ్ఞుణ్ణి. నేను టికెట్ కోసం కూడా దరఖాస్తు చేయలేదు. ఈసారి కాంగ్రెస్ పార్టీ అధికారంలోకి రావటమే నా ధ్యేయం. తప్పకుండా అధికారంలోకి వస్తుంది. రేవంత్ రెడ్డి నాయకత్వంలో పనిచేస్తాం, అదికారంలోకి వస్తాం జై కాంగ్రెస్. అని బండ్ల గణేశ్‌ñÙ పేర్కొన్నారు.

కాగా, గత ఎన్నికల్లో ఆయన కాంగ్రెస్‌కు ప్రచారం చేసిన సంగతి తెలిసిందే. 2018 ఎన్నికలకు ముందు కాంగ్రెస్ పార్టీలో చేరిన ఆయన.. షాద్‌నగర్ ఎమ్మెల్యే టికెట్ ఆశించి భంగపడ్డారు. ఆ తర్వాత హస్తం పార్టీ కూడా ఓడిపోవటంతో ఆ పార్టీ కార్యక్రమాల్లో ఇన్‌యాక్టివ్ అయిపోయారు. తన ఇతర వ్యాపారాలపై దృష్టి సారించారు. ఆ మధ్యలో బండ్లన్న జనసేన పార్టీలోకి వెళ్తారన్న ప్రచారం కూడా సాగింది.