రికార్డ్‌లను శాసిస్తున్న పుష్ప 2 ట్రైలర్‌

అల్లు అర్జున్‌, సుకుమార్‌ కాంబోలో రూపొందిన 'పుష్ప 2' సినిమా డిసెంబర్‌ 5న ప్రేక్షకలు ముందుకు రాబోతుంది. తాజాగా బీహార్ రాజధాని పాట్నాలో భారీ ఈవెంట్‌ నిర్వహించి ట్రైలర్‌ను విడుదల చేయడం జరిగింది. హిందీతో పాటు అన్ని భాషల్లోనూ ఒకే సారి ట్రైలర్‌ విడుదల చేయడం జరిగింది. తెలుగు ప్రేక్షకుల అంచనాలను ఆకాశానికి తీసుకు వెళ్లే విధంగా పుష్ప 2 ట్రైలర్ ఉంటుందని అంతా భావించారు. కానీ కేవలం తెలుగు ప్రేక్షకులు మాత్రమే కాకుండా ప్రతి ఒక్కరు సర్‌ప్రైజ్‌ అయ్యే విధంగా పుష్ప 2 ట్రైలర్ ఉంది.

యూట్యూబ్‌ను పుష్ప 2 షేక్‌ చేస్తుంది. అన్ని భాషల్లోనూ పుష్ప 2 ట్రైలర్‌ ట్రెండ్‌ అవుతోంది. సౌత్‌ సినిమాల ట్రైలర్స్‌కి నార్త్‌ లో పెద్దగా స్పందన ఉండదు. కానీ ఈ ట్రైలర్‌కి మాత్రం అనూహ్య స్పందన దక్కింది. ఇక ఈ ట్రైలర్‌ కేవలం 15 గంటల్లో 40 మిలియన్‌ల వ్యూస్‌ను రాబట్టింది. తెలుగు వర్షన్‌ ట్రైలర్‌కి వచ్చిన స్పందన మునుపెన్నడూ ఏ ట్రైలర్‌ కి దక్కలేదు అంటూ యూనిట్‌ సభ్యులు హర్షం వ్యక్తం చేస్తున్నారు. అల్లు అర్జున్‌ సుకుమార్‌ల కాంబోకి ఉన్న క్రేజ్‌, పుష్ప 2 సినిమా పై ఉన్న బజ్‌ కారణంగానే ఈ రేంజ్‌లో సినిమా ట్రైలర్‌కి రెస్పాన్స్‌ దక్కింది అనేది ఇండస్ట్రీ వర్గాల అభిప్రాయం.

ట్రైలర్‌ వ్యూస్‌తో యూట్యూబ్‌లో ఆల్‌ టైమ్‌ రికార్డ్‌ను సొంతం చేసుకున్న పుష్ప 2 మరిన్ని రికార్డులను సైతం దక్కించుకోబోతుంది. అత్యధిక లైక్స్‌ తో పాటు అత్యధిక కామెంట్స్ ను సొంతం చేసుకున్న ట్రైలర్‌గాను టాప్‌లో నిలిచే అవకాశాలు ఉన్నాయి. అల్లు అర్జున్‌ని పాన్‌ ఇండియా స్థాయిలో నిలిపిన పుష్ప సినిమా తెలుగు ప్రేక్షకులకు గర్వకారణం అంటూ తెలుగు నెటిజన్స్‌ సోషల్ మీడియా ద్వారా మాట్లాడుకుంటూ ఉన్నారు. అల్లు అర్జున్ అభిమానులు మాత్రమే కాకుండా ప్రతి ఒక్కరూ పుష్ప 2 కోసం వెయిట్‌ చేస్తున్నామని అంటున్నారు.

పాన్‌ ఇండియా రేంజ్‌ లో వెయ్యి కోట్లకు పైగా బిజినెస్‌ చేసిన ఈ సినిమా వసూళ్లు సరికొత్త రికార్డ్‌ను నమోదు చేయబోతుంది అంటూ ట్రైలర్‌ చెప్పకనే చెబుతోంది. ఇప్పటి వరకు దంగల్‌ సినిమా రూ.2000 కోట్లకు పైగా వసూళ్లు సాధించి టాప్‌ లో ఉండగా బాహుబలి 2 రూ.1800 కోట్ల వసూళ్లతో నెం.2 లో ఉంది. ఇప్పుడు ఈ రెండు సినిమాల రికార్డ్‌ ను పుష్ప 2 బ్రేక్‌ చేసే అవకాశాలు ఉన్నాయి. ప్రపంచ వ్యాప్తంగా భారీగా విడుదల కాబోతున్న పుష్ప 2 ఏకంగా రూ.2000 కోట్ల వసూళ్లకు పైగా దక్కించుకోవడంతో పాటు దంగల్‌ రికార్డ్‌ను బ్రేక్‌ చేయబోతుంది అంటున్నారు. పదేళ్లుగా కొనసాగుతున్న ఈ రికార్డ్‌లను పుష్ప 2 బ్రేక్‌ చేయడం దాదాపు కన్ఫర్మ్‌ అంటూ ఫ్యాన్స్ సంబురాలు మొదలు పెట్టారు.