పుష్ప 2.. 8 నగరాల మాస్టర్ ప్లాన్

ఇండియా వ్యాప్తంగా ఉన్న సినీ ప్రియులు ఎంతో ఆసక్తిగా ఎదురు చూస్తున్న సినిమాలు కొన్ని ఉన్నాయి. అందులో టాలీవుడ్ క్రియేటివ్ డైరెక్టర్ సుకుమార్ - ఐకాన్ స్టార్ అల్లు అర్జున్ కాంబినేషన్‌లో రూపొందుతోన్న ‘పుష్ప ది రూల్’ ఒకటి. దీనికి కారణం గతంలో వచ్చిన ‘పుష్ప ది రైజ్’ అని ప్రత్యేకంగా చెప్పనక్కర్లేదు. ఈ చిత్రం పాన్ ఇండియా రేంజ్‌లో సంచలన విజయాన్ని సొంతం చేసుకున్న విషయం తెలిసిందే.

సూపర్ హిట్ సినిమాకు సీక్వెల్‌గా రూపొందుతోన్న ‘పుష్ప ది రూల్’ మూవీపై అంచనాలు అంతకంతకూ పెరుగుతూనే ఉన్నాయి. ఈ నేపథ్యంలో ఈ సినిమాను ఫస్ట్ పార్టుకు మించిపోయేలా మరింత హై రేంజ్‌లో తీసేందుకు సన్నాహాలు చేస్తున్నారు. ఇప్పటికే దీనికి సంబంధించిన షూటింగ్‌ను దాదాపుగా పూర్తి చేసుకున్నారు. ఇప్పుడు క్లైమాక్స్ పార్ట్ షూట్‌తో పాటు ఈ మూవీ పోస్ట్ ప్రొడక్షన్ వర్క్‌ను జరుపుతున్నారు.

ఐకాన్ స్టార్ అల్లు అర్జున్ ప్రధాన పాత్రలో నటిస్తోన్న ‘పుష్ప ది రూల్’ సినిమాను డిసెంబర్ 5వ తేదీన వరల్డ్ వైడ్‌గా ఎంతో గ్రాండ్‌గా రిలీజ్ చేయబోతున్నారు. దీనికి సమయం దగ్గర పడుతుండడంతో మూవీ యూనిట్ ప్రమోషన్ కార్యక్రమాలపై ఎక్కువగా ఫోకస్ చేస్తోంది. ఇందులో భాగంగానే ఈ మూవీకి సంబంధించిన ఈవెంట్లపై తాజాగా ఓ కీలకమైన నిర్ణయాన్ని తీసుకున్నట్లు ఓ న్యూస్ బయటకు వచ్చింది.

‘పుష్ప ది రూల్’ సినిమా పాన్ ఇండియా రేంజ్‌లో విడుదల కాబోతున్న విషయం తెలిసిందే. అందుకే దీనికి సంబంధించి దేశంలోని ఎనిమిది ప్రధాన నగరాల్లో ప్రీ రిలీజ్ ఈవెంట్లను గ్రాండ్‌గా నిర్వహించాలని చిత్ర బృందం డిసైడ్ అయిందట. ఇందులో భాగంగానే మొదటి కార్యక్రమాన్ని పుణె నగరంలో ప్లాన్ చేశారని సమాచారం. దీన్ని విజయవంతం చేసే బాధ్యతను నార్త్ డిస్టిబ్యూటర్లకు అప్పగించారని తెలుస్తోంది.

పుణె ఈవెంట్ తర్వాత ‘పుష్ప ది రూల్’ టీమ్ వరుసగా న్యూఢిల్లీ, లక్నో, కోల్‌కతా, హుబ్లీ, చెన్నై, కొచ్చి, హైదరాబాద్ నగరాల్లో భారీ ప్రీ రిలీజ్ ఈవెంట్లను చేస్తుందని సమాచారం. ఒకవేళ ఈవెంట్లకు పర్మీషన్లు రాకపోతే ప్రెస్‌ మీట్లు అయినా నిర్వహించాలని చూస్తున్నారట. వీటన్నింటిలోనూ ఐకాన్ స్టార్ అల్లు అర్జున్ పాల్గొనే అవకాశం ఉందని కూడా సమాచారం లీకైంది.

గతంలో ఏ సినిమా యూనిట్ కూడా ఇలా ఒకేసారి ఎనిమిది సిటీల్లో ఈవెంట్లను చేయలేదు. ఇప్పుడు ‘పుష్ప ది రూల్’ మేనియాను దేశ వ్యాప్తంగా పెంచేందుకు చిత్ర యూనిట్ గట్టి ప్రయత్నాలే చేస్తుందని దీనిబట్టి అర్థం అవుతోంది.