బాక్సాఫీస్: హిందీలో టాప్ డే 1.. పుష్ప రాజ్ కొట్టగలడా?

‘బాహుబలి’ తర్వాత సౌత్ సినిమాలు నార్త్ ఇండియాలో మంచి వసూళ్లని రాబడుతూ వస్తున్నాయి. ముఖ్యంగా స్టార్ హీరోల నుంచి వచ్చే పాన్ ఇండియా సినిమాలకి మంచి కలెక్షన్స్ రావడం విశేషం. హీరోల ఇమేజ్, మూవీ ప్రమోషన్స్ కారణంగా ఫస్ట్ డే బాగానే ఇంపాక్ట్ క్రియేట్ చేస్తున్నారు. మూవీకి పాజిటివ్ టాక్ వస్తే లాంగ్ రన్ లో ప్రేక్షకులని మెప్పిస్తున్నాయి. కథలలో దమ్ముంటే క్యాస్టింగ్ తో సంబంధం లేకుండా మూవీస్ చూస్తారని కొన్ని చిత్రాలు ప్రూవ్ చేశాయి.

ఇదిలా ఉంటే ఐకాన్ స్టార్ అల్లు అర్జున్ మోస్ట్ అవైటెడ్ మూవీ ‘పుష్ప 2’ డిసెంబర్ 5న వరల్డ్ వైడ్ గా రిలీజ్ కాబోతోంది. భారీ అంచనాల మధ్య ప్రేక్షకుల ముందుకి రాబోతున్న ఈ సినిమాపై మేకర్స్ చాలా కాన్ఫిడెంట్ గా ఉన్నారు. ప్రమోషన్స్ కూడా చాలా గట్టిగా ప్లాన్ చేశారు. కచ్చితంగా ఈ చిత్రం డిస్టిబ్యూటర్స్ కి భారీ లాభాలు తెచ్చిపెడతాయని భావిస్తున్నారు. ముఖ్యంగా నార్త్ ఇండియాలో ‘పుష్ప 2’ పైన ఎక్కువ ఆసక్తి నెలకొని ఉంది.

దీనికి కారణం ‘పుష్ప’ మొదటి పార్ట్ కి అక్కడ లభించిన ఆదరణ అని చెప్పాలి. ఎలాంటి అంచనాలు లేకుండా రిలీజ్ అయిన ఈ మూవీ నార్త్ లో ఏకంగా 100 కోట్లకి పైగా గ్రాస్ కలెక్షన్స్ సాధించింది. దీంతో ‘పుష్ప 2’ పైన ఎక్స్ పెక్టేషన్స్ పెరిగిపోయాయి. నార్త్ లో ఈ చిత్రాన్ని భారీ ఎత్తున రిలీజ్ చేస్తున్నారు. అలాగే ప్రమోషన్స్ ఈవెంట్స్ కూడా గట్టిగా నిర్వహిస్తూ సినిమాని జనాల్లోకి బలంగా పంపించే ప్రయత్నం చేస్తున్నారు. నార్త్ లో ‘పుష్ప 2’ మూవీ షారుఖ్ ఖాన్ ‘జవాన్’ మూవీ ఫస్ట్ డే కలెక్షన్స్ రికార్డ్ ని బ్రేక్ చేస్తుందని ట్రేడ్ పండితులు అంచనా వేస్తున్నారు.

‘జవాన్’ మూవీ హిందీలో మొదటి రోజు 63.90 కోట్లు కలెక్ట్ చేసింది. ఇప్పటి వరకు హిందీ బెల్ట్ లో ఇవే అత్యధిక మొదటి రోజు కలెక్షన్స్. దీని తర్వాత షారుఖ్ ఖాన్ మరో చిత్రం ‘పఠాన్’ 55.70 కోట్లతో ఉంది. ఈ ఏడాది రిలీజ్ అయిన ‘స్త్రీ 2’ మూవీ మొదటి రోజు 53.25 కోట్ల గ్రాస్ కలెక్షన్స్ అందుకొని మూడో స్థానంలో ఉంది. రాకింగ్ స్టార్ యష్ ‘కేజీఎఫ్ చాప్టర్ 2’ మూవీ ఏకంగా 52.40 కోట్లు వసూళ్లు చేసిన టాప్ 4 గా నిలిచింది.

ఫస్ట్ డే హిందీలో హైయెస్ట్ కలెక్షన్స్ సాధించిన సౌత్ సినిమాలలో కేవలం ‘కేజీఎఫ్ చాప్టర్ 2’, ‘బాహుబలి 2’ సినిమాలు మాత్రమే టాప్ 10లో ఉన్నాయి. ఇప్పుడు ‘పుష్ప 2’ కి కూడా ఈ టాప్ లోకి వచ్చే అవకాశం అయితే ఉంది. అయితే ఏ నెంబర్ దగ్గరకి వస్తుందనేది ఆసక్తికరంగా మారింది. ‘జవాన్’ కలెక్షన్స్ రికార్డ్ ని పుష్ప 2 బ్రేక్ చేస్తుందని మేకర్స్ అయితే కాన్ఫిడెంట్ గా ఉన్నారు. మరి అది సాధ్యం అవుతుందా అనేది వేచి చూడాలి.

హిందీలో ఫస్ట్ డే అత్యధిక కలెక్షన్స్ రాబట్టిన సినిమాలు

జవాన్ - 63.90 కోట్లు

పఠాన్ - 55.70 కోట్లు

స్త్రీ 2 - 53.25 కోట్లు

కేజీఎఫ్ చాప్టర్ 2 - 52.40 కోట్లు

యానిమల్- 51.50 కోట్లు

వార్ - 50.60 కోట్లు

థంగ్స్ ఆఫ్ హిందుస్థాన్ - 48.30 కోట్లు

భరత్ - 41.60 కోట్లు

టైగర్ 3 - 40.90 కోట్లు

బాహుబలి 2 - 40.75 కోట్లు