ప్రాజెక్ట్ K.. తప్పులో కాలు కాదు.. తలే పెట్టేశారు!

500 కోట్ల భారీ బడ్జెట్ తో తెరపైకి వస్తున్న సినిమా అంటే తప్పకుండా ప్రతి చిన్న అప్డేట్ కూడా హై రేంజ్ లోనే ఉంటుంది అని ఫ్యాన్స్ ఆశపడడంలో ఎలాంటి తప్పులేదు. ముందు బజ్ క్రియేట్ చేయడంలోనే సినిమా రిజల్ట్ చాలా ఆధారపడి ఉంటుంది అని చెప్పవచ్చు. ఒక బాహుబలి సినిమా తీసినప్పుడు రాజమౌళి ఫస్ట్ లుక్ పోస్టర్ నుంచి ట్రైలర్ వరకు ఏ తరహాలో ప్లాన్ చేసుకుంటూ వచ్చాడో ప్రత్యేకంగా చెప్పనవసరం లేదు. అవకాశం ఉన్న ప్రతి చోట ఆయన సినిమాపై పాజిటివ్ గానే హైప్ క్రియేట్ చేసేందుకు ప్రయత్నం చేశాడు.

అయితే 50 సినిమాలు అనుభవం ఉన్న వైజయంతి మూవీస్ మొదటిసారి 500 కోట్లకు పైగా భారీ బడ్జెట్ తో ప్రాజెక్టు K సినిమాను నిర్మిస్తోంది అంటే అందరూ కూడా ఈ సినిమా తప్పకుండా అంచనాలకు అనుగుణంగానే ఉంటుంది అనుకున్నారు. అంతే కాకుండా పాన్ వరల్డ్ సినిమా అన్నారు కాబట్టి అందులోనూ ప్రభాస్ తో సైన్స్ ఫిక్షన్ అంటున్నారు కాబట్టి సినిమా మామూలుగా ఉండదు అని చర్చించుకుంటున్నారు.

అయితే ఈ క్రమంలో చిత్ర యూనిట్ ఊహించని విధంగా తప్పులో కాలు వేయడం కాదు కదా.. ఏకంగా తల పెట్టింది అన్నట్లు కామెంట్స్ అందుకుంటుంది. ఎందుకంటే అమెరికాలో హడావిడి చేస్తూ హాలీవుడ్ రేంజ్ లో సినిమాను ప్రమోట్ చేయాలి అని నాగ్ అశ్విన్ టీం ప్రయత్నాలు బాగానే చేస్తుంది. అయితే ఫస్ట్ లుక్ పోస్టర్ విషయంలో మాత్రం ఒక్కసారిగా షాక్ అయితే ఇచ్చారు.

అసలు ఆ పోస్టర్ ఏ మాత్రం పర్ఫెక్ట్ గా లేదు అని దానికన్నా ఫ్యాన్ మేడ్ పోస్టర్స్ పర్ఫెక్ట్ అని కామెంట్స్ అయితే వస్తున్నాయి. ఇక వైజయంతి వాళ్ళు మళ్లీ వెంటనే ఫస్ట్ లుక్ డిలీట్ చేసి మరొక పోస్టర్ విడుదల చేశారు. అసలు మొదటి దానికి రెండవ దానికి పెద్దగా తేడా ఏమీ లేదు. కేవలం కలర్ చేంజ్ చేసి కింద అగ్ని లాంటి మెరుపులను జత చేసారు. ఈ తరహా ఎడిటింగ్ నార్మల్ గా ఫ్యాన్ అయినా కూడా చేయగలడు అని కామెంట్స్ అయితే వస్తున్నాయి.

అసలు ప్రభాస్ తలను తీసుకెళ్లి ఏదో ఐరన్ మాన్ అప్డేట్ వెర్షన్ కు అతికించినట్టు ఉంది అని కామెంట్స్ అయితే వచ్చాయి. మొత్తానికి మొదటి పోస్టర్ కు నెగిటివ్ కామెంట్స్ వచ్చినప్పటికీ దాన్ని అలా వదిలేసి మరొక ఆసక్తికరమైన పోస్టర్ విడుదల చేసి ఉంటే సరిపోయేది. కానీ అలా చేయకుండా మళ్లీ దాన్ని ఏదో చిన్నపాటి స్థాయిలో ఎడిట్ చేసి విడుదల చేయడం మరింత విమర్శలను వచ్చేలా చేస్తోంది.

ఇంత చిన్న లాజిక్ అసలు ఎలా మిస్ అవుతున్నారో అర్థం కావడం లేదు అని ఫ్యాన్స్ మరింత కంగారు పడుతున్నారు. ఏదేమైనా ప్రభాస్ మాత్రం ఇప్పటికే వరుస డిజాస్టర్స్ తో సతమతమవుతున్నాడు. ఇక సలార్ విషయంలో కూడా అలాగే నెగిటివ్ వైబ్ తోనే ప్రమోషన్స్ స్టార్ట్ అయ్యాయి. ఇక ఇప్పుడు ప్రాజెక్ట్ కే ను ఏం చేస్తారో అని ఫ్యాన్స్ కంగారు పడుతున్నారు. మరి ఫస్ట్ గ్లింప్స్ ఎలా ఉంటుందో చూడాలి.