పుష్ప 2: గ్రాండ్ జాతర ఐమ్యాక్స్‌లో కూడా..

ఐకాన్ స్టార్ అల్లు అర్జున్ నుంచి వస్తున్న పాన్ ఇండియా చిత్రం పుష్ప 2: ది రూల్ తాజాగా మరో సంచలన ప్రకటనతో ప్రేక్షకులను ఉర్రూతలూగిస్తోంది. డిసెంబర్ 5న ప్రపంచవ్యాప్తంగా థియేటర్లలో సందడి చేయబోతున్న ఈ సినిమా ఐమ్యాక్స్ ఫార్మాట్‌లో విడుదల అవుతుందని క్లారిటీ ఇచ్చారు. ఈ విషయాన్ని మేకర్స్ విడుదల చేసిన పోస్టర్ ద్వారా అధికారికంగా వెల్లడించారు. ఈ పోస్టర్‌లో అల్లు అర్జున్ పుష్ప రాజ్ లుక్‌లో వైలెంట్ గా కనిపిస్తున్నాడు.

పుష్ప రాజ్‌కు సంబంధించిన ఈ యాటిట్యూడ్ పోస్టర్ ఇప్పటికే సోషల్ మీడియాలో ట్రెండ్ అవుతోంది. పుష్ప రాజ్ ధగధగలాడే లుక్, బ్యాక్‌డ్రాప్‌లో రెడ్ కలర్ ఈ చిత్రానికి మరింత గ్రాండ్ అప్పీల్ ఇస్తున్నాయి. ఐమ్యాక్స్ విడుదల ప్రకటనతో, ఈ సినిమా ప్రపంచవ్యాప్తంగా ప్రేక్షకులకు అత్యుత్తమ థియేట్రికల్ అనుభవాన్ని అందించబోతోందని స్పష్టమవుతోంది. ఇండియన్ సినిమా పరిశ్రమలో ఐమ్యాక్స్ అనేది అత్యంత ప్రతిష్టాత్మక ఫార్మాట్‌గా వైరల్ అవుతోంది.

హాలీవుడ్ లేదా భారీ ప్రాజెక్టులకు మాత్రమే ఈ ఫార్మాట్‌ను ఉపయోగిస్తారు. ఇక పుష్ప 2: ది రూల్ ఐమ్యాక్స్ ఫార్మాట్‌లో విడుదల కావడం అనేది ఆడియన్స్‌కు ఒక కొత్త అనుభవాన్ని అందించబోతోందని చెప్పవచ్చు. డిసెంబర్ 4న యుఎస్ ప్రీమియర్ షోలు ప్రారంభమవుతుండగా, డిసెంబర్ 5న ఇండియాలో ఈ గ్రాండ్ రిలీజ్ ప్రపంచ వ్యాప్తంగా జరగనుంది. ఇక ఈ సినిమా ప్రపంచవ్యాప్తంగా 12 వేలకు పైగా స్క్రీన్స్ లలో భారీ స్థాయిలో విడుదల అవుతోంది. ఇప్పటికే మ్యూజికల్ ప్రొమోషన్స్, యాక్షన్ సీక్వెన్సెస్, నెక్స్ట్ లెవెల్ విజువల్స్ సినిమాపై అంచనాలను అమాంతం పెంచేశాయి.

ముఖ్యంగా ఐమ్యాక్స్ ఫార్మాట్‌లో సినిమా చూస్తే పుష్ప రాజ్ పాత్ర మరియు కథకు సంబంధించిన ప్రతీ ఎమోషన్, యాక్షన్ సీన్స్ మరింత ఇన్‌టెన్స్‌గా అనిపిస్తాయని ట్రేడ్ వర్గాలు చెబుతున్నాయి. ఈ చిత్రానికి దర్శకత్వం వహిస్తున్న సుకుమార్, సాంకేతిక నిపుణుల కలిసి అద్భుతమైన విజువల్స్, ఎమోషన్స్ కలబోసి మరొక విజయం సృష్టించేందుకు సిద్ధమవుతున్నారు. దేవిశ్రీ ప్రసాద్ అందించిన బ్యాక్‌గ్రౌండ్ స్కోర్ ఇప్పటికే హైలైట్ అవుతోంది.

ఈ సినిమా విడుదలకు ఇంకా కొద్దిరోజుల సమయం మాత్రమే ఉంది. ఇక ఇండియాలో డిసెంబర్ 4న రాత్రి 9 గంటల సమయంలో స్పెషల్ ప్రీమియర్ షో వేసే అవకాశం ఉంది. ఇక మరుసటిరోజు తెల్లవారుజామున పుష్ప రాజ్ జాతర మొదలు కానుంది. తప్పకుండా సినిమా వరల్డ్ వైడ్ గా 1000 కోట్ల కలెక్షన్స్ అందుకుంటుందని ట్రేడ్ వర్గాలు చెబుతున్నాయి.